1 Mumtunye IMNDEWA!

Mumtunye IMNDEWA kulawa kulanga,

mumtunye ako kuna ipfidanando.

2 Mumtunye mwemwe wamalika wake wose,

mumtunye mwemwe maasikali wake wose.

3 Mumtunye mwemwe litsuwa na ghumwetsi,

mumtunye mwemwe tsinondo tsose itsimeletseka.

4 Mumtunye mwemwe lilanga lya kuchanya,

mumtunye ghamatsi ighali kulanga.

5 Pfose pfilitunye litaghwa lya IMNDEWA,

kwaapfila yeye tsakalaghitsa na pfose pfitendeka.

6 Yeye tsakapfika hanu hake matsuwa ghose ing'aghomala,

tsakalapfa malaghitso ing'aghoghaluka baye.

7 Mtunyeni IMNDEWA kulawa kuna tsiisi tsose,

mwemwe ghamatsoka gha ibahali na ghamatsi ghaghendese hasi, mumtunye.

8 Mumtunye mwemwe ghumoto, imvula ya ghamabwe na ibalafu,

na inyahemu ikinda ghamalaghitso ghake,

9 mumtunye mwemwe ipfidunda na ipfidunda pfidopfido,

Imibiki ya ghamatunda na imikataluba,

10 mumtunye mwemwe wanyama wa kwibagho na iwodimighwa,

wapfiumbe iwotambala na wapfideghe wose,

11 mtunyeni mwemwe wafalume na iwanu wa isi wose,

wapfilongotsi na wose iwotawala isi,

12 mumtunye mwemwe iwasongolo na iwali,

iwanzehe wose na iwana.

13 Wose walitunye litaghwa lya IMNDEWA,

kwaapfila taghwa lyake kulu kubita mataghwa ghose,

na utunitso wake mkulu kubita lilanga na isi.

14 Kaweng'a tsingupfu iwanu wake,

apfo iwanu wose womtunya yeye,

iwanu wa Isiraeli iyowakunda.

Mtunyeni IMNDEWA.