1 Nokukunda, ghwe MNDEWA,

yauli tsingupfu tsangu.

2 IMNDEWA yeye libambalawe lyangu,

ngome yangu na mkombotsi wangu.

Imulungu wangu yuyo libambalawe lyangu lyanitsumila nihone,

ingao yangu, na imembe ya ukombotsi wangu, na ingome yangu.

3 Nomkema IMNDEWA, yeye iyobamighwa kutunyighwa!

Yeye konikombola kulawa kwa aduwi tsangu.

4 Imitsabi ya lifwa tsainitsunguluka,

na ghamawimbi gha ukunikoma ghanikululusa ghendo.

5 Imitsabi ya ukufa tsainitsunguluka,

mitegho ya ukufa iteghighwa mnzila mwangu.

6 Nene nimkema IMNDEWA haning'ali noghanzika,

Nimlilila Imulungu wangu yanyapfile.

Naye kahulika litsi lyangu kulawa kuko kuna ing'anda yake,

na ichililo changu chipfika mna ghamaghutwi ghake.

7 Baho isi idedema na ihighisika,

na imisingi ya ipfidunda ihighisika na idedema,

kwa apfila Imulungu tsakaghudubuka.

8 Yosi lilawa mna imula yake,

lilambi lya ghumoto lilawa mna ghumlomo ghwake,

na makala ighakwaka ghalawa mghati mwake.

9 Kalipfughula lilanga kahulumka hasi,

na kukala na bingu titu hasi ha ghamaghulu ghake.

10 Kadina mchanya mwa kelubi kaghuluka,

naye kaghuluka mchanya mwa ghamabawa gha ikelubi ayo.

11 Kachitenda ichisi chimpfiseghe,

imvula na libingu litinile kapfitenda pfiwe hema lyake.

12 Lumwesa halupulike hambele hake,

kulawila mabingu matitu ghabita,

hamwe na mvula ya mabwe na makala gha ghumoto.

13 IMNDEWA kaduma kulawa kulanga,

yeye iyali kuchanya ng'ani kalapfa litsi lyake,

baho kulawila mvula ya mabwe, na makala gha moto.

14 Kawasila imishale yake, nawo wapwililika,

na kawapulika na lumwesa, nawo watsuma ghendo.

15 Ghwe IMNDEWA, hauwakembele,

na tsimula tsako hatsihumule kwa ukuduma,

baho tsoneka tsinzila ng'ulu tsa ghamatsi mna ibahali,

na imisingi ya isi nayo yoneka mwatsi.

16 Kanihulumkila kulawa kuchanya, kanisola,

kanipfula kulawa kuna ghamatsi ighamemile.

17 Kanikombola kulawa kwa aduwi tsangu wana tsingupfu,

na kulawa kwa awala iwonyihila,

kwaapfila wawo tsawana ngupfu nyingi kunibita nene.

18 Wanipfamila mna litsuwa lya ukughanzika kwangu,

lekeni IMNDEWA kanyapfila,

19 Kanilapfa kanighala hanu ihenelele,

kanihonetsa kwa apfila tsa kanoghelighwa na nene.

20 IMNDEWA kanitendela apfo kwaapfila nene tsanitenda ighali gha haki,

kanigweka kwa ukulola ghamoko ghangu pfaghelile.

21 Kwaapfila tsanitsikinda tsinzila tsa IMNDEWA,

wala sitendile baye ighehile kwa kumleka Imulungu wangu.

22 Nighakinda ghamalaghitso ghake ghose,

wala siilekile baye imiko yake.

23 Nene tsasikalile na totso baye hambele hake,

na nikinga nimwenyegho ndeke ukutenda inzambi.

24 MNDEWA kanitendela apfo kwaapfila nene nitenda ighali gha haki,

kanighweka kwa ukulola ghamoko ghangu pfaghelile hambele hake.

25 Ghweghwe kotogholeka kwa awala iwotogholeka,

na kwa awala iwalihela matotso kwebonesa kunogha.

