1 Mtunye IMNDEWA!

Leka nene nimtunye IMNDEWA!

2 Nitsomtunya IMNDEWA matsuwa ghose ghanikala mgima,

Nitsomwimbila Imulungu wangu matsuwa ghose ghanikala mgima.

3 Mleke kwihuwila wapfilongotsi wa isi,

awo wanu hela na ng'awodaha baye ukuwakombola.

4 Yang'afa, kakuya mna litimwisi mwalawile,

na chila chinu chayabamile ukutenda chotsighila baho.

5 Kabweda imunu ayula iyakwapfilighwa na Imulungu wa Yakobo,

imunu ayula iyehuwila kwa IMNDEWA, Imulungu wake,

6 iyaumbile lilanga na isi,

ibahali na pfose pfili mumo,

matsuwa ghose yeye kotenda lyaghano lyayekile.

7 Yeye koweng'a iwonelighwe achila chawobamighwa ukwing'ighwa,

koweng'a ichijo awala wana inzala,

na kowalekela awala iwohighwe.

8 IMNDEWA kowafumbula tsinenge ipfifita,

kowenula awala iwaghwile,

na kowakunda awala iwana ihaki.

9 IMNDEWA kowakinga iwagheni,

naye kowapfila awala walihela aba tsawo na ipfitsuka,

lekeni kopfulaghitsa aghala ghawobama kutenda iwehile.

10 IMNDEWA katsoghendelela kuwa mfalume matsuwa ghose ing'aghomala,

Imulungu wako ghwe Sayuni ka mfalume pfeleko mbaka pfeleko! Mtunyeni IMNDEWA!