1 Mwing'eni mighede IMNDEWA, kwaapfila yeye kanogha,

mana uluso wake wokala matsuwa ghose ing'aghohupa.

2 Isiraeli nawalonge,

"Uluso wake wokala matsuwa ghose."

3 Iwanu wa ing'anda ya Haruni nawo walonge,

"Uluso wake wokala matsuwa ghose."

4 Na wose iwompfuka IMNDEWA nawo walonge,

"Uluso wake wokala matsuwa ghose ing'aghohupa."

5 Haning'ali namna ghamaghayo ghangu,

nene nimkema IMNDEWA,

naye kanyidika na kanyika hanu henelele.

6 IMNDEWA kaubali wangu nene, sitsopfuka chinu baye.

Angu imunu yatsodaha kunitenda choni?

7 IMNDEWA kaubali wangu, yeye yuyo iyonyapfila,

apfo nitsakona awala iwonyihila pfawatsotohighwa.

8 Ng'apfu kutsumila kwa IMNDEWA,

kubita kuwalolela iwanu.

9 Ng'apfu kutsumila kwa IMNDEWA,

kubita kuwalolela iwakulu.

10 Iwanu wa isi tsose tsawanitsunguluka,

lekeni kwa litaghwa lya IMNDEWA niwadumlila kutali.

11 Ona tsawanitsunguluka, wanitsunguluka chila ubali,

lekeni kwa litaghwa lya IMNDEWA niwadumlila kutali.

12 Wanitsunguluka kulonga nzukwi,

lekeni watsimika ka moto ghwa mihonga pfaghutsimika,

kwa taghwa lya IMNDEWA niwadumlila kutali.

13 Tsakunikunughitsa ghendo nighwe,

lekeni IMNDEWA kanyapfila.

14 IMNDEWA yuyo tsingupfu tsangu na ukuhuma kwangu,

na yeye yuyo iyonikombola.

15 Litsi lya ukudeng'elela ukuhuma lyohulikika mna lihema lya iwanu wana ihaki,

ghumoko ghwa kujilo ghwa IMNDEWA ghotenda makulu.

16 Ghumoko ghwa kulume ghwa IMNDEWA ghwinulighwa kuchanya.

ghumoko ghwa kulume ghwa IMNDEWA ghwotenda makulu.

17 Sitsakufa baye, lekeni nitsakuwa mgima,

na nitsowapetela iwanu aghala ghayatendile IMNDEWA.

18 IMNDEWA kaniatsibu ng'ani,

lekeni ng'andekile nife baye.

19 Nipfughulileni ghamalango gha ihaki,

ningile amwo nilonge mighede kwa IMNDEWA.

20 Alino lango lya IMNDEWA,

wanu wana ihaki watsakwingila.

21 Nolonga mighede ghwe Imulungu kwaapfila kunyinidika,

kwaapfila ghweghwe yuyo yunikombola,

22 Libwe lyawalemile iwotsenga,

sambi liwa libwe kulu lya ghumsingi.

23 IMNDEWA yuyo iyatendile alino,

nalyo lyokangawatsa mna tsinenge tsetu.

24 Tsuwa lyino lyilo lyayatendile IMNDEWA,

apfo tudeng'elele na tutsekelele.

25 Tokudedetsa, ghwe IMNDEWA utukombole,

tokudedetsa, ghwe IMNDEWA ututende tubwede.

26 Kabweda ghendo ayula iyakutsa kwa litaghwa lya IMNDEWA,

Twokubaliki kulawa kuna ing'anda ya IMNDEWA.

27 Yeye IMNDEWA yuyo Imulungu,

yeye katumwemwesela ghumwanga gwake,

muyohe inambiko ya ichihungo kwa imitsabi,

kuna tsimembe tsa imatsabahu.

28 Ghwegwe kwa Imulungu wangu,

na nene nitsolonga mighede kuna ghweghwe,

nitsokutunya ghwe Mulungu wangu.

29 Longeni mighede kwa IMNDEWA, kwaapfila yeye kanogha,

kwaapfila uluso wake wokala matsuwa ghose.