यहेजकेल 29

मिस्र देश को खिलाफ भविष्यवानी

1 ✝ 29:1 यशायाह १९:१-२५; यिर्मयाह ४६:२-२६ दसवों साल को दसवों महिना को बारहवों दिन ख परमेश्वर को यो वचन मोरो जवर पहुंच्यो : 2 "हे आदमी की सन्तान, अपनो मुंह मिस्र देश को राजा फिरौन को तरफ कर क् ओको सी अऊर पूरो मिस्र देश को खिलाफ भविष्यवानी कर; 3 यो कह्य, परमेश्वर यहोवा यो कह्य हय : हे मिस्र को राजा फिरौन, मय तोरो खिलाफ हय, हे बड़ो मगर, तय जो अपनी नदियों को बीच म पड़्यो रह्य हय, तय कह्य हय, ‘नील नदी मोरी आय, अऊर मय नच ओख बनायो हय।’ 4 मय तोरो जबड़ा म आकड़ा डालूं, अऊर तोरी नदियों की मच्छियों ख तोरी खाल म चिपकाऊं, अऊर मय तोरी खाल म चिपकी हुयी सब मच्छियों समेत नील नदी सी बाहेर निकालूं। 5 तब मय तोख तोरी पूरी मच्छियों समेत जंगल म फेक देऊं, अऊर तय मैदान म पड़्यो रहजो; अऊर नहीं गाड़्यो जाजो। मय न तोख जंगली जनावर अऊर आसमान को पक्षियों को भोजन बनाय दियो हय।" 6 ✝29:6 यशायाह ३६:६"तब मिस्र को पूरो निवासी जान लेयेंन कि मय परमेश्वर आय।"

तय न हि इस्राएलियों ख घराना को लायी नाजुक लाठी ठहरयो हय। 7 जब उन्न तोख पकड़्यो तब तय टूट गयो अऊर ओको कन्धा उखड़ गयो, अऊर जब हि तोख टेक्यो, तब तय टूट गयो, अऊर ओकी कमर की पूरी नस चढ़ गयी। 8 यो वजह प्रभु परमेश्वर यो कह्य हय : देख, मय तोरो पर तलवार चलवाय क, तोरो आदमी अऊर जनावर, सब को नाश करूं। 9 तब मिस्र देश उजाड़ अऊर वैरान होय जायेंन; अऊर हि जान लेयेंन कि मय परमेश्वर आय। "तय न कह्यो हय,"

"मोरी नील नदी मोरीच आय, अऊर मय नच ओख बनायो हय। 10 यो वजह देख, मय तोरो अऊर तोरी नदियों को खिलाफ हय अऊर मिस्र देश ख उत्तर म मिग्दोल नगर सी ले क दक्षिन म सवेने नगर तक बल्की कूश देश की सीमा तक उजाड़च उजाड़ कर देऊं। 11 चालीस साल तक ओको म आदमी यां जनावर को पाय तक नहीं पड़ेंन; अऊर नहीं ओको म कोयी बसेंन। 12 चालीस साल तक मय मिस्र देश ख उजड़्यो हुयो देशों को बीच उजाड़ कर क् रखूं; अऊर ओको नगर उजड़्यो हुयो नगरों को बीच खण्डरच बन्यो रहेंन। मय मिस्र देश को लोगों ख राज्य राज्य म अलग अलग कर देऊं, अऊर देश देश म तितर-बितर कर देऊं।"

13 "परमेश्वर यहोवा यो कह्य हय : चालीस साल बीतन पर मय मिस्र देश को लोगों ख उन राज्यों को बीच सी जमा करूं, जेको म हि तितर-बितर भयो होतो; 14 अऊर मय मिस्रियों ख बन्धुवायी सी छुड़ाय क पत्रास देश म लाऊं, जो उन्की जन्मभूमि हय, फिर सी बसाऊं; अऊर वहां उन्को छोटो सो राज्य होय जायेंन। 15 ऊ सब राज्यों म छोटो होयेंन, अऊर फिर ऊ दूसरो राज्यों पर अपनो मुंड नहीं उठायेंन; कहालीकि मय मिस्रियों ख असो घटाऊं कि हि राज्य राज्य पर फिर कभी शासन नहीं करेंन। 16 मिस्र फिर इस्राएल को घराना को भरोसा को वजह नहीं होयेंन, कहालीकि जब हि फिर उन्को तरफ देखन लगेंन, तब हि उन्को अधर्म ख याद करेंन। तब हि जान लेयेंन कि मय परमेश्वर आय।"

राजा नबूकदनेस्सर मिस्र देश ख हरायेंन

17 फिर सत्ताईसवो साल को पहिलो दिन ख परमेश्वर को यो वचन मोरो जवर पहुंच्यो : 18 "हे आदमी की सन्तान, बेबीलोन को राजा नबूकदनेस्सर न सोर नगर ख घेरन म अपनी सेना सी बड़ी मेहनत करायी; हर एक को मुंड को बाल झड़ गयो, अऊर हर एक को कन्धा छिल गयो; तब भी ओख अऊर नहीं ओको सैनिकों ख अपनो यो कठोर मेहनत की मजूरी सोर देश सी हासिल भयी। 19 यो वजह परमेश्वर यहोवा यो कह्य हय : देख, मय बेबीलोन को राजा नबूकदनेस्सर ख मिस्र देश देऊं, अऊर ऊ ओकी भीड़ ख ले क जायेंन, अऊर ओकी धन-सम्पत्ति लूट क अपनो कब्जा म कर लेयेंन; अऊर या ओकी सेना की मजूरी होयेंन। 20 मय न ओकी मेहनत को बदला म ओख मिस्र देश येकोलायी दियो हय कि उन लोगों न मोरो लायी काम करयो होतो, परमेश्वर यहोवा की या वानी हय।

21 "उच समय म इस्राएल को घराना म सामर्थ को एक सींग पैदा करूं, अऊर उन्को बीच म तोरो मुंह खोलूं। तब हि जान लेयेंन कि मय परमेश्वर आय।"