यहेजकेल 21

न्याय की तलवार

1 परमेश्वर को यो वचन मोरो जवर पहुंच्यो : 2 "हे आदमी की सन्तान, अपनो मुंह यरूशलेम को तरफ कर अऊर पवित्र जागा को तरफ वचन सुनाव; इस्राएल देश को बारे म भविष्यवानी कर अऊर ओको सी कह्य, 3 प्रभु परमेश्वर यो कह्य हय : देख, मय तोरो खिलाफ हय, अऊर अपनी तलवार म्यान म सी निकाल क तोरो म सी धर्मी अऊर अधर्मी दोयी को नाश करूं। 4 येकोलायी कि मय तोरो म सी धर्मी अऊर अधर्मी सब को नाश करन वालो हय, यो वजह मय तलवार म्यान सी निकाल क दक्षिन सी उत्तर तक सब प्रानियों को खिलाफ चलाऊं; 5 तब सब प्रानी जान लेयेंन कि परमेश्वर न म्यान म सी अपनी तलवार निकाली हय; अऊर वा तलवार ओको म फिर सी रखी नहीं जायेंन।"

6 "येकोलायी हे आदमी की सन्तान, तय आह भर, दु:खी होय क अऊर टूटी कमर ले क लोगों को सामने आह भर। 7 जब हि तोरो सी पूछेंन, ‘तय कहाली आह भरय हय?’ तब कहजो, ‘समाचार को वजह। कहालीकि असी बात आवन वाली हय कि सब को मन टूट जायेंन अऊर सब को हाथ ढीलो पड़ेंन, सब को दिल बेबस अऊर सब को घुटना कमजोर होय जायेंन। देखो, असीच बात आवन वाली हय, अऊर वा जरूर पूरी होयेंन,’ परमेश्वर यहोवा की या वानी हय।"

8 फिर परमेश्वर को यो वचन मोरो जवर पहुंच्यो, 9 "हे आदमी की सन्तान, भविष्यवानी कर क् कह्य, परमेश्वर यहोवा यो कह्य हय :"

देख, धार लगायी हुयी तलवार, अऊर चमकायी हुयी तलवार!

10 ऊ येकोलायी धार लगायी गयी कि

ओको सी घात करयो जाय सके, अऊर येकोलायी चमकायी गयी कि बिजली को समान चमके!

त का हम हर्ष मनायबो?

ऊ परमेश्वर को टुरा को राजदण्ड आय अऊर सब झाड़ो ख तुच्छ जानन वालो आय।

11 वा चमकावन लायी येकोलायी दी गयी कि

तलवार हाथ म पकड़ी जाय सके,

वा येकोलायी धार लगायी गयी अऊर चमकायी गयी कि घात करन वालों को

हाथ म दियो जाय सके।

12 हे आदमी की सन्तान चिल्लाव,

अऊर शोक मनाव!

कहालीकि मोरी तलवार मोरोच निज लोगों को खिलाफ निकली हय,

वा इस्राएल को पूरो मुखियावों

मोरो निज लोगों को संग तलवार सी मारयो जाय रह्यो हय।

येकोलायी तय छाती पीट-पीट क रोव।

13 कहालीकि सचमुच ओकी जांच भयी हय,

अऊर यदि ओख तुच्छ जानन वालो राजदण्ड भी नहीं रहेंन, त का?

परमेश्वर यहोवा की या वानी हय।

14 "येकोलायी हे आदमी की सन्तान, भविष्यवानी कर, अऊर ताली बजावो, अऊर तीन बार तलवार की शक्ति दोय गुना करयो जाय, वा त घात करन की तलवार बल्की बड़ो सी बड़ो को घात करन की तलवार आय, जेकोसी कोठरियों म लूक्यो हुयो कोयी भी नहीं बच सकय। 15 मय न घात करन वाली तलवार ख उन्को सब फाटकों को खिलाफ येकोलायी उठायो हय कि लोगों को मन टूट जाये, अऊर हि बहुत ठोकर खाये। देखो, वा त बिजली को समान चमकीली हय, अऊर घात करन लायी धार लगायी गयी हय। 16 हे तलवार, अपनी दायो तरफ जा, फिर तैयार होय क बायो तरफ मुड़, जित भी तोरी धार होना उत काट। 17 मय भी ताली बजाऊं अऊर अपनो गुस्सा ख शान्त करूं, मय परमेश्वर न असो कह्यो हय।"

