1 Uwambe lighutwi lyako unitegheletse, Ghwe MNDEWA,

unyidike, kwaapfila nene namhingwa,

na imunu iyalihela chinu.

2 Uukinge ugima wangu,

kwaapfila nene na wa ukutogholeka kuna ghweghwe,

ghweghwe kwa Imulungu wangu,

lelo unikombole nene mtumighwa wako iyehuwila ghweghwe.

3 Unitendele uluso, Ghwe IMNDEWA,

kwaapfila nene nokulilila ghweghwe misi yose.

4 Unitende nene imtumighwa nideng'elele,

kwaapfila noghenula kuna ghweghwe aghala ghanilomba kwa iloho yangu.

5 Kwaapfila ghweghwe IMNDEWA kunogha,

na koleghusa tsinzambi,

na kumema uluso mkuu kwa awala iwokukema ghweghwe.

6 Hulikitsa chanilomba, Ghwe MNDEWA,

utegheletse apfila pfanikulomba kwa ukulila.

7 Mna litsuwa lya ukughanzika kwangu nitsokukema ghweghwe,

kwaaapfila ghweghwe kutsonyidika.

8 Mna imilungu yose kuduhu hata mulungu yumwe iyali ka ghweghwe, Ghwe IMNNDEWA,

na kuduhu iyodaha kutenda ighali makulu ka ghautendile ghweghwe.

9 Iwanu wose iwali mna tsiisi yuwaumbile watsokutsila,

nawo watsokwinamila hambele hako,

ghwe IMNDEWA, nawo watsolitunya litaghwa lyako.

10 Kwaapfila ghweghwe kwamkulu ng'ani,

naghwe kotenda ipfinu pfa ukukangawatsa,

ghweghwe uliyeka yuyo Imulungu.

11 Unifunze inzila yako, ghwe IMNDEWA,

na nene nitsoghenda mna inzila yako ilongesa.

12 Nitsokutunya ghweghwe, ghwe IMNDEWA, Imulungu wangu,

kwa ghumoyo ghwangu ghose,

na nitsolitunya litaghwa lyako matsuwa ghose ing'aghomala.

13 Uluso wako mkulu ng'ani kuna nene,

kunikombola kulawa hasi kutsimu.

14 Ghwe Imulungu, iwanu iwana ichidandali wanyinukila,

kingili lya iwanu walihela libatsi wobama wanikome,

wawo ng'awokupfikitsa ghweghwe baye.

15 Lekeni Ghwe MNDEWA, kwa Imulungu yuna libatsi na uluso,

ng'ukona maya hima baye,

ghweghwe kwamluso na kotogholeka.

16 Hunduka, umbonele libatsi,

umwing'e tsingupfu tsako imtumighwa wako,

na umkombole imwana wa mtumighwa wako pinga.

17 Umbonese ichitango ka ghweghwe kunogha,

awala iwonyihila wachone na wone chinyala,

kwaapfila ghweghwe, Ghwe MNDEWA, kunyapfila, na kunikanza.