1 Alaye ə̂në mə yində e ngbatshe kɔ, e zä zä lɔsu e gâ pâ əpʉ yîrə̂ nɔ̂ ne; bale e wü tshelə ayirə̂ nə dîrî dîrî ndə kə wu kədə əndje sə tə aənə̂ Ndjapä, mbrə ə̂në aafrɔ aawopandəma Ndjapä ngbatshe zâ tshepashɔ gâ ye. 2 Ərə ə̂në e sə kə wusə̂ Yîrə̂ Ndjapä nə tə̂ äwä nə kɔ kə də̂: yîrə̂ nɔ̂ ə̂në ə yerɔ Jezu Kristə nə ə̂në tshə nâ tə əzü kɔ, ə sə tə ənə̂ Ndjapä. 3 Â yîrə̂ nɔ̂ ə̂në ə yerɔ Jezu nə yerɔ rə ne kɔ, ə sə sə tə ənə̂ Ndjapä ne; ənə̂ əyïkowɔ nə̂ Kristə nə kə sə̂, ə̂në e djî ndə əpʉ ye ə pa tshə sə kə na nə kɔ, â kpəsəye tshə sə̂ pâ ashɔ gâ ye.

4 E-e, aneshe nə̂ əmə, e sə tə azü nə̂ Ndjapä, â e rô pâ aafrɔ aawopandəma Ndjapä nə də awlra gâ ye, mbrə ə̂në Yîrə̂ nə ə̂në tshə sə lə e kɔ, tshə rô ətshə nə̂ sə̂ ə̂në tshə sə pâ ashɔ nə kɔ gâ ye. 5 Əndje, əndje sə tə azü tshepashɔ. Âdârə ə̂në əndje sə kə pa əpʉ mata azü tshepashɔ nə kɔ, â tshepashɔ nə sə kə dji əndje kɔ kə sə̂. 6 Əzə̂, a sə tə azü nə̂ Ndjapä. Əzü ə̂në tshə wusə̂ Ndjapä, tshə sə kə dji əzə̂; əzü ə̂në tshə sə sə tə ənə̂ Ndjapä nə ne kɔ, tshə sə sə kə dji əzə̂ ne: ərə ə̂në a sə kə wusə̂ Yîrə̂ djatra əpʉ də yîrə̂ kə djingli azü tə̂ äwänə kɔ kə sə̂.

7 Alaye ə̂në mə yində e ngbatshe kɔ, a yï tə̂ əzə̂ lə takpa tə̂ əzə̂, mbrə ə̂në kə yi tə̂ to mâ ndə Ndjapä, â əzü nɔ̂ ə̂në tshə sə kə yində azü, Ndjapä kə zû ətshə â tshə wusə̂ Ndjapä nə. 8 Əzü ə̂në tshə yində azü yi ne kɔ, tshə wûsə̂ Ndjapä wû alɔ bale ne, mbrə ə̂në Ndjapä nə kə də̂ kə yi tə̂. 9 Äwä ə̂në Ndjapä nə yîsə̂ kə yində əzə̂ ə̂në tshə yîndə əzə̂ kɔ gashu kɔ kə səye: tshə wlâ Ɨrɨ nə kʉ kpiabale gâ pâ ashɔ ndə kə pa a sə də sorô tə̂ äwä ye. 10 Tshelə âdâ kə yi tə̂ nə kə səye: ə də̂ əzə̂ də̂ kə yində Ndjapä nə ne, bale ətshə, tshə yîndə əzə̂ ə wlâ Ɨrɨ nə ndə kə pa tshə tshu mbrə əzə̂ ə gba tshelə anyaka lə kumu əzə̂.

11 Alaye ə̂në mə yində e ngbatshe kɔ, ə̂në Ndjapä nə yîndə əzə̂ ngbatshe rə kɔ, əzə̂ ndje, a lï ndə kə pa a yi tə̂ əzə̂ lə takpa tə̂ əzə̂. 12 Əzü bale wû Ndjapä wû alɔ bale ne. Bale, kədə a sə kə yi tə̂ əzə̂ lə takpa tə̂ əzə̂, Ndjapä nə sə tə̂ lɔsu əzə̂ â äwä kə yi tə̂ nə̂ ye nə, ndəma nə sə kə mbrə nə lə əzə̂.

13 A sə kə wusə̂ nə ə pa a daka pə lə ye, mata ə̂në tshə daka pə lə əzə̂ kɔ tə̂ äwä ərə səye: tshə zâ Yîrə̂ ye kə əzə̂ gâ ye. 14 Â ä-ä, ä wû də ala ä â sə kə pa ndəma nə ə pa Abä wlâ Ɨrɨ nə tə Awoshe azü tshepashɔ. 15 Əzü ə̂në tshə yerɔ Jezu tə Ɨrɨ Ndjapä nə, Ndjapä nə sə tə̂ lɔsu ye â tshə sə ndje lə Ndjapä nə. 16 Â əzə̂, a wusə̂ äwä kə yində əzə̂ ə̂në Ndjapä nə yîndə əzə̂ gâ ye kɔ, â a zâ lɔsu əzə̂ gâ tə̂ nə.

Ndjapä nə kə də̂ kə yi tə̂. Əzü ə̂në tshə daka pə tə̂ äwä kə yi tə̂, tshə sə lə Ndjapä nə, â Ndjapä nə sə tə̂ lɔsu ye. 17 Lə ərə səkɔ də̂ ndəma kə yi tə̂ nə sə kə mbrə lə takpa tə̂ əzə̂, kanika lɔsu əzə̂ tɔ tɔ kpi kpi kpi də awa tə̂ alɔ ngbanga ne, mbrə ə̂në kə sə əzə̂ pâ ashɔ səye sə mata ənə̂ Kristə nə. 18 Awa sə sə lə kə yi tə̂ ne, bale djatra kə yi tə̂ sə kə grɔ awa ngrʉ̂ gashe, mbrə ə̂në awa yisə̂ nə ə pa əpʉ sə lə kumu əzü, â əzü ə̂në tshə sə kə mbrə awa nə kɔ, tshə nê nê lə kə yi tə̂ nə ne.

19 Ənə̂ əzə̂, kə yi tə̂ sə tə̂ lɔsu əzə̂, mbrə ə̂në ətshə, Ndjapä nə, tshə yîndə əzə̂ angbʉlînə. 20 Kədə ə̈bə̈ əzü kə pa: «Mə yində Ndjapä», â tshelə ye wəra tə̂ ye tə̂ aye nə, tshə sə tə əyïəterə, mbrə ə̂në əzü ə̂në tshə yi yində aye nə, ə̂në tshə sə kə wu ətshə ə wu kɔ ne, tshə lï lï ndə kə pa tshə yində Ndjapä nə, ə̂në tshə wu ətshə wu ne kɔ ne. 21 Â əpʉ ə̂në Kristə nə zâ ama də nə kə əzə̂ kɔ kə səye: əzü ə̂në tshə yində Ndjapä, tshə yï ndje ndə aye nə.