1 Äwä vəta ndə kə pa mə na mâ ndə e je kə sə̂. Mata ə̂në Fraka nə̂ Ndjapä pâ: «Əndje sə kə wa tshelə əpʉ nɔ̂ mandâ əpʉ ama azü bishi wala vəta ə̂në əndje wusə̂ ərə gâ pâ əpʉ səkɔ.»* 2 Alɔ ə̂në mə sə̂ lə takpa tə̂ e tə̂ bishi nə kɔ, mə pâ əpʉ səye gâ ye, â kpəsəye ə̂në mə sə sə lə takpa tə̂ e ne kɔ, mə sə kə pa nə kwatə̂mə kə azü ə̂në əndje mbrə̂ nyaka ətshinə gâ ye kɔ, ndje kə ə̂dû azü nɔ̂: kədə mə do tə̂ əmə â na mâ je, mə sə sə kə wu əyo ə̈bə̈ əzü bale ne; 3 mbrə ə̂në e yində kə wu ə̈bə̈ ərə ə̂në ə yisə̂ nə ə pa Kristə nə kə pa əpʉ lə ama əmə kɔ. Alɔ ə̂në Kristə nə sə kə ma kosəra lə takpa tə̂ e, tshə mɔ mɔ ne, bale tshə sə kə yisə̂ awlra nə̂ ye gashu lə takpa tə̂ e. 4 Djatra əpʉ, əndje kû ətshə gâ ala masheyɔ mbrə ə̂në tshə mɔ ə mɔ kɔ, bale tshə sə tə sorô tə̂ äwä awlra nə̂ Ndjapä. Ä-ä ndje, ä mɔ ə mɔ lə ye, bale ä sə kə sə tə asorô də aəndje tə̂ äwä awlra nə̂ Ndjapä nə, e wu je.

5 E wü tə̂ e də ə̂tə̂ e, e trä lɔsu e də ə̂tə̂ e, ndə kə pa e wu kədə e sə tə̂ äwä lɔsu. E wusə̂ nə wu kpro ə pa Jezu Kristə nə sə tə̂ lɔsu e ne a? Əte də̂ ne, e sə sə kə yisə̂ nə ə pa e sə tə̂ äwä lɔsu nə ne. 6 Bale, mə yində nə ə pa e wusə̂ nə kpro ə pa ä sə kə yisə̂ nə ə pa ä sə tə̂ äwä lɔsu. 7 Ä sə kə yu Ndjapä ndə kə pa e mbrə ə̈bə̈ əmbrʉ ərə mbrə bale ne. Ä yində nə yi ə pa ä yisə̂ nə gashu ə pa ä sɔ̂ ənə̂ ä gâ ye ne, bale ä yində kə pa ä wu e, e mbrə ə̂rɔ̂ ərə, kədə ə sə a pa də ä te ənə̂ ä gâ ye. 8 Mbrə ə̂në ä lï lï ndə kə pa ä mbrə ə̈bə̈ ərə bale gbo djatra əpʉ ne, bale ä sə kə mbrə ərə kʉ mbrə djatra əpʉ nə. 9 Tshelə ä sə də ə̂rû alɔ ə̂në ä mɔ ənə̂ ä ə mɔ â e gbɔ ənə̂ e ə gbɔ. Ərə ə̂në ä sə kə yu Ndjapä mbrə nə kɔ kə də̂ kə pa e sə tə azü ə̂në e lî nɔ̂ gâ ye. 10 Âdârə ə̂në mə ta əpʉ səye kə e, alɔ ə̂në mə sə sə lə takpa tə̂ e ne kɔ kə sə̂, ndə kə pa, alɔ ə̂në mə sə kə sə je lə takpa tə̂ e, mə sə sə kə nga ə nga kə e ne. Mbrə ə̂në awlra ə̂në Âgbɔ̂ Əyïngerə zâ kə əmə kɔ ə sə ndə kə pa mə gbɔgbɔ e də nə, bale ə sə sə ndə kə pa mə ndɨ e də nə ne.

11 Alaye əmə, ə̂dû əpʉ nə, e sə̈ də ə̂rû, e prä äwä ndə kə pa e sə tə azü ə̂në əndje lî nɔ̂ gâ ye kɔ, e gbɔ̈gbɔ lɔsu angâ e, e sə̈ kʉ də əpʉ lɔsu bale, e sə̈ də blatshe lə takpa tə̂ e, kanika Ndjapä ə̂në tshə yində azü kɔ ə sə ndje tə Ndjapä blatshe kɔ sə də e.

12 E blä tə̂ e lə takpa tə̂ e tə̂ äwä kə ɔ ama e tə alaye azü.

Azü nə̂ Ndjapä nɔ̂ bla e.

13 Ə̂rɔ̂tə̂ Âgbɔ