1 IMNDEWA yatunyighwe!

Nitsolonga mighede kwa IMNDEWA kwa ghumoyo ghwangu ghwose,

mna libalatsa na mna ghumtingano ghwa iwanu iwompfuka Imulungu.

2 Ghayotenda IMNDEWA makulu ng'ani,

wose iwoghadeng'elela woghapfikitsa.

3 Isang'ano yake imema iheshima na ifahali,

na ihaki yake yokala matsuwa ghose ing'aghohupa.

4 Kaghatenda ghamatendo ghake gha ukukangawatsa ghakumbukighwe,

IMNDEWA kamema uluso na libatsi.

5 Yeye koweng'a ichijo awala iwompfuka,

na kolikumbuka lilaghano lyake matsuwa ghose ing'aghohupa.

6 Kawalangusa iwanu wake uwetso wa tsisang'ano tsake,

ahala hayaweng'ile isi tsa wanu wangi.

7 Ghose ghayotenda kwa ghamoko ghake gholongesa na gha haki,

ghamalaghitso ghake ghose gha ukutogholeka.

8 Nagho ghema ghoya ghendo kwa matsuwa ghose ing'aghohupa,

ghatendighwa kwa kutogholeka na kwa kugholoka.

9 Kawaghalila ukombotsi iwanu wake,

kalaghitsa lilaghano lyake liwe lya matsuwa ghose ing'aghohupa,

litaghwa lyake lyela na lya ukupfukighwa.

10 Ukumpfuka IMNDEWA ghugho ghumwanduso ghwa ihekima,

wose iwokinda ghamalaghitso ghake wakengela.

utunitso wake wokala matsuwa ghose ing'aghohupa.