1 Uhulike litsi lyangu, ghwe Imulungu, haniloloma kuna ghweghwe,

Ukinge ugima wangu ahala maaduwi tsangu hawonighuma wogha.

2 Unipfise kutali na imitsengwe ya chipfiso yawonyikila iwanu iwehile,

kutali na matsogho gha iwotenda ighehile.

3 Awala iwonola tsindimi tsawo kulonga mapanga,

na ghamalonga ghawo ghoghala usungu ka mishale.

4 Kulawa hanu hawepfisile womwasila imunu yalihela matotso,

bila kupfuka womwasila kwa kwidukitsa.

5 Chila munu komghuma ghumoyo miyaghe yatende ighehile,

welongela pfawatsoipfisa imitegho yawo, "Yatsoyona nani?"

6 Wakwika imitsengwe ya ukutenda ighehile, wolonga,

"Lihile lyatubamile ukutenda likala ghoya."

apfo alyo lipfisika mghati mwa chila munu, na mmoyo mwake.

7 Lekeni Imulungu katsowatowa kwa mishale,

na katsowalagha kwa ukwidukitsa.

8 Katsowahinya kwa aghala ghawalongile kwa imilimi yawo;

na iwanu wose iwatsowona watsohighisa ghamatwi ghawo,

9 na iwanu wose watsopfuka,

watsoitangatsa isang'ano ya Imulungu,

na kuifikitsa ing'onde yake.

10 Mleke imunu yana ihaki yamdeng'elele IMNDEWA,

naye katsotsumila kuna yeye,

na wose wana ghumoyo ighunoghile weghode.