1 Imulungu, IMNDEWA Imulungu, kalonga, na kawakema iwanu wali muisi,

kwanzila halilawila litsuwa mbaka halikuswela.

2 Kulawa Sayuni, hanu hake ihanoghile ng'ani,

Imulungu kolawa kolangatsa.

3 Imulungu wetu kakutsa na ng'akutsa chinyele nyele baye,

ghumoto ighulambita ghomlongolela,

na inyahemu yomtsunguluka chila ubali.

4 Kokema kulanga kuli kuchanya,

na kokema muisi, yawahighe iwanu wake.

5 Kolonga, "Nikemeleni hamwe iwanu wangu iwotogholeka,

iwekile laghano na nene kwa ukulapfa tsinambiko."

6 Na kulanga kutangatsa apfila yeye pfayali wa ihaki,

kwaapfila Imulungu imwenyegho yuyo mlamtsi,

7 "Hulikeni, mwemwe muwanu wangu,

na nene nitsolonga, ghwe Isiraeli,

na nitsakuwa mkalangama kwa ighehile ghamtendile,

nene yuyo Imulungu, Imulungu wenu.

8 Sikukembela baye kwa tsinambiko tsako,

na sikukembela baye kwa tsinambiko tsako tsa ukulakatsighwa itsili hambele hangu.

9 Sibama ng'ombe mmale baye kulawa mkaye yako,

wala mene kulawa mna ipfikwama pfako,

10 kwa apfila chila mnyama wa kumuhulo wangu nene,

hata na wang'ombe iwali mna ipfidunda elufu imwe wose wangu nene.

11 Nommanya ghendo chila chideghe wa mpfidunda,

na pfiumbe wose iwali mmighunda wose wangu nene.

12 Ka ning'awile na nzala tsasimlongelani mwemwe baye,

kwaapfila isi yose yangu nene, na pfose ipfili mumo pfangu nene.

13 Pfihi nene nakuja nyama ya ng'ombe mmale?

Au nene nakunwa idamu ya imene yamnilapfila?

14 Mlapfile Imulungu nambiko tsa mighede,

na ulihe tsinatsili tsako kwa yeye Iyali kuchanya ng'ani.

15 Unikeme nene mna ghamatsuwa gha ukughaya,

nene nitsokukombola na ghweghwe kutsonitunya."

16 Lekeni kwa imunu yehile, Imulungu kolonga apfino,

angu ghweghwe una choni mbaka ughakekeme keme ghamalaghitso ghangu?

Apfi ghweghwe una choni mbaka ulilonge longe lilaghano lyangu umlomo mwako?

17 Kwaapfila ghweghwe kulema ukwing'ighwa ghamahala ghangu,

na kughasa kuchisogho ghamalonga ghangu.

18 Haumwonile imhitsi ghweghwe kwilongotsa naye,

naghwe kuwa chinu chimwe na iwaghoni.

19 Kughuleka ghumlomo gwako ghulonge ighehile,

na ilulimi lwako lolonga ughutsu.

20 Kukala hasi komdeta ndughu yako,

na imwana wa mamo wako kumbangitsila hela.

21 Haung'ali kotenda aghano, na nene ninyamala tulu ghendo,

naghwe kupfikitsa ka nene nighala na ghweghwe.

Lekeni lelo nene nitsokukembela,

na ghose nogheka mwatsi aku kolola kwa tsinenge tsako.

22 Lelo tangeni alino, mwemwe yamumsemwa Imulungu,

hela nitsowadeghadegha,

na ng'ahatsakuwa na munu wowose iyodaha kuwakombola baye.

23 Ayula iyolapfa tsinambiko tsa mighede yuyo iyonitunya nene,

na ayula iyokala bila ukutenda ghehile, nene nitsomlangusa ukombotsi wa Imulungu.