1 Mlongeleni IMNDEWA mighede, mlikeme litaghwa lyake,

muwapetele iwanu waghamanye ghamatendo ghake.

2 Mwimbileni yeye, mmwimbile tsiwila tsa kumtunya,

mghalonge ghamatendo ghake ghose gha ukukangawatsa.

3 Mwighodele litaghwa lyake lyelile,

na imimoyo ya awala iwompfuka IMNDEWA ideng'elele.

4 Mbameni IMNDEWA na tsingupfu tsake,

mghendelele kuubama uhanga wake.

5 Mghakumbuke ghamatendo ghake gha ukukangawatsa ghayatendile,

ipfihulo pfake na ghamalamtsi gha ghumlomo ghwake,

6 mwemwe watsukulu wa Abrahamu, imtumighwa wake,

mwemwe muwana wa Yakobu, muwanu wake yamsaghulighwe.

7 Yeye yuyo IMNDEWA,

Imlungu wetu, ghamalamtsi ghake ghamna isi yose.

8 Kolikumbuka lilaghano lyake matsuwa ghose ing'aghomala,

kotenda aghala ghayalaghitse kwa ipfeleko elufu,

9 lyayekile na Abrahamu, na ukwilaha kwayelahile kwa Isaka,

10 na kalikomangitsa kwa Yakobu liwe malaghitso,

na kwa Isiraeli liwe laghano lya matsuwa ghose ing'aghomala,

11 ahala hayalongile, "Nitsokwing'a ghweghwe isi ya Kanaani iwe yako."

12 Mna matsuwa agho tsamna wanu chidogho,

chidogho ghendo na wagheni.

13 Nawo tsawang'ali wotangatanga kulawa isi imwe mbaka isi ingi,

kulawa ufalume umwe mbaka ufalume ungi,

14 lekeni Imulungu ng'awalekile baye munu wowose yawadununze,

na kwa ajili yao kawakembela hata wafalume,

15 kalonga, "Mleke kuwadonza iwanu wangu yaniwabakile mapfuta,

wala mleke kuwalagha manabii wangu."

16 Naye kaghala inzala muisi,

kapfihinya ipfijo pfawo pfose.

17 Kawalongotsela munu yaghendile hambele hawo,

Yosefu iyautsighwe kama mtumwa.

18 Ako iwanu wamwoha ghamaghulu ghake kwa iminyololo,

na isingo yake wayoha kwa chuma,

19 mbaka aghala ghayalongole ukulonga haghatimile,

apfo lilonga lya IMNDEWA litogholeka kubitila yeye.

20 Imulungu kaghala mfalume, naye kamlekelela,

ona, mtawala wa iwanu kamlekelela,

21 kamwika yawe mkulu wa ing'anda yake,

na yawe mtawala wa ipfinu pfake pfose,

22 yawohe iwakulu wa ufalume wake ka pfayobama,

na yawafunde ihekima iwanzehe wake.

23 Kuya Isiraeli katsa Misiri,

Yakobu kawa mgheni mna isi ya Hamu.

24 IMNDEWA kawatenda iwanu wake weleke iwana wengi ng'ani,

na kawatenda wawe na ngupfu kubita maaduwi tsawo,

25 naye kaitenda imimoyo ya Wamisiri iwehile iwanu wake,

wawatendele pfihile iwatumighwa wake.

26 Kuya kamtuma Musa imtumighwa wake,

kamtuma hamwe na Haruni, iyamsaghule.

27 Walangusa pfitango pfikulu mghati mwawo,

na watenda pfinu pfa ukukangawatsa kuna isi ya Hamu.

28 Kaghala ichisi, nayo isi iwa na chisi totolo,

kwaapfila tsa walema ukughatoghola ghamalonga ghake.

29 Kaghalusa ghamatsi ghawo ghawa damu,

kawatenda wasomba wawo wafe.

30 Isi yawo imema wapfibutwa,

mbaka mna ipfiheleto pfa wafalume wawo.

31 Imulungu kalonga, na baho walawila wang'onzi wengi

na wamani walawila mna isi yawo yose.

32 Katsitenda tsimvula tsawo tsiwe mvula tsa ghamabwe,

na ghumoto ghuna ghamalambi ghwaka mna isi yawo,

33 kaihinya iminzabibu yawo, na imitini yawo,

na kaibenabena imibiki ya isi yawo.

34 Yeye kalonga, na baho walawila wanzighe, na balangulu,

wengi ng'ani ing'awodaha ukupeteka baye,

35 waja imimeya yose ya isi yawo,

na waja ghamatsao gha lidongo lyawo.

36 Kuya kamkoma chila mwana chaudele mna isi yawo,

iwana iwoneke aba tsawo hawang'ali wasongolo.

37 naye kawalapfa kulawa aku wana ifetsa na inzahabu nyingi,

wala ng'ahana munu hata yumwe mna ghamakabila ghake iyekwalile.

38 Wamisiri wadeng'elela Waisiraeli hawokile,

kwaapfila Wamisiri wang'ali wowapfuka Waisiraeli.

39 Katandatsa libingu liwaghubike,

na ghumoto ghuwalangatsile nechilo.

40 Walomba, naye kawaghalila wang'wale,

na kaweng'a ichighate cha kulanga waje weghute.

41 Katula libambalawe, ghamatsi ghalawa,

ghaluta kunyika ka mto.

42 Kwaapfila tsakalikumbuka lilaghano lyake lyelile,

lyayekile na mtumighwa wake Aburahamu,

43 Apfo kawalapfa iwanu wake kuna isi kwa ukudengelela

iwanu wake iyawasaghule wemba na watowa lukenze.

44 Kaweng'a tsiisi tsa iwanu wangi,

nawo waboka ipfinu pfawasang'anile iwanu wangi,

45 ili iwanu wakinde imiko yake,

na waghakinde malaghitso ghake. IMNDEWA yatunyighwe!