बेबीलोन को राजा की तलवार

18 फिर परमेश्वर को यो वचन मोरो जवर पहुंच्यो : 19 "हे आदमी की सन्तान," दोय रस्ता ठहराय ले कि बेबीलोन को राजा अपनी तलवार को संग आयेंन; दोयी रस्ता एकच देश सी निकलेंन। जहां सी रस्ता नगर को तरफ जावय हय, वहां एक मार्ग-सूचक चिन्ह लगाव; 20 एक रस्ता ख अम्मोनियों को रब्बा नगर को खिलाफ तलवार ख आवन लायी, अऊर दूसरो रस्ता यहूदा देश को गढ़वालो नगर यरूशलेम को खिलाफ चिन्ह बनाव। 21 कहालीकि बेबीलोन को राजा इन दोयी रस्ता को बीज वालो जागा पर शकुन जानन लायी खड़ो हय, ऊ बान ख हिलावय हय; अऊर ऊ गृहदेवतावों सी पूछय हय, ऊ बलि करयो हुयो पशु को कलेजा की जांच करय हय। 22 ओको दायो हाथ म यरूशलेम को नाम की चिट्ठी हय कि ऊ ओको तरफ युद्ध को यन्त्र लगाये, अऊर मुंह खोल क घात करन की आज्ञा दे अऊर ऊंचो आवाज सी ललकारे, फाटकों को तरफ युद्ध को यन्त्र लगाये अऊर घेराबन्दी करे अऊर ढलान बनाये। 23 पर लोग त ऊ भविष्य बतावन वालो ख झूठो समझेंन; उन्न जो उन्की कसम खायी हय; यो वजह उन्को अधर्म ख याद दिलाय क पकड़ लेयेंन। 24 "यो वजह प्रभु परमेश्वर यो कह्य हय : येकोलायी कि तुम्हरो अधर्म जो याद करयो गयो हय, अऊर तुम्हरो अपराध जो खुल गयो हय, कहालीकि तुम्हरो सब कामों म पापच पाप दिखायी देवय हय, अऊर तुम याद आयो हय, येकोलायी तुम इन्कोच द्वारा पकड़्यो जावो।"

25 "हे इस्राएल को बुरो शासक, तोरो दिन आय गयो हय; अधर्म को वजह आखरी सजा को समय आय गयो हय। 26 तोरो बारे म परमेश्वर यहोवा यो कह्य हय : फेटा उतार, अऊर मुकुट भी उतार दे; ऊ पहले जसो नहीं रहेंन; जो खल्लो हय ओख ऊंचो करयो जायेंन अऊर जो ऊंचो हय ओख खल्लो करयो जायेंन। 27 मय नगर ख उलट देऊं अऊर उलट-पुलट कर देऊं; हव उलट देऊं अऊर जब तक ओको अधिकारी नहीं आय जाये तब तक ऊ उलट्यो हुयो रहेंन; तब मय ओख दे देऊं।"

अम्मोनियों को खिलाफ तलवार

28 "फिर हे आदमी की सन्तान, भविष्यवानी कर क् कह्य कि प्रभु परमेश्वर अम्मोनियों अऊर उन्की करी हुयी नामधरायी को बारे म यो कह्य हय;"

तय यो कह्य, निकाली हुयी तलवार हय,

वा तलवार घात करन लायी चमकायी गयी हय कि नाश करे अऊर ओकी चमक बिजली को समान हो।

29 जब तक कि हि तोरो बारे म झूठो दर्शन देखतो हय, अऊर झूठो भविष्य तोख बतावय हय कि तलवार उन बुरो दुर्जनों की गर्दन पर चल जिन्को अन्तकाल आय गयो हय, उन्को आखरी सजा को समय आय गयो हय।

30 तलवार ख फिर सी म्यान म रख। जो जागा म तय बनायी गयी अऊर जो देश म तोरी उत्पत्ति भयी, वहांच मय तोरो न्याय करूं। 31 मय तोरो पर अपनो गुस्सा भड़काऊं अऊर तोख अपनो क्रोध की आगी सी भस्म कर देऊं; अऊर तुम्ख असो क्रूर लोगों को हाथ म सौप देऊं जो विनाश करन म निपुन हय। 32 ✝21:32 यिर्मयाह ४९:१-6; यहेजकेल २५:१-7; आमोस १:३-१५; सपन्याह २:८-११तय आगी सी नाश होय जाजो; तोरो खून देश म बहायो जायेंन; अऊर तोख कोयी याद नहीं करेंन कहालीकि तोख परमेश्वरनच असो कह्यो हय।