1 Mtse tumwimbile IMNDEWA,

tumdeng'ele iyali libambalawe lya ukombotsi wetu.

2 Tughende hambele hake aku twolonga mighede,

na kumwimbila wila wa ukudeng'elela.

3 Kwa apfila IMNDEWA ka Imulungu mkulu,

na ka mfalume mkulu kubita imilungu yose.

4 Hanu haghendese ghendo hasi ha isi,

yeye kahakindilisa kwa ghamoko ghake,

na ipfidando pfose pfa ipfidunda pfake yeye.

5 Ibahali yake yeye, na yeye yuyo iyaiumbile,

na yeye yuyo iyaumbile isi isakale kwa ghamoko ghake.

6 Mtse tumwinamile, tumtambikile,

mtse tumtowele ghamagoti hambele ha IMNDEWA, Maumba wetu!

7 Kwaapfila yeye yuyo Imulungu wetu, natwe twa iwanu wake,

twa ng'olo iwodimighwa hana ghumghina ghwake,

Lelo tegheletseni apfino pfayolonga.

8 "Mleke kuitenda imimoyo yenu iwe misughu, ka apfila akula Meriba,

na ka akula Masa kunyika,

9 ahala iwahenga wenu hawanighetsile,

wanighetsa hata ka tsawaghona aghala makulu ghanitendile.

10 Kwa miyaka alubaini nene nidesighwa na ilweleko alula, nilonga,

‘Iwanu awano wagha ghendo,

ng'awotsimanya ghendo baye tsinzila tsangu.’

11 Baho nighudubuka ng'ani, nilaha nilonga,

‘Ng'awatsakwingila baye hanu hangu ha ukubwihila.’"