1 Uhulike ghanilomba, Ghwe MNDEWA,

ichililo changu cha ukukulomba unyapfile chikupfikile.

2 Uleke kunipfisa uhanga wako mna litsuwa lya ukughaya kwangu,

uteghe lighutwi lyako,

hanikukema usumke unyidike.

3 Kwaapfila ghamatsuwa ghangu ghomala ka liyosi pfalighuluka,

na imipate yangu yakwaka kulonga tanuli.

4 Ghumoyo ghwangu ghulaghighwa na ghuholola kulonga mitsani,

mbaka nisemwa hata ukuja ichijo changu.

5 Nene noghutilila mbaka nisoka ng'ani,

6 Neghala na ichimulu wa kunyika,

na kama ichimulu yokala mna ghamahame.

7 Kuchilo nowasa meso,

kulonga chideghe mchuwa mchanya mwa ichiswili.

8 Misi yose aduwi tsangu woninanga,

awala iwonibetsa welaha litaghwa lyangu.

9 Kwapfila ndiya lipfu ka chijo, na nihanganya chanikung'wa na ghamasotsi,

10 kwa imaya yako na ukughudubuka kwako,

kwaapfila ghweghwe kunisola na kunyasa kutali.

11 Ghamatsuwa ghangu gheghala na ichimbeho cha nemihe,

nopfonda kulonga mitsani.

12 Lekeni ghweghwe, Ghwe MNDEWA, kokala mchighoda chako cha ufalume matsuwa ghose ing'aghohupa,

na ipfeleko pfose ipfikutsa pfitsokukumbuka

13 Ghwegwe ghumwenyegho kutsakwinuka uyonele libatsi Sayuni,

kwaapfila aghuno ghugho msimu ghwa ukwonesa libatsi lyako,

kwaapfila ghumsimu ighwikighwe ghupfika.

14 Kwa apfila iwatumighwa wako woghadeng'ela ghamabwe ghake,

na litimbwisi lyake wolising'inikila.

15 Iwanu wa tsiisi tsingi watsolipfuka litaghwa lya IMNDEWA,

na wafalume wose wa isi watsoupfuka utunitso wako,

16 IMNDEWA hayatsotsenga keli Sayuni,

na kulawila mna utunitso wake,

17 hayatsoghahulika ghamalombi gha imunu iyalihela chinu,

ng'atsoghabetsa baye ghamalombi agho.

18 Leka alino lyandikighwe mna ichitabu liwe lya ipfeleko ipfikutsa,

iwanu awala ing'awana waumbighwe watse wamtunye IMNDEWA,

19 kwaapfila kalolesa hasi kulawa hanu hake helile ako kulanga,

ona, kulawa kulanga IMNDEWA kailolesa isi,

20 yahulike iwohighwe pfawodomboketsa,

yawalekelele awala iwahighighwe ukufa.

21 Apfo iwanu watsolitangatsa litaghwa lya IMNDEWA ako Sayuni,

na utunitso wake umanyike ako Yerusalemu.

22 Aho iwanu wa tsiisi hawatsetingana hamwe,

na tsifalume tsitsetingana tsimtumikile IMNDEWA.

23 Katsihungutsa tsingupfu tsangu mnzila,

na ghamatsuwa ghangu pfipfila kaghahungutsa.

24 Apfo nene nolonga, "Ghwe Mlungu wangu,

uleke kunisola haning'ali msongolo,

imiyaka yako yolawa lweleko lumwe mbaka lweleko lungi."

25 Aho mwanduso ghweghwe yuyo yawikile imisingi ya isi,

naghwe kulumba kulanga kwa sang'ano tsa ghamoko ghako.

26 Apfo pfitsohupa, lekeni ghweghwe kutsoghendelela ukukala,

ona ghendo, apfo pfose pfitsolala kulonga magwanda,

naghwe kutsotsasa ka pfautsula lighwanda na kulyasa,

napfo pfitsohupa.

27 Lekeni ghweghwe kwa Yuyula,

na imiyaka yako ng'aitsohupa baye.

28 Iwana wa iwatumighwa wako watsokala wagima,

na iwatsakwelekighwa nawo watsakwing'ighwa ngupfu hambele hako.