1 Mtunyeni IMNDEWA!

Mlole pfapfinoghile ukumtunya Imulungu wetu!

Kwaapfila yeye kanogha na kobamighwa yatunyighwe.

2 IMNDEWA yeye iyaghutsengile keli ghumji ghwa Yerusalemu,

kowoyitsa Waisiraeli iwakalile kuna isi ya utumwa.

3 Kowatenda awala iwatenyuke waleke ukutenyuka keli,

naye kowahonetsa ipfilonda pfawo.

4 Kopeta tsinondo,

na chila imwe koing'a taghwa.

5 IMNDEWA ka mkulu na kana ngupfu nyingi,

tsimbutsi tsake ng'atsilingighwa baye.

6 IMNDEWA kowenula awala iwehulumsa,

lekeni awala iwehile kowasa mna litimbwisi.

7 Mmwimbile IMNDEWA tsiwila tsa mighede,

mumtowele ching'weng'we Imulungu wetu.

8 Yeye kolighubika lilanga na libingu,

koitenda imvula idiwe mna isi,

na koyotetsa imitsani yote mna ipfidunda.

9 Yeye koweng'a wanyama ichijo chawo,

koweng'a ichijo iwana wa ibondwa ahala hawolila.

10 Yeye ng'onoghelwa baye na tsingupfu tsa wafalasi,

wala asikali yana tsingupfu,

11 lekeni konoghelwa na awala iwompfuka,

na awala iwehuwila uluso wake.

12 Umtunye IMNDEWA ghwe Yerusalemu!

Umtunye Imulungu wako ghwe Sayuni.

13 Yeye koghatenda ghamalango ghako ghawe na ngupfu,

Na kowabaliki iwanu iwali mng'anda mwako.

14 Kowatenda iwanu iwali mna tsimbaka tsenu wakale tseghamba,

na kokutenda wighute kwa ing'ano inoghile.

15 Yeye koghala malaghitso ghake muisi,

na ghayolonga ng'aghokawa baye ukutendeka.

16 Koitandatsa ibalafu kulonga mighala ya ng'olo,

kopwililisa ing'ungu kulonga lipfu.

17 Koghala mvula ya mabwe ka pfibwe pfidopfido,

Yuhi iyodaha ukududumila libeho alyo?

18 Kuya kolubula kwa lilonga lyake,

na koghala libeho, na ghamatsi gholawa.

19 Kuya usenga wake komlongela Jakobu,

naye koweng'a Waisiraeli imiko na ghamalaghitso.

20 Lekeni tsiisi tsingi ng'atsitendele apfo baye,

iwanu wangi ng'awomanya baye malaghitso ghake.

Mumtunye IMNDEWA!