1 Twolonga mighede, Ghwe Imulungu,

twolonga mighede kwa litaghwa lyako pfalili habehi,

iwanu wosimulila aghala ighokangangawatsa ghautendile.

2 Ghweghwe kulonga, "Nene nina matsuwa ghanyikile,

na mna ghamatsuwa agho nene nitsohigha ghoya.

3 Isi haighisika na chila chinu ichikala amwo ching'ahighisika,

nene yuyo yanitsotsikindilisa tsingutso tsake.

4 Nowalongela iwanu iweghoda waleke ukwighoda,

na awala iwehile nowalongela waleke kutamba.

5 Mleke kuwa na chidandali,

wala mleke kulonga kwa ukwighoda"

6 Kuduhu munu iyolawa mashaliki, wala maghalibi,

wala kunyika iyakutsa kumwinula imunu.

7 Lekeni Imulungu yuyo iyohigha,

komhulumsa ayuno, na komwinula ayuno.

8 Mana mna ghumoko ghwa IMNDEWA mna ichikombe ichimemile idipfai ya imaya yake,

yohefuka lihopfu, na ihanganyighwa na ipfikoletso,

naye koimwagha, na iwanu iwehile iwali muisi mwose woinwa

mbaka yomala.

9 Lekeni nene nitsotangatsa ghamatendo ghake matsuwa ghose ing'aghomala,

nene nitsomtunya kwa ukwimwimbila Imulungu wa Yakobu.

10 Na tsimembe tsose tsa iwanu wehile nitsotsikana,

lekeni tsimembe tsa iwanu wana ihaki tsitsakwinulighwa mchanya.