1 IMNDEWA kamkulu, na yuyo iyobamighwa kutunyighwa ng'ani

mna ghumji ghwa Imulungu wetu, mna chidunda chake ichelile.

2 Ichidunda cha Sayuni chinogha ghendo kwa utali wake

ghugho ghumji ghwa mfalume mkulu,

iwanu wose wali muisi woghudeng'elela

nacho cheghala ghendo na ipfidunda pfa Safoni.

3 Imulungu kamghati mwa tsingome tsake,

ketenda mwenyegho yamanyike ka yeye yuyo wa ukumtsumila.

4 Kwaapfila wafalume tsawetingana,

waghenda hamwe kughutowa ghumji agho,

5 Lekeni hawaghonile ghumij, wakangawala,

6 Baho wengilighwa na chidedemo,

na wona usungu kulonga ipinga iyakweleka,

7 kuwabenabena ka tsimeli ng'ulu tsa Tarishishi,

pfatsibenighwa na inyahemu ya mashaliki.

8 Ka apfila pfatuhulike, pfipfo pfatwonile,

kuna ghumji ghwa IMNDEWA, yana tsingupfu tsose,

ona, kuna ghumji ghwa Imulungu wetu.

Imulungu katsoghwika ghwime matsuwa ghose.

9 Ghwe Imulungu, mghati mwa ing'anda yako,

tutongelela apfila ghweghwe pfauli na uluso mkulu.

10 Kama pfalili litaghwa lyako, Ghwe Imulungu,

pfipfo na ukutunyighwa kwako kupfika mbaka kwaitsighile isi yose,

ghumoko ghwako ghwa kujilo ghumema ihaki.

11 Ichidunda cha Sayuni chitsodeng'elela,

iwanu wa Yuda watsodeng'a, kwa ghamalamtsi ghako.

12 Mwange mghati mwa Sayuni,

na mghutsunguluke ghumji, mpete iminala yake,

13 mghapfikitse mmoyo ghamaboma ghake,

mwange mtsilole tsingome tsake,

mtse mdahe kuwapetela ilweleko ilukutsa.

14 Mana Imulungu ayuno yuyo Imulungu wetu matsuwa ghose,

Yeye yuyo yatsotulongotsa mbaka hatutsakufa.