1 Na yenuke Imulungu, na maaduwi tsake wapwililike,

na awala iwomwihila watsume hambele hake.

2 Kama apfila liyosi pfalighulusighwa na libeho,

nawo uwaghuluse pfipfo,

ka apfila inta pfailumbuka mna ghumoto,

pfipfo nawo iwehile wahupe kulawa hambele ha Imulungu.

3 Lekeni iwanu wana ihaki wadeng'elele,

na wasekelele hambele ha Imulungu,

walekeni wasekelele ghendo na watowe lukenze na milutsi.

4 Mwimbileni Imulungu, mlitunye litaghwa lyake,

mwinuleni yeye iyoghuluka mna ghamabingu,

litaghwa lyake kokemighwa IMNDEWA,

na mdeng'elele hambele hake.

5 Imulungu iyokala hanu hake helile,

yeye ka aba kwa awala iwalihela aba,

na imlamtsi wawo iwaghane.

6 Imulungu koweng'a ikaye iwanu awala iwokala wayekayeka,

kowalekelela iwanu iwohighwe mchifungo kowatenda webwede,

lekeni iwanu iwombiduka awo wokala mna isi isakale.

7 Ghwe Imulungu, hauwalongolele iwanu wako,

na haubitile kunyika,

8 isi ihighisika, na kulanga kughala mvula,

hambele ha Imulungu, Imulungu wa chidunda Sinai,

na hambele ha Imulungu, Imulungu wa Isiraeli.

9 Kuighalila isi mvula ng'ulu, ghwe Imulungu,

na isi yako ikalile ilala kuitenda iwe na mnyeke keli.

10 Iwanu wako wakala amwo muisi;

kwa uluso wako mkulu, ghwe Mlungu,

kuweng'a ipfijo iwahingwa.

11 IMNDEWA kalapfa laghitso,

nawo wamapinga wengi walyenetsa lilaghitso alyo.

12 Wafalume na maasikali wawo wotsuma akuno na akuno,

na ipinga iyali ukaye koghola ipfinu ipfighoghighwe kung'ondo.

13 Hata ka watsowasa mna ipfikwama, mwemwe mtsakuwa ka

ghamabawa gha injiwa ighabakighwe ishaba,

na imighala yake ibakighwa nzahabu imeletseka.

14 IMNDEWA iyana ingupfu hayawapwililise iwafalume muisi,

tsaiwa ka ibalafu pfailaghala kuna chidunda cha Salumoni.

15 Ghwe chidunda cha Imulungu, ghwe chidunda cha Bashani,

Ghwe chidunda china ipfidando pfingi, ghwe chidunda cha Bashani!

16 Hebali mchilola kwa kuchonela gele, mwemwe pfidando pfa ipfidunda,

ichidunda chayasaghule Imulungu yakale?

Na ako IMNDEWA katsokala matsuwa ghose ing'aghohupa.

17 IMNDEWA kolawa Sinai kakutsa hanu hake helile,

aku kelongotsa na imituka yake ya ukukweghighwa ili maelufu kwa maelufu,

18 Ghweghwe kugheluka kuchanya, kughogha mateka,

awo kuwasola wawe nzawadi yako kulawa mna iwanu,

hata na iwanu iwokaidi, ukale nawo, Ghwe MNDEWA Imlungu.

19 Yatunyighwe IMNDEWA, Imulungu wa ukombotsi wetu

iyotudutila imitsigho yetu chila tsuwa.

20 Imulungu wetu yuyo Imulungu iyokombola,

IMNDEWA, Imulungu wetu yuyo yaliyeka iyokombola kulawa kuna ukufa.

21 Imulungu katsoghabatsula ghendo ghamatwi gha maaduwi tsake,

lilotsi lina tsinywele lya imunu iyolumbilitsa ukutotsa.

22 IMNDEWA kalonga kulawa Bashani,

"Nitsowoyitsa, nitsowoyitsa kulawa kuna ibahali ighendese hasi."

23 Ili upfabike ghumghulu ghwako mna idamu ya aduwi tsako,

Na tsindimi tsa wambwa wako tsipate ichijo kuna wawo.

24 Iwanu waghwona ghumwandamo ghwako, Ghwe Mulungu,

ghumwandamo ghwa Imlungu wangu,

mfalume wangu, kughenda hanu hake ihaenzeluke.

25 Iwakwimba wila tsawalongola, na kuchughu kwawo tsawakala iwotowa ipfinanda,

aku welongotsa na iwali iwang'ali wotowa ghamatari.

26 Mtunyeni Imlungu mna imitingano mikulu ya iwanu, mtunyeni IMNDEWA,

kulawa mna imbwibwi ya Isiraeli.

27 Lyabaho likabila lya Benjamini, likabila dodo, lyowalongotsa,

kuya iwakulu wa Yuda na ghamakingili ghawo,

nawo wowinzighwa na iwakulu wa Zabuloni, na iwakulu wa Nafutali.

28 Imulungu wako kalaghitsa uwe na tsingupfu tsako.

wonese tsingupfu tsako, ghwe Mlungu,

ghweghwe yutusang'anile twetwe,

29 kulawa kuna lihekalu lyako ako Yerusalemu.

wafalume watsokughalila tsinzawadi.

30 Uwakembele wanyama iwali mna libagho,

kingili lya wamvulati haghati ha wambughuma,

iwobayugha ipfihande pfa pfetsa.

Yeye kawapwililisa iwanu iwodeng'elela ukwitowa tsing'ondo.

31 Wasenga watsakutsa kulawa Misiri,

Kushi katsogholosa himahima ghamoko ghake yamlombe Imulungu.

32 Mwemwe tsifalume tsili muisi, mwimbileni Imulungu,

Mwimbileni kwa ukumtunya IMNDEWA

33 Yeye iyodina kulanga kuli uchanya ng'ani tangiya ghumwande ghendo,

lola! Kolapfa litsi lyake, litsi lina ingupfu.

34 Dalamkeni ukulonga tsingupfu tsa Imulungu,

ukulu wake wa mchanya mwa Isiraeli,

na tsingupfu tsake tsa mna ghamabingu.

35 Ghwe Mlungu kwa wa kupfukighwa, kulawa hanu hako helile.

Imulungu wa Isiraeli koweng'a tsingupfu na uwetso iwanu wake.

ubalikighwe, ghwe Mlungu.