1 Ghwe MNDEWA, Imulungu wa ukombotsi wangu,

misi na chilo nikemelela hambele hako.

2 Ukulomba kwangu kupfike hambele hako,

uwambe lighutwi lyako unihulikitse ichililo changu.

3 Mana ghumoyo ghwangu ghwipfa na ghamaghayo,

nene nahabehi na ukufa.

4 Nipetighwa hamwe na iwanu iwohulumkila kuna lipondo,

niwa ka imunu iyali hela wa ukumwapfila.

5 Nisemwighwa hamwe na iwafile,

kulonga awala iwachinjighwe iwali mna likabuli,

ing'uwakumbuka keli baye,

iwabaghulighwe wakale kutali ghendo na ghumoko ghwako.

6 Ghweghwe kunyika hasi ghendo ha lipondo,

hanu ihaghendese na hana ichisi.

7 Imaya yako iwa mtsigho mtsito kuna nene,

naghwe kunighubikitsa na ghamawimbi ghako ghose.

8 Kuwatenda mbwigha tsangu wakale kutali na nene,

na kunitenda nyoneke nowadesa,

nihindighwa mghati,

wala sidaha baye kupulusuka.

9 Inenge yangu ipfonda kwa apfila pfanighanzika,

nikukema ghweghwe chila tsuwa,

Ghwe MNDEWA, nene nikugholosela ghamoko ghangu.

10 Angu, pfihi ipfihulo kutsowatendela iwanu iwafile?

Au, awo iwafile watsakwinuka wakutunye ghweghwe?

11 Pfihi uluso wa lilaghano lyako utsolongighwa kuna likabuli?

Au ukutogholeka kwako kutsolongighwa kuna ukuhunyika?

12 Pfihulo pfako pfitsomanyika mna ichisi?

Ighanoghile ghako ghatsomanyika kuna isi isemwighwe?

13 Lekeni nene nokulilila unyapfile, Ghwe MNDEWA,

chila mitondo nakutsa hambele hako kukulomba.

14 Hebali unyasa, ghwe MNDEWA?

Na hebali unipfisa ichihanga chako?

15 Nene kulawa usongolo wangu nighanzika ghendo habehi na ukufwa,

kwa ipfinu pfako pfinitenda nipfuke,

nene nitenyuka ghendo.

16 Kunighudubukila ng'ani,

na ipfinu pfako pfinitenda nipfuke, na pfinihinya ghendo,

17 pfinitsunguluka kulonga matsi ighamemile,

pfinitsingila chila hanu.

18 Ghweghwe kuwatenda mbwigha tsangu na wayangu wakale kutali na nene,

na sambi ichisi chiwa sale yangu.