1 Kuyonesa isi uluso wako, Ghwe MNDEWA,

kumuyitsila Yakobu ingekewa yake.

2 kuwaleghusila iwanu wako ghamatotso ghawo,

kutsighubika tsinzambi tsawo tsose.

3 Kuleka kuwaghudubukila keli,

kuhunduka na kuileka imaya yako ng'ulu.

4 Utuyitse, Ghwe Imulungu wa ukombotsi wetu,

na uleke kughendelela ukutughudubukila.

5 Pfihi kutsotughudubukila matsuwa ghose ing'aghohupa?

Angu imaya yako itsoghendelela mbaka mna ipfeleko pfose?

6 Pfihi, ng'ukuya baye utwing'e keli ugima,

ili iwanu wako wakudeng'elele ghweghwe?

7 Ghwe MNDEWA, utulanguse uluso wako ing'autsigha,

na utwing'e ukombotsi wako.

8 Nitsohulikitsa chochose chayatsolonga IMNDEWA, Imulungu,

kwaapfila katsolonga na iwanu wake mbuli tsa ukukala tseghamba,

na kuna iwanu wake iwotogholeka,

nawo waleke ukutenda keli pfinu pfa ubotsi.

9 Ona yeye kahabehi ghendo kuwakombola awala iwompfuka yeye,

na utunitso wake utsokala mna isi yetu.

10 Aho uluso wake mkulu na ukutogholeka kwake pfitsetingana,

baho ighanoghile na ukukala tseghamba pfakuwa chinu chimwe.

11 Ukutogholeka kutsakota muisi,

na ihaki itsosungulila kulawa kulanga.

12 Ona! IMNDEWA katsotwing'a ichinu ichinoghile,

na isi yetu itsomela pfijo pfingi.

13 Haki itsoghenda hambele hake,

nayo itsotengenetsa inzila ya ghamaghulu ghake.