1 Unikombole na maaduwi tsangu, Ghwe Imulungu wangu,

unikinge na awala iwonyinukila wesonge na nene.

2 Unikombole na awala iwotenda ighehile,

na unikombole kulawa kuna iwanu iwomwagha tsidamu.

3 Lola, ghwe IMNDEWA, pfawonipfisila wanikome,

iwanu wakali wetingana hamwe wesonge na nene,

aku nene nahela totso,

wala sitendile nzambi yoyose baye.

4 Sitendile chinu chihile baye,

lekeni wawo wotsumila kunitowa,

Winuke, utse ulole na unyapfile.

5 Na ghweghwe, ghwe MNDEWA,

Imulungu yana ingupfu, Imulungu wa Isiraeli,

winuke ukawatowe iwanu awo wa isi tsingi,

uleke kuwonela libatsi awala iwakwika mitsengwe ya ukutenda ighehile.

6 Nemihe wakuya wokemba kama yumbwa,

woghenda aku wotsunguluka tsunguluka mna ghumji.

7 Lola! Maligho ghaliyeka igholawa mna imilomo yawo,

ghawolonga ghogana ka lipanga litemesa,

na welongela apfino, "Iyotuhulika nani?"

8 Lekeni ghweghwe IMNDEWA, kowaseka,

kowabetsa iwanu awo wa isi tsose.

9 Nitsokubeta ghweghwe yuli ingupfu yangu,

kwaapfila ghweghwe yuyo Imulungu yanikutsumila.

10 Imulungu wangu iyonikunda,

yeye Imulungu katsonilongolela,

katsonitenda niwalole aduwi tsangu pfawotowighwa.

11 Uleke kuwakomela lumwe, hela iwanu wangu watsesemwa,

lekeni kwa tsingupfu tsako uwatende wange akuno na akuno,

na uwaghwise hasi, Ghwe MNDEWA, yuli ingao yetu.

12 Inzambi yamna imilomo yawo,

na yamna ghamalonga gha imilomo yawo,

waleke wonzeke mna ichidandali chawo,

kwaapfila wolighita, na wolonga ughutsu.

13 Kwa imaya yauli nayo uwamalitse ghendo,

kwa kughudubuka kwako watende wahupe,

na waleke kwoneka ghendo;

na iwanu wamanye ka Imulungu yuyo iyowatawala iwanu wa Yakobu,

mbaka kwaitsighila isi.

14 Na hamihe wakuya wokemba kama wambwa,

akuno wotsunguluka tsunguluka mna ghumji.

15 Wakwanga kwanga wobama ichijo,

na ka ng'aweghutile baye wokemba ka wambwa.

16 Lekeni nene nitsakwimbila tsingupfu tsako pfatsili,

chila nemitondo nitsakwimba kwa kudeng'elela apfila pfauli mluso,

kwaapfila ghweghwe kwa ingome yangu,

na nokutsumila ghweghwe mna ghamatsuwa gha ukughaya.

17 Ghwe yuli tsingupfu tsangu, nitsakwimba nikutunye.

mana ghweghwe kwaingome yangu, Imlungu wa uluso wangu.