26 Kwebonesa kwela kwa iwanu iwelile,

lekeni kwamkali kwa iwanu iwehile.

27 Ghweghwe kowakombola iwanu iwodununzika,

lekeni awala iweghoda kowahulumsa.

28 Ghweghwe IMNDEWA, yuyo yutuwagha itala yangu,

ghwe Imulungu wangu, lelo umwemwese mna ichisi changu.

29 Ghweghwe haunyapfila, nene nodaha kuwawinga maasikali wengi,

Ona, Imulungu wangu ung'anyapfila, nene nodaha kudaluka ubanda.

30 Imulungu ayuno ghamatendo ghake ghaghoya ghendo,

lilonga lyake IMNDEWA lyotogholeka.

Yeye kangawo kwa awala wose iwomtsumila.

31 Nani iyali Mulungu ka si IMNDEWA yaliyeka baye?

Na nani iyali Bambalawe ka si Imulungu wetu baye?

32 Imulungu yuyo iyongaya tsingupfu,

yuyo iyoitenda inzila yangu ileke kuwa na totso.

33 Kaitenda imighulu yangu iwa ka imighulu ya mbala,

na kanimisa ghoya hanu hangu henulighwe.

34 Kaghafunditsa ghamoko ghangu ukwitowa ing'ondo,

nagho ghodaha ukupfedula iminde ya shaba.

35 Ghweghwe kungaya ingao ya ukombotsi wako,

ghumoko ghwako ghwa kujilo ghunikindilisa uchanya,

naghwe kwihulumsa na kunitenda niwe mkulu.

36 Tsihatuwa tsangu kutsongetsa,

na mighulu yangu ng'aitelebuke baye.

37 Niwakoleletsa aduwi tsangu mbaka niwaghogha,

nani suyile kuchughu baye ghendo mbaka haniwamalitse.

38 Niwabenabena mbaka ng'awadahile kwinuka baye,

waghwa hasi ha ghamaghulu ghangu.

39 Naghwe kunyoha tsingupfu tsa ukwitowa ing'ondo,

awala iwanyinukile kuwatenda wanyinamile hamaghulu ghangu.

40 Na aduwi tsangu kungaya niwabajughe msingo,

na awala iwonyihila niwabanyanga.

41 Wakemelela lekeni ng'oneke munu wa kuwakombola baye,

wamlilila IMNDEWA lekeni ng'awedike baye.

42 Niwahondahonda wawa ka timbwisi ilighulusighwa na libeho,

niwasa kunze ka likododo lya mnzila.

43 Kunikombola kulawa kwa iwanu iwonitowa,

kunitenda niwe mkulu wa iwanu wa tsiisi,

wanu ing'asiwamanyile baye wonitumikila.

44 Iwagheni wonitsila aku wonyinamila,

hawohulika tsimbuli tsa ukuhuma kwangu wonitsila.

45 Iwagheni tsawatenyuka imimoyo,

wonitsila akuno woghudema kulawa mna tsingome tsawo.

46 IMNDEWA yuyo iyali mgima,

na yatunyighwe yeye iyali Libambalawe lyangu,

naye yenulighwe ng'ani, Imulungu wa ukombotsi wangu.

47 Yeye yuyo Imulungu iyowoyitsila iwanu ighehile,

naye kaweka iwanu wa isi tsingi hasi ha ghamaghulu ghangu.

48 Kanikombola kulawa kwa aduwi tsangu,

kanyinula niwe mchanya mwa awala iwanyinukile,

na kanikombola kulawa kwa iwanu waghobo.

49 Ghwe MNDEWA, apfo nitsokulongela mighede mna tsiisi tsa iwanu,

na nitsakwimba nilitunye litaghwa lyako.

50 Komtenda yahume ng'ani,

ona! Yahume ng'ani, mfalume wake,

na komtendela uluso wa lilaghano lyake Masiha wake,

Daudi na iwanu wa ilweleko lwake matsuwa ghose.