1 Imulungu kanogha ghendo kwa Isiraeli,

kwa awala wana imimoyo yelile.

2 Lekeni nene, chidogho ghendo ghamaghulu ghangu ghateletse,

ghamatsayo ghangu chidogho ghaseghele hanu haghemile,

3 Kwaapfila tsaniwonela gele iweghoda,

hambonile iwehile apfila pfawobweda.

4 Kwa apfila wawo hawakufa ng'awodununzika baye,

tsing'uli tsawo tsidegheta na tsina ngupfu.

5 Ghamaghayo ghawoghaya iwanu, wawo ng'awoghaya baye,

na ng'awoghanzika baye ka wanu wangi pfawoghanzika.

6 Apfo ichidandali chiwa mkufi mna tsisingo tsawo,

wepfalitsa gwanda lya ughobo mna ilukuli lwao.

7 Iminenge yawo yolawilila kwaapfila ineneha,

imimoyo yawo yopfikitsa ukutenda ighehile ghaliyeka.

8 Wowaseka wayawo, na wolonga ighehile,

wotamba na wolonga apfila pfawatsodununza iwanu.

9 Kwa imilomo yawo woligha kulanga,

na kwa imilimi yawo weghodela ghawatendile muisi.

10 Apfo iwanu watsowahundukila na kuwahulikitsa,

nawo wodutighwa na ghamatsi agho ighamemile.

11 Nawo wolonga, "Imulungu yatsomanyatse?

Yeye Yali kuchanya ng'ani yatsodahatse kutanga?"

12 Lola! Apfino pfipfo pfawali iwanu wehile,

matsuwa ghose wawo wobwedelela,

na utajili wawo woghendelela kwongetseka.

13 Angu ghendo nitenda ng'onde ya hela hanighwikile ghumoyo ghwangu ghwele,

na hanighaghomile ghamoko ghangu ghaleke ukutenda nzambi?

14 Kwaapfila misi yose nene nighanzika,

na chila mitondo nene nitowighwa.

15 Ning'alongile, "Nitsolonga apfino",

ning'awile nowabiduka iwana wako.

16 Hanibamile nighamanye agho ghose,

ng'aiwile pfibewe baye nene kughamanya.

17 Mbaka hanighendile hanu helile ha Imulungu,

baho nimanya aghala ighatsowalawila iwanu wehile.

18 Ghweghwe kutsoweka ghendo hana uteletsi,

kowaghwisa hasi na watsohupa ghendo.

19 Lola apfila pfawatsohinyighwa kwa ukwidukitsa,

wogha utsowengila na watsomalitsika ghendo.

20 Ka indoto pfaili imunu hayolamka,

ghwe IMNDEWA haukwinuka uwatende wahupe pfipfo.

21 Mana ghumoyo ghwangu haghwonile usungu,

na chinu chihoma mghati mwangu,

22 Nikala henzehenze na mbotsi,

na niwa kama mnyama hela hambele hako.

23 Na nene matsuwa ghose nahamwe naghwe,

ghweghwe koghukinda ghumoko ghwangu ghwa kujilo.

24 Konilongotsa kwa ukunifunda,

kuya kutsonibokela kuna utunitso.

25 Nani yanili naye ako kulanga? Ng'ambe ghweghwe?

Wala mna isi kuduhu chinu ichininoghela kubita ghweghwe.

26 Ilukuli lwangu na ghumoyo ghwangu pfohunguka,

lekeni Imlungu kalibambalawe lya ghumoyo ghwangu,

na lifungu lyangu matsuwa ghose ing'aghohupa.

27 Mana awala iwokala kutali na ghweghwe watsohupa,

naghwe kutsomhinya chila munu iyokuleka ghweghwe,

28 Lekeni kuna nene pfinogha niwe habehi na Imulungu,

IMNDEWA yuyo kimbililo lyangu,

na nene nitsoghalonga ghose ghayatendile.