1 Lola pfahanoghile hanu haukala ghweghwe,

ghwe MNDEWA yuna ingupfu!

2 Nene nosulukila ng'ani nikale mna ipfibwalu pfa ing'anda ya IMNDEWA,

mbaka notsilika ghendo,

Ghumoyo ghwangu na ilukuli lwangu pfomdeng'elela Imulungu iyali na ugima.

3 Hata isolwe naye kapata kaye,

na isangalala ketsengela chibali chake mna imatsabahu yako,

keka ghamakinda ghake,

Ghwe MNDEWA yuna tsingupfu,

mfalume wangu, na Imulungu wangu.

4 Wabweda awala iwokala mna ing'anda yako,

iwokwimbila ghweghwe chila tsuwa.

5 Kabweda imunu ayula iyopata tsingupfu tsake kulawa kuna ghweghwe,

na tsinzila tsing'ulu tsa ihaki tsa mna ghumoyo ghwake.

6 Awo hawobita mna libonde linyalile lya Baka,

wolitenda lilapfe tsimbwibwi,

pfipfila tsimvula tsa ukuhandila tsolimemetsa ipfitsimbu.

7 Wakongetseka kulawa ngupfu imwe mbaka ngupfu ingi,

na chila munu katsolawila Sayuni, hayali Imulungu.

8 Ghwe IMNDEWA, Imulungu yuna ingupfu,

hulika liombi lyangu, hulikitsa ghwe Imulungu wa Yakobu.

9 Ulole ingao yetu, Ghwe Imulungu,

na uulolese uhanga wa imunu wako yumbakile ghamapfuta.

10 Kwaapfila tsuwa limwe mna ipfibwalu pfa ing'anda yako linogha

kubita matsuwa elufu imwe hanu hangi.

Nene nisaghula ukwima hamlango mng'anda mwa Imlungu wangu,

kubita ukukala mna ghamahema gha iwanu iwehile.

11 Kwa apfila IMNDEWA Imulungu yuyo iyali litsuwa na ingawo.

IMNDEWA koweng'a iwanu uluso na ukutunyighwa.

ng'owema chinu chinoghile baye awala iwakwanga aku wahela matotso.

12 Ghwe MNDEWA yuna tsingupfu,

kabweda imunu wowose iyehuwila ghweghwe.