1 Mtunyeni IMNDEWA,

litunyeni litaghwa lyake,

mtunyeni yeye, mwemwe iwatumighwa wake.

2 Mwemwe imsang'ana mna ing'anda ya IMNDEWA,

na mna ipfibwalu pfa ing'anda ya Imulungu wetu.

3 Mtunyeni IMNDEWA kwaapfila yeye konogha,

Mlimbile litaghwa lyake kwaapfila linogha.

4 Kwaapfila IMNDEWA kamsaghula Yakobo yawe wake mwenyegho,

na kawasaghula Waisiraeli wawe wanu wake ghendo.

5 Kwaapfila nomanya ghendo ka IMNDEWA kamkulu,

naye kamkulu kubita imilungu yose.

6 IMNDEWA kotenda chochose chayobama,

kotenda kulanga na muisi, mna ibahali, na mna ipfinu pfose ipfighendese hasi.

7 Yeye yuyo iyoghala libingu kulawa kwaitsighila isi,

na iyoghala ilumwesa hamwe na imvula,

yeye koghala libeho kulawa akula kwayalikile.

8 Kamkoma chila mwana chaudele ako Misiri,

yawe wa munu au wa mnyama.

9 Tsakatenda ipfitango na pfinu pfa ukukangawatsa, ako Misiri,

kamtendela agho mfalume Farao na pfilongotsi wake wose wali hasi hake.

10 Tsakawakoma wanu wengi wa tsiisi,

na kawakoma wafalume wana tsingupfu.

11 Ka apfila Sihoni mfalume wa Waamori,

Ogi mfalme wa Bashani,

na wafalume wose wa Kanani.

12 Katsiboka isi tsawo kaweng'a iwanu wake,

tsiwe tsa iwanu wake Isiraeli.

13 Litaghwa lyako, ghwe IMNDEWA, lyokala matsuwa ghose,

pfeleko pfose pfitsokukumbuka ghweghwe.

14 IMNDEWA katsowamila iwanu wake,

na katsowonela libatsi iwatumighwa wake.

15 Imilungu ya iwanu wa isi tsingi ya fetsa na nzahabu,

nayo ifinighwa kwa ghamoko gha iwanu.

16 Ina milomo lekeni ng'aidaha baye kulonga,

ina nenge lekeni ng'aidaha baye kwona.

17 Ina maghutwi lekeni ng'aidaha baye kuhulika,

wala ng'aidaha baye hata kuhumula.

18 Wose iwaipfinile na iweihuwila,

watseghala na imilungu ayo.

19 Mwemwe iwanu wa Isiraeli, mtunyeni IMNDEWA,

mwemwe iwatambika mtunyeni IMNDEWA.

20 mwemwe Walawi mtunyeni IMNDEWA,

mtunyeni IMNDEWA mwemwe imumpfuka Imulungu.

21 Mtunyeni IMNDEWA kulawa Sayuni,

yeye iyokala Yerusalemu,

Mtunyeni IMNDEWA!