1 Unihulikitse ukulomba kwangu, Ghwe MNDEWA,

wala uleke kubetsa chanikulomba.

2 Unihulikitse na unyidike,

nene nyipfa ukulila na ukusing'inika,

3 kwaapfila maaduwi tsangu wonitenda nipfuke,

nobunzighwa na wanu wehile,

mana wawo iwanu wehile wongalila ghamaghayo,

wonighudubukila na wonyihila.

4 Ghumoyo ghwangu ghumema usungu,

na nene ningilighwa na wogha wa ukufa

5 Wogha na ukudedema kunitsila,

ichidedemo chinikumba.

6 Mbaka nilonga, "Ning'awile na mabawa ka njiwa,

ning'aghuluke ng'ende kutali nikabwihile.

7 Ning'aghendile kutali,

nikakale kunyika.

8 Ning'asumke ng'ende hanu ha ukwipfisa,

ng'ale kutali na inyahemu na libeho iliduma."

9 Ghwe MNDEWA, upfulughe chawolonga,

kwaapfila mbona pfulughu na litsogho mna ghumji.

10 Misi na chilo pfotsunguluka mna imibanda ya ghumji.

pfoghala ighehile na maghayo mghati mwake.

11 Ukuhinyika kwa mghati mwa ghumji,

tsuluma na ughutsu pfimema mna tsinzila tsake.

wala ng'apflawa baye,

12 Ka aduwi yangu yuyo iyandighile,

nene ning'adudumile,

ka iyonyihila yuyo iyanyinukile yanitowe,

nene ning'epfisile yaleke kumbona.

13 Lekeni kumbe ghweghwe ghendo uli miyangu,

mbwigha wangu ghendo na yatwimanyile ng'ani.

14 Yatung'ali tukala hamwe na kulonga ghoya,

na tung'ali twilongotsa na ghumtingano kughenda kuna ing'anda ya Imulungu.

15 Ukufa kuwatsile kwa ukwidukitsa,

na wahulumkile kutsimu wang'ali wagima,

kwaapfila ighehile ghammakaye mwawo na mna wawo.

16 Lekeni nene nitsomkema Imulungu,

naye IMNDEWA katsonikombola.

17 Nemihe, nemitondo, na nemisi nitsololoma kwa usungu,

naye katsohulika litsi lyangu.

18 Yeye katsoukombola ghendo ugima wangu

hata ka maaduwi tsangu iwetowa na nene wawengi.

19 Imulungu iyotawala matsuwa ghose ing'aghohupa,

yeye ing'ayoghalambuka,

katsohulika na katsowadununza maaduwi tsangu,

kwaapfila ng'awompfuka Imulungu baye.

20 Kagholosa ghamoko ghake, yawatowe sale tsake,

kaleka kulikinda lilaghano lyake.

21 Ghayalongile kwa ghumlomo ghwake ghotelebuka kulonga siagi,

lekeni mmoyo mwake tsamna ng'ondo,

ghamalonga ghake ghotelebuka kubita ghamapfuta,

lekeni ghotema ka lipanga litemesa.

22 Mtwike IMNDEWA ghumtsigho ghwako, naye katsokwapfila,

yeye ng'atsomleka baye yana ihaki yaghwe.

23 Lekeni ghweghwe, Ghwe Imulungu,

kutsowahulumsa mbaka kuna lipondo lya lifwa.

iwanu awo iwomwagha tsidamu na iwaghutsu,

ng'awatsodaha kukala wagima kwa nusu ya ghamatsuwa ghawo.

lekeni nene, nitsehuwila ghweghwe.