1 IMNDEWA yuyo ghumwanga ghwangu na ukombotsi wangu,

lelo nene yanitsompfuka nani?

IMNDEWA yuyo ingome ya ugima wangu,

lelo nene yanitsamwonela wogha nani?

2 Iwotenda ghehile hawanitsile habehi,

wandiye inyama yangu,

awo iwehile wangu na aduwi tsangu wekwala waghwa.

3 Hata maasikali wengi wang'anitsunguluka wetowe na nene,

ghumoyo ghwangu ng'aghutsopfuka baye,

hata ng'ondo ing'anilawila,

nene sitsoleka baye ukwihuwila Imulungu.

4 Chinu chimwe nimlomba IMNDEWA,

nacho chicho chanitsobama,

nene nikale mna ing'anda ya IMNDEWA matsuwa ghose gha ugima wangu,

nilolese ukunogha kwa IMNDEWA,

na ukumbama yeye mna ing'anda ya Imulungu.

5 Kwaapfila mna litsuwa lya maghayo katsonikinga niwe mgima mghati mwa ing'anda yake,

katsonipfisa mna ichimbeho cha lihema lyake,

na katsonyinula mchanya mwa libambalawe.

6 Kuya litwi lyangu litsakwinulighwa mchanya,

na nitsowalola kwa ukuwatambila aduwi tsangu iwonitsunguluka,

na nene nitsomlapfila IMNDEWA tsinambiko kwa ukudeng'elela,

nitsakwimba, na kumdeng'elela IMNDEWA.

7 Ghwe MNDEWA, uhulikitse litsi lyangu hanikukema,

naghwe umbonele libatsi na unyidike.

8 Ghumoyo ghwangu ghonongela apfino,

"Uubame uhanga wake."

apfo ghwe MNDEWA, nene nitsoubama uhanga wako.

9 Uleke kunipfisa uhanga wako,

uleke kughudubuka na kundema nene imtumighwa wako,

ghweghwe yuyo yunyapfila,

uleke kunileka, wala kunyasa,

Ghwe Imulungu wa ukombotsi wangu.

10 Aba wangu na mai wangu wang'anileka,

IMNDEWA katsonibokela.

11 Ghwe MNDEWA, unifunde inzila yako,

na unilongotse mna inzila igholoke, kwaapfila ninawo maaduwi wengi.

12 Uleke kunileka maadui tsangu wanitende ka pfawobama,

kwaapfila wakalangama wa ughutsu wanyinukila,

nawo wobama kunendela ughobo.

13 Nene notoghola ghendo ka nitsakona ukunogha kwa IMNDEWA,

mna isi ya iwali wagima.

14 Umbete IMNDEWA,

uwe na ngupfu, na ghumoyo ghwako ghugangamale,

Ona, umbete IMNDEWA.