यहेजकेल 6

परमेश्वर मूर्तिपूजा की निन्दा करय हय

1 फिर परमेश्वर को यो वचन मोरो जवर पहुंच्यो : 2 "हे आदमी की सन्तान, अपनो मुख इस्राएल की पहाड़ी को तरफ कर क् उन्को खिलाफ भविष्यवानी कर, 3 अऊर कह्य, हे इस्राएल को पहाड़ो, प्रभु परमेश्वर को वचन सुनो! प्रभु परमेश्वर पहाड़ो अऊर पहाड़ियों सी, अऊर नाला अऊर चारागाह मैदान सी यो कह्य हय : देखो, मय तुम पर तलवार चलवाऊं, अऊर तुम्हरो पूजा को ऊंचो जागावों को नाश करूं। 4 तुम्हरी वेदियां उजड़ जायेंन अऊर तुम्हरी सूर्य की मूर्तियां तोड़ी जायेंन; अऊर मय तुम म सी मरयो हुयो लोगों ख तुम्हरी मूर्तियों को आगु फेक देऊं। 5 मय इस्राएल को लोगों को शवों ख उन्की मूर्तियों को सामने रखूं, अऊर उन्की हड्डियों ख तुम्हरी वेदियों को चारयी तरफ बिखेर देऊं। 6 तुम्हरो जितनो बसायो हुयो नगर हय, हि सब उजड़ जायेंन, कि तुम्हरो पूजा की जागा भी खण्डर होय जायेंन, तुम्हरी वेदियां उजड़ेंन अऊर गिरायी जायेंन, अऊर तुम्हरी मूर्तियां तोड़ी जायेंन अऊर तुम्हरी सूर्य की मूर्तियां तुकड़ा तुकड़ा होय जायेंन; अऊर तुम्हरी पूरी कारीगरी मिटायी जायेंन। 7 तुम्हरो बीच म शवों को ढेर लग्यो रहेंन, तब तुम जान लेवो कि मय परमेश्वर आय।

8 "तब भी मय कितनो ख बचायो रखूं। येकोलायी जब तुम देश देश म तितर-बितर होय जावो, तब राष्ट्र को बीच तुम्हरो कुछ लोग तलवार को मार सी बच जायेंन। 9 हि बच्यो हुयो लोग, उन जातियों को बीच, जिन म हि बन्दी होय क रहेंन, मोख याद करेंन; अऊर यो भी कि हमरो व्यभिचारी दिल परमेश्वर सी कसो हट गयो हय, अऊर व्यभिचारिनी कि जसी हमरी आखी मूर्तियों पर कसी लगी हय, जेकोसी परमेश्वर को मन टूट्यो हय। यो रीति सी उन बुरायीयों को वजह, जो उन्न अपनो घृणित काम कर क् करयो हय, हि अपनी नजर म घृणित ठहरेंन। 10 तब हि जान लेयेंन कि मय परमेश्वर आय, अऊर उन्की पूरी हानि करन लायी मय न जो यो कह्यो होतो, ऊ बेकार नहीं कह्यो होतो।"

11 प्रभु परमेश्वर यो कह्य हय : "अपनो हाथ पर हाथ मार क अऊर पाय पटक क कहो, इस्राएल को घराना को पूरो घिनौनो कामों पर हाय, हाय, कहालीकि हि तलवार सी, भूखमरी, अऊर महामारी सी मर जायेंन। 12 जो दूर हय हि बीमारी सी मरेंन, अऊर जो जवर हय हि तलवार सी मरेंन, अऊर जो नगर म रहतो हुयो बच जायेंन, हि भूख सी मरेंन। यो तरह मय अपनी क्रोध की शक्ति ख भड़काऊं। 13 जब हर एक ऊची पहाड़ी अऊर पहाड़ों की हर एक सेंडी पर, अऊर हर एक हरो झाड़ को खल्लो, अऊर हर एक घनो बांझ नाम को झाड़ की छाया म, जहां जहां हि अपनी सब मूर्तियों ख सुखदायक सुगन्ध अत्तर चढ़ावय हय, वहां उन्को मरयो हुयो लोगों को शव अपनी वेदियों को आजु-बाजू अपनी मूर्तियों को बीच म पड़्यो रहेंन; तब तुम लोग जान लेवो कि मय परमेश्वर आय। 14 मय अपनो हाथ उन्को खिलाफ बढ़ाय क ऊ देश ख पूरो घरो समेत जंगल सी ले क रिबला नगर तक उजाड़ कर देऊं। तब हि जान लेयेंन कि मय परमेश्वर आय।"