1 Mtoweleni ilukenze IMNDEWA,

mwemwe muwanu yamli na ihaki,

kwaapfila iwanu iwotenda ighanoghile wawo iwobamighwa kumtunya Imulungu.

2 Mtunyeni IMNDEWA kwa ukutowa ichinubi,

mwimbileni yeye kwa ukutowa lizeze lina tsinyutsi kumi.

3 Mwimbileni wila wa sambi sambi,

mtoweleni pfinoghile ichinubi na lizeze, kemeleleni hamdeng'elela,

4 Kwaapfila lilonga lya IMNDEWA lolyongesa,

naye kotogholeka mna ghose ghayotenda.

5 Yeye kokunda ighali gha ihaki na ighagholoke,

isi yose imema uluso mkulu wa IMNDEWA.

6 Kwa lilonga lya IMNDEWA kulanga kuumbighwa,

na hayahumule kwa ghumlomo ghwake,

pfose pfili kuko kulanga pfiumbighwa.

7 Ghamatsi gha ibahari kaghatsola na kagheka hanu hamwe,

hata aghala ighaghendese hasi kagheka mna matangi makulu.

8 Isi yose impfuke IMNDEWA,

iwanu wose iwokala muisi wamdedemekele,

9 mana yeye kalonga, isi iumbighwa,

na kalaghitsa, isi ima ghoya.

10 IMNDEWA kopfulaghitsa aghala ghawobama kutenda iwanu wa tsiisi,

na ng'owaleka baye watende ghawobama ukutenda.

11 Lekeni ghayobama ukutenda IMNDEWA ghatsokala matsuwa ghose,

ghayobama mmoyo mwake ghatsotendeka mna ipfeleko pfose.

12 Ibweda ghendo isi imsaghule IMNDEWA yawe Imulungu wake,

iwanu iyawasaghule wawe wanu wake imwenyegho.

13 Kulawa kulanga IMNDEWA kolola hasi,

na kowona iwanu wose.

14 Kulawa hana ichighoda chake cha ufalume,

kowalola iwanu wose iwokala muisi,

15 yeye iyoumba imimoyo ya iwanu wose,

yeye iyomanya chila chinu chawotenda.

16 Kuduhu mfalume iyokomboka kwa kuwa na maasikali wengi,

na kuduhu asikali iyokomboka kwa kuwa na ngupfu nyingi.

17 Falasi wa ing'ondo si chinu baye, ng'okwapfila baye ukomboke,

hata ka kana tsingupfu nyingi, ng'odaha baye kukombola.

18 Lola! Tsinenge tsa IMNDEWA tsowalola awala iwompfuka,

awala iwehuwila uluso wake mkulu,

19 yaukombole ugima wawo kulawa mna ukufa,

na yaweke wakale wagima mna ghamatsuwa gha inzala.

20 Twetwe twombeta na twomlolela IMNDEWA,

yeye yuyo iyotwapfila twetwe, na yuyo iyali ngao yetu.

21 Imimoyo yetu yomdeng'elela yeye,

natwe twehuwila litaghwa lya ukwela kwake.

22 Uluso wako mkulu ukale na twetwe, Ghwe MNDEWA,

ka apfila twetwe pfatukulolela ghweghwe.