1 Ghwe MNDEWA, wapinge awala iwonipinga nene,

witowe nawo awala iwetowa na nene.

2 Ukinde ingao na chinu cha ukukingila ilukuli, winuke unyapfile,

3 Wenulile ghumgoha na limaghe lyako, awala wose iwonikoleletsa,

unongele, "Nene yuyo yanikukombola."

4 Wone chinyala, na waumbuke,

awala iwoubama ugima wangu,

woyitsighwe kuchughu, awala iwobama kundagha.

5 Wawe ka mibangu ighulusighwa na libeho,

aku imalaika wa IMNDEWA kowawinga.

6 Inzila yawo iwe na chisi, na itelebuke,

aku imalaika wa IMNDEWA kowabalasa.

7 Mana waniteghela imitegho aku nene siwatendele chihile baye,

na wanihimbila lipondo aku nene siwatendele chihile baye.

8 Ukulaghighwa kuwatsile wawo kwa ukwidukitsa,

imitegho yawo iwonze wawo iwenyegho,

nawo waghwe mna lipondo alyo na wahupe ghendo.

9 Aho iloho yangu itsomsekelela IMNDEWA,

na nitsodeng'elela kwaapfila yeye kanikombola.

10 Lukuli lwangu lwose lutsolonga,

"Ghwe MNDEWA, nani iyali ka ghweghwe,

komkombola imunu mhingwa kulawa kwa imunu iyali na tsingupfu kumbita yeye,

Na komkombola imunu mhingwa na iyalihela ipfinu kulawa kwa imbapfi wawo."

11 Iwanu wehile wakwinuka,

wonighutsa pfinu nene sipfimanyile baye,

12 Woniliha ighehile kwa aghala ighanoghile ghaniwatendele,

mbaka nene nokala uchuwa.

13 Lekeni wawo hawang'ali woghula,

nene nipfala maghunila kulangusa usungu,

nidununza nimwenyegho kwa kufunga ukuja,

tsanilomba aku nyinamitsa litwi lyangu.

14 Nighendelela kudomboketsa kulonga nomlilila indughu yangu au isale yangu,

ninamila hasi kwa usungu ka apfila nomlilila mame wangu iyafile.

15 Lekeni nene hanikwalile, wawo wetingana hamwe waniseka,

wetingana wanilaghe, na nene matsali simanyile ghendo baye,

wang'ali wondagha bila ukuleka.

16 Ka iwanu ing'awompfuka Imulungu pfawobetsa,

pfipfo pfawanighudubukile.

17 Ghwe MNDEWA, utsolola mbaka tsuwachi?

Unikombole kulawa kwa maadui tsangu iwonitowa,

uukombole ugima wangu kulawa kwa iwanu awano iwali ka simba.

18 Nitsokulongela mighede mna ghumtingano mkulu,

nitsokutunya ghweghwe kuna iwanu wengi ng'ani.

19 Awala iwali aduwi tsangu hela waleke kunisimanga,

nawo iwonihila hela waleke ukuniseka.

20 Mana ng'awolonga mbulu tsa ukukala ghoya na wayao baye,

lekeni wowatungila ghamaghomba gha ughutsu awala iwokala tulu muisi.

21 Wakwasama imilomo yawo, nawo walonga, "Ona! Ona!

Tsinenge tsetu tsona ghendo."

22 Ghwe MNDEWA, ghweghwe kwona alino,

lelo uleke kwinyamala ghwe IMNDEWA,

leka kukala kutali na nene.

23 Lamka, Ghwe Imulungu wangu, na Mndewa wangu, unyamile,

24 Unihighe kwa kulola ihaki yako, Ghwe MNDEWA, Imulungu wangu,

Uleke kuwaleka waniseke.

25 Waleke kulonga mna imimoyo yawo, "Eee, Pfipfo pfatubamile!"

Au waleke kulonga, "Tummalitsa."

26 Wone chinyala, na waweghele ghendo,

awala wose iwosekelela ukughaya kwangu,

waghelighwe chinyala na waumbuke.

awala wose iwebona wakulu kubita nene,

27 Lekeni wadeng'elele na kutowa lukenze,

iwanu iwonoghelwa na ihaki yangu,

na matsuwa ghose walongeghe, "IMNDEWA yenulighwe,

iyonoghelwa na ukubweda kwa imtumighwa wake."

28 Na ilulimi lwangu lutsolonga tsimbuli tsa ihaki yako,

Na nitsokutunya misi yose.