1 Uleke kukeleka kwaapfila iwanu wotenda ighehile,

wala uleke kuwonela gele awala iwotenda ing'aghanoghile.

2 Kwaapfila awo watsohupa ka mitsani,

ka mimeya mibisi pfaisakala.

3 Wihuwile IMNDEWA na utende ighanoghile,

ili ukale mna isi na uwe na ugima.

4 Ukudeng'elela kwako kuwe kwa IMNDEWA,

naye katsokwing'a aghala ghaghubama ghumoyo ghwako.

5 Umwing'e IMNDEWA ugima wako,

na umlolele yeye,

na yeye katsotenda.

6 Na katsotenda ukunogha kwako kulangatse ka ghumwanga,

na aghala ghaulamla ghatsolangatsa ka tsuwa ilikwalika nemisi.

7 Winyamale hambele ha IMNDEWA,

naghwe umbete yeye bila kwipfa,

uleke kukeleka hauwona iwanu wehile wobweda,

awala iwebweda kwa kwika mitsengwe ihile.

8 Uleke kwona maya, wala kughudubuka,

kwaapfila ukuludubuka kutsokulongotsa kuna ukutenda ighehile.

9 Mana iwotenda ighehile watsokomighwa,

lekeni awala iwombeta IMNDEWA, awo watsakwing'ighwa isi iwe yawo.

10 Kung'ali chidogho imunu iyehile katsohupa ghendo,

kutsombama hanu hayakalile, naghwe ng'utsomwona baye.

11 Lekeni iwanu iwahole watsoisola isi,

nawo watsoideng'elela na watsokala ghoya.

12 Yehile komtendela tsengwe imunu iyana ihaki,

naye komwihila kwa kumsaghila ghamatsino ghake,

13 lekeni IMNDEWA komseka imunu ayo yehile,

kwaapfila yeye komanya ka tsuwa lyake lya ukuhighighwa lyakutsa.

14 Iwehile wasomola lipanga, wapfedula tsiminde tsawo,

wawaghwise hasi iwahingwa na iwalihela chinu,

wawachinje iwanu iwokala kwa ukutenda ighanoghile,

15 lekeni lipanga lyawo litsoihoma imimoyo yawo iwenyegho,

na tsiminde tsawo tsitsobeneka.

16 Ng'apfu imunu iyana ihaki yang'awa na mali chidogho,

kubita wanu wehile wang'awa na mali ketseketse,

17 Kwaapfila ghamoko gha iwanu iwehile ghatsobeneka,

lekeni IMNDEWA katsowakindilisa iwanu iwana ihaki.

18 IMNDEWA koghamanya ghamatsuwa gha iwanu iwalihela matotso,

na achila chawolekelighwa chitsokala matsuwa ghose.

19 Ng'awatsohumbuka baye mna ghamatsuwa gha ukughaya,

na mna ghamatsuwa gha inzala wawo watseghuta.

20 lekeni iwanu iwehile watsohupa,

na maaduwi wa IMNDEWA watsohupa ka maluwa gha kumghunda,

na watsohupa ka liyosi.

21 Imunu iyehile kokopa na ng'oliha baye,

lekeni imunu iyana ihaki kolapfa kwa uluso.

22 Kwaapfila iwabalikighwe na IMNDEWA watsoihala isi,

lekeni iwalighitighwe na yeye watsokomighwa ghendo.

23 IMNDEWA yuyo iyolongotsa ghamatsayo gha imunu,

na yeye koikunda inzila yake,

24 hata yang'ekwala, ng'atsakughwa hasi baye,

kwaapfila IMNDEWA katsomwinula kwa ghumoko ghwake.

25 Nene tsa namsongolo na sambi nilala,

lekeni sina mbone baye imunu yana ihaki kalekighwa,

na iwanaghe walombelombe ichijo.

26 Matsuwa ghose yeye kamluso, na koatsima sendi iwanu,

na iwanaghe watsobalikighwa ghendo.

27 Uleke ghehile, na tenda ighanoghile,

naghwe kutsokala mna isi matsuwa ghose.

28 Kwaapfila IMNDEWA kokunda ukutenda ighali gha haki,

naye ng'atsowaleka baye iwanu wake iwotogholeka.

yeye kowakinga matsuwa ghose,

lekeni iwana wa iwanu iwehile watsokomighwa ghendo.

29 Iwotenda ighali gha ihaki watsoihala isi,

nawo watsokala muisi amwo matsuwa ghose.

30 Ghumlomo ghwake iyana ihaki gholonga ghamalonga gha ihekima,

ilulimi lwake lwolonga ighagholoke.

31 Ghamalaghitso gha Imulungu wake ghamna ghumoyo ghwake,

na ghamaghulu ghake ng'aghotelebuka baye mna agho.

32 Imunu iyehile komtsodolela tsinenge imunu iyana ihaki,

na kobama yamkome,

33 lekeni IMNDEWA ng'atsowaleka baye mna ghamoko ghawo,

wala ng'atsowaleka wahighighwe baye hawoghalighwa kuna libalatsa.

34 Umbete IMNDEWA, na uikinde inzila yake,

naye katsokwinula uihale isi,

naghwe kutsowona iwehile hawokomighwa.

35 Nene nimwona imunu iyehile na mkali,

iyebona kamkulu kulonga ghumbiki ghwa mkataluba ighukula mna lidongo linoghile,

36 Lekeni kafosa hima na ahala hayakalile ng'oneke keli baye,

nene nimbama lekeni simwonile baye.

37 Mlolese imunu iyalihela totso,

mlole imunu iyotenda ighagholoke,

kwaapfila mna ghamatsuwa ighakutsa katsobweda na katsokala tseghamba.

38 Lekeni iwotenda tsinzambi wose watsokomighwa.

na iwatsukulu wao watsong'olighwa.

39 IMNDEWA katsowakombola iwanu wana ihaki,

kwaapfila yeye yuyo iyowakombola mna ghamatsuwa gha ukughaya.

40 Naye IMNDEWA kawapfila na kawakombola,

kowalapfa kulawa mna na iwanu iwehile na kowakombola,

kwa apfila wawo womtsumila yeye.