1 Nikutsumila ghweghwe, Ghwe MNDEWA,

leka kundeka mbone chinyala.

2 Unihonetse na unikombole kwaapfila ghweghwe kotenda ighali gha haki.

uwambe lighutwi lyako unihulikitse, na unikombole.

3 Ghweghwe uwe bambalawe lyangu lya ukutsumila,

nene nitsumilileghe baho niwe mgima,

ghweghwe kulapfa laghitso nene nikombolighwe,

kwaapfila ghweghwe kwa bambalawe lyangu na ingome yangu.

4 Ghwe Imulungu wangu, nikombole kulawa kuna ghamoko gha iwehile,

na kulawa kuna ghamoko gha iwotenda ighehile na iwanu iwakatili.

5 Kwaapfila nene nehuwila ghweghwe IMNDEWA Imulungu,

nene nikulolela ghweghwe tangia usongolo wangu.

6 Nikwaghamila ghweghwe tangia hanyoneke,

ghweghwe yuyo yunilapfile kulawa munda mwa mamo wangu,

nene nitsokutunya ghweghwe matsuwa ghose.

7 Nene nakwoneka chihulo kwa iwanu wengi,

lekeni nene nokutsumila ghweghwe yuli na ngupfu.

8 Ghumlomo ghwangu ghumema mbuli tsa kukutunya ghweghwe,

na nitsoutangatsa utunitso wako misi yose.

9 Uleke kunyasa hanilala,

uleke kundeka tsingupfu tsangu hatsihunguka.

10 Kwaapfila maaduwi tsangu wonideta,

na awala iwoupfisila ugima wangu welongela hamwe,

11 wolonga, "Imulungu kamleka, muwinzeni mumghoghe,

kwaapfila kuduhu munu wa kumkombola."

12 Ghwe Imulungu, uleke kukala kutali na nene,

ghwe Imulungu wangu, usumke utse unyapfile.

13 Awala iwonibangitsila hela wahupe, na wone chinyala,

awala iwobama ukunilagha wahumbuke.

14 Lekeni nene nitsoghendelela ukukubeta ghweghwe,

na nitsakongetsa keli na keli ukukutunya ghweghwe.

15 Ghumlomo ghwangu ghutsosima ghamatendo gha ihaki yako,

ghutsosima ukombotsi wako misi yose,

kwaapfila mengi kubita pfatsimanya tsimbutsi tsangu.

16 Nitsakutsa nighalonge aghala makulu ghautendile, Ghwe IMNDEWA Imulungu,

nitsolonga ka ghweghwe yuliyeka yuyo yutenda ighali gha haki.

17 Ghwe Imulungu, kunifunda nene tangiya usongolo wangu,

na mbaka leloli nene noghalonga ghamatendo ghako ighokangawatsa.

18 Hata ning'awa mnzehe yana tsimvi,

ghwe Imulungu, uleke kundeka,

mbaka nitangatse tsingupfu tsako,

na ukudaha kwako kuna ipfeleko ipfikutsa.

19 Aghala ghahaki ghautendile ghopfika kuchanya kulanga,

ghweghwe kutenda ipfinu pfikulu ghendo.

ghwe Imulungu, angu nani iyali kama ghweghwe?

20 Hata ka kunitenda mbone maghayo na madununziko mengi,

lekeni kutsombuyitsila ugima wangu,

na kutsonighelusa keli kulawa kuhisi ghendo.

21 Lelo unyongetsele ukulu wangu,

uye unikanze ghumoyo.

22 Na nene nitsokutunya kwa kutowa ichinanda,

kwaapfila ghweghwe Imulungu wangu kotogholeka.

nitsokwimbila ghweghwe kwa kutowa ichinubi,

ghweghwe yuliyeka welile mna Isiraeli.

23 Imilomo yangu itsakwimba kwa kusekelela,

hanikwimba nikutunye ghweghwe,

nene ghendo ayula yunikombole.

24 Ilulimi lwangu lutsolonga misi ngima aghala gha haki ghautendile,

kwa apfila awala iwabamile ukundagha wahumbuka na wona chinyala.