1 Mghahulike aghano, mwemwe muwanu wose,

mtegheletse mwemwe mwose imkala muisi,

2 iwabala, pfipfila na iwadodo,

wana tsimali, pfipfila na iwahingwa,

3 ghumlomo ghwangu ghutsolonga mbuli tsa hekima,

ghumoyo ghwangu ghutsolonga ukumanya.

4 Nitsotegha lighutwi lyangu nihulikitse ing'ungo,

na aku notowa ching'weng'we nitsolonga ing'ungo ayo ilongatse.

5 Hebali nighapfuke ghamatsuwa gha ukughaya haghatsakutsa,

aho ighehile gha aduwi tsangu haghonitsunguluka,

6 awala iwehuwila tsimali tsawo,

na awala iweghodela utajili wao mkulu?

7 Haduhu munu iyodaha kuukombola ugima wa ndughu yake,

wala iyodaha kumliha chinu Imulungu ili ndughu yake ayo yakale mgima,

8 kwaapfila ukuliha ugima wa imunu bei yake ng'ulu,

kuduhu chinu chochose cha ukuliha ichikwenela,

9 ili yeye yakale mgima matsuwa ghose, yaleke kwingila mkabuli.

10 Wose watsakona kumbe wana ihekima nawo wakufwa,

pfipfila iwabotsi na iwalihela tsimbutsi nawo wohupa,

na wowalekela wanu wangi utajili wawo.

11 Ghamakabuli ghawo ghatsakuwa tsing'anda tsawo tsa ghamatsuwa ghose,

ghatsakuwa tsing'anda tsawo pfeleko pfose,

awo iwakemile imighunda kwa ghamataghwa ghawo.

12 Imunu hata yawe mkulu pfihi, ng'atsohepa ukufa baye.

yeye keghala na iwanyama iwohupa.

13 Aghano ghagho ighowalawila iwabotsi, iwanu iwehuwila iwenyegho,

na awala iwatsowawinza hambele, iwoghatoghola ghamalonga ghawo.

14 Wawo ka ng'olo wekighwa wafe,

lifwa litsowadima ako kutsimu,

iwanu wana haki watsowatawala chila haukucha,

tsing'uli tsawo tsitsakolela kutsimu,

kutali ghendo na ghamang'anda ghawo ighanoghile.

15 Lekeni Imulungu katsonikombola ghendo kulawa kuna likabuli,

yeye katsonilapfa kulawa ako.

16 Uleke kupfuka imunu yang'awa tajili,

hata ka ing'anda yake ing'ongetseka ukunogha,

17 Kwaapfila ng'atsosola chinu chochose baye ahala hayakufa,

na tsimali tsake ng'atsitsohulumka naye baye kukabuli.

18 Hata ka hayakalile mgima tsakebona kabweda,

na hata ka iwanu tsawamtunya kwa ukupata tsimali,

19 ayo katsoghenda kwawali iwahenga wake,

ako ng'atsakwona keli baye ghumwanga.

20 Munu wowose iyali mkulu aku kahela tsimbutsi,

ayo keghala ghendo na wanyama iwakufa.