1 Ghwe Imulungu, mwing'e mfalume ghamalamtsi ghako,

na umfunde imwana wa mfalume yahigheghe ghoya.

2 Yeye katsowalamla ghoya iwanu wako,

awala iwahingwa iwonelighwe ghendo.

3 Ipfidunda pfikulu pfitsowaghalila iwanu ukubweda,

na ipfidunda pfidodo pfitsakonesa ihaki yako.

4 Katsowamila iwahingwa iwokala mna iwanu,

katsowakombola iwana wa iwanu mbughilambughila,

na katsomhondahonda chila imunu iyowalagha.

5 Iwanu watsokupfuka matsuwa ghose ka pfalikwalika litsuwa mna ghamatsuwa ghose,

na ka ghumwetsi pfaghulangatsa mna ipfeleko pfose.

6 Katsohulumka kama mvula itowela imitsani ighudighwe,

ka mawagha gha imvula igholaghala mchanya mwa isi.

7 Iwanu watende ighali ghahaki mna ghamatsuwa ghake,

na iwanu watsobweda ng'ani mbaka ghumwetsi haghutsotsigha.

8 Yatawale kulawa bahali mbaka bahali,

na kulawa kuna ghumto mbaka kwaitsighila isi.

9 Ghamakabila ighokala kuna inyika watsomwinamila,

na maaduwi tsake watsolambita litimbwisi.

10 Wafalume wa Tarishishi na ipfisiwa watsomliha kodi,

iwafalume wa Sheba na Seba watsomghalila tsinzawadi.

11 Nawo wafalume wose watsomwinamila,

na iwanu iwali mna tsiisi tsose watsomsang'anila.

12 Kwaapfila katsomkombola imunu mhingwa iyomlilila,

na imunu iyonelighwe iyalihela wa ukumwapfila.

13 Katsowonela libatsi iwanu nyondenyonde na iwalihela chinu,

na katsoukombola ugima wa iwanu iwoghanzika.

14 Katsowakombola kulawa kuna ukwonelighwa na ukutendighwa pfihile,

kwaapfila idamu yawo ina bei ng'ulu hambele ha ichihanga chake.

15 Mfalume yakale matsuwa mengi,

na yabokele inzahabu kulawa Sheba,

na iwanu wamlombele kwa Imulungu matsuwa ghose.

iwanu wamtunyeghe yeye misi yose.

16 Nakuwe na pfijo pfingi muisi, pfimele mpfidando mwa ipfidunda,

Ghamatunda ghake ghawe kama Lebanoni,

na iwanu wenele mna ghumji kama pfaikwenela imitsani ya isi.

17 Litaghwa lyake nalikale matsuwa ghose,

lighendelele kukala mna ghamatsuwa ghose halikwalika litsuwa,

na iwanu wa tsiisi tsose watsobweda kubitila yeye,

nawo watsomkema mbalikighwa.

18 Yatunyighwe IMNDEWA Imulungu, Imulungu wa Isiraeli;

yeye yaliyeka iyotenda ipfinu pfa ukukangawatsa.

19 Na litunyighwe litaghwa lyake kulu matsuwa ghose,

na utunitso wake umeme mna isi yose,

Ona pfipfo, pfipfo ghendo.

20 Ghamalombi gha Daudi mwana wa Yese ghamalila ahano.