1 Ghumoyo ghwangu ghombeta Imulungu yaliyeka,

ukombotsi wangu wolawa kuna yeye.

2 Yeye yaliyeka yuyo yali libambalawe lyangu, na ukombotsi wangu,

na ingome yangu, sitsohighisika ghendo baye.

3 Angu mtsonitowa nene mbaka tsuwachi?

Mbaka tsuwachi mwemwe mwobama kunikoma,

nene yanili ka ubanda winamile hasi, na ka ubanda ubama kubomoka?

4 Wapanga ghendo kunighwisa hasi, kulawa hanu hangu hanoghile,

wawo wodeng'ela ung'enye, na wobariki kwa imilomo yawo,

lekeni mghati mwa imimoyo yawo wolighita.

5 Ghumoyo ghwangu ghombeta Imulungu yaliyeka,

mana nene nehuwila kuna yeye.

6 Yeye yaliyeka yuyo yali bambalawe lyangu,

na ukombotsi wangu, na ingome yangu, sitsohighisika baye.

7 Ukombotsi wangu na iheshima yangu ya kuna Imulungu,

Libambalawe lya tsingupfu tsangu,

Likimbililo lyangu lyakuna Imulungu.

8 Mwihuwile yeye matsuwa ghose, mwemwe iwanu wose,

ghaghubuleni ighali mna imimoyo yenu hambele hake,

Imulungu yuyo yali kimbililo lyetu.

9 Iwanu weghala ghendo na imuhe,

wose, iwakulu kwa wadodo, si wakwihuwila baye,

ung'awalinga mna iminzani wose wabewe,

wabewe ghendo kubita imuhe.

10 Mleke kwihuwila ukutsulumu wala ukwighodela tsimali tsa ukuboka,

tsimali tsing'ongetseka uleke kutsitongelela mna ghumoyo ghwako.

11 Imlungu kalonga mala lumwe,

na aghano nighahulika mala mbili,

kuwa tsingupfu tsakwake yeye Imulungu,

12 na uluso wakuna ghweghwe, ghwe Imulungu,

mana ghweghwe, ghwe Imulungu,

komliha chila munu kwa ukulola isang'ano yake iyatendile.