1 Unikombole, ghwe Imulungu,

kwaapfila ghamatsi ghanipfika msingo.

2 Nitsama mghati mwa likododo ilighendese,

na haduhu hanu ha ukwika ghumghulu,

nipfika hana ghamatsi ighaghendese ghendo,

ghamatsi ighamemile ghunikukulusa.

3 Nene nyipfa ghendo wa ukukulila,

mbaka ilumelo lwangu lunyala.

Tsinenge tsangu tsiyauka ghendo,

kwa ukumbeta Imulungu wangu.

4 Awala iwonyihila hela wawengi kubita tsimvili tsa litwi lyangu,

wana ngupfu sideke awo iwobama kunidumla,

nawo wonighutsukila hela.

woninanahitsa mbuyitse ichinu sichisolile baye.

5 Ghwe Imulungu, ghweghwe koumanya ubotsi wangu,

na ghamatotso ghangu ng'aghapfisike baye kuna ghweghwe.

6 Leka kundeka niwaghele chinyala awala iwokubeta ghweghwe,

Ghwe IMNDEWA yuna ingupfu,

Awala iwokubama ghweghwe waleke kubetsighwa,

kwaajili yangu nene Ghwe Imulungu wa Isiraeli.

7 Kwaapfila nene nolighighwa kwa ajili yako ghweghwe,

ichinyala chighubika uhanga wangu.

8 Nene namgheni kwa ndughu tsangu,

na mgheni ghendo hata kwa iwana wa mamo wangu.

9 Igele ya ukuikunda ing'anda yako yonilakatsa mghati,

na ghamaligho ghawokuligha ghweghwe ghanighwila nene.

10 Hanililile na kufunga ukuja,

wawo wanibetsa.

11 hanipfalile lighunila nilile,

wawo waniseka.

12 Awala iwokala hana lilango wonideta,

awala iwapatike imbwali wonyimbila wila.

13 Lekeni nene nokulomba ghweghwe, Ghwe MNDEWA,

nitogholele achila chanilomba mna ghumda ghwaubama, Ghwe Imulungu,

unyidike kwaapfila ghweghwe kuna uluso mkulu,

kwaapfila ukombotsi wako wotogholeka.

14 Unikombole kwa kunilapfa mna likododo,

na uleke kunileka nitsame,

nikombolighwe na awala iwonyihila,

na ndawe mna ghamatsi ighaghendese hasi.

15 Leka kundeka ghamatsi ighamemile ghanikululuse,

wala uleke kundeka ghamatsi ghaghendese hasi ghanimetse,

wala uleke kundeka lipondo lifumbe ghumlomo ghwake mchanya mwa litwi lyangu.

16 Unyidike, Ghwe MNDEWA,

kwaapfila ghweghwe uluso wako unogha,

uhunduke kuna nene kwaapfila ghweghwe kuna batsi kulu.

17 Wala uleke kunipfisa ichihanga chako nene inili imtumighwa wako,

unyidike sambi baha kwaapfila nene noghaya.

18 Utsnitsile habehi, unikombole,

unikombole kwaapfila maaduwi tsangu wawengi,

19 Ghweghwe komanya apfila pfanilighighwa,

komanya pfanipata chinyala na pfanihumbulighwa,

Aduwi tsangu wose ghweghwe kuwamanya.

20 Ghamaligho ghanibena ghumoyo ghwangu,

mbaka nitenyuka ghendo,

ndolela yatse munu wa kumbonela libatsi, lekeni haduhu,

ndolela yatse munu wa ukunikanza, lekeni sonile munu baye.

21 Wanyikila sumu mna ichijo changu,

na haniwile na ing'ilu wawo wangaya isiki ning'we.

22 Imetsa ya pfijo ikighwe hambele hawo iwe mtegho kuna wawo,

na iwe mwambi hata kwa sale tsawo.

23 Tsinenge tsawo tsiwe na chisi waleke kwona,

na ipfighudi pfawo pfighudemi matsuwa ghose.

24 Uwamwaghile ukali wa ukughudubuka kwako,

na ghumoto ighukwaka ghwa imaya yako ghuwalambite.

25 Tsindalo tsawo tsiwe na ukiwa,

kuleke kuwa na munu wowose iyokala mna ghamahema ghawo.

26 Mana awala wauwatowile ghweghwe wawo woweng'a maghayo,

Na wowalongalonga awala wauwalaghile ghweghwe.

27 Uwongetsele ighehile mna ighehile ghawo,

na uleke kuwaleka wengile mna ihaki yako.

28 Na wafutighwe ghendo mna ichitabu cha ugima,

na waleke kwandikigwa hamwe na iwanu wana ihaki.

29 Lekeni nene namna ghamaghayo na ukulumwa,

ghwe Imulungu unnikombole na unyinule.

30 Nitsolitunya litaghwa lya Imulungu kwa ukwimba wila,

na nitsomtunya kwa ukumlongela mighede.

31 Na alyo litsakuwa linogha kwa IMNDEWA kubita ukumlapfila ng'ombe,

au ukumlapfila indama yana tsimembe na tsikwato.

32 Iwanu wahole watsakona agho na watsodeng'elela.

mwemwe yamumbama Imulungu imimoyo yenu na ikale na ugima.

33 Mana IMNDEWA kowahulikitsa iwahingwa,

na iwanu wake wohighwe ng'owatsowabetsa baye.

34 Lilanga na isi na pfimtunye,

na tsibahali na chila chinu ichighenda mghati mwawo.

35 Mana Imulungu katsoikombola Sayuni,

na katsoitsenga keli imiji ya Yuda,

na iwanu watsokala amwo na itsakuwa yawo.

36 Na iwana iwelekighwa wa iwatumighwa wake watsoihala,

na awala iwolikunda litaghwa lyake watsokala mghati mwake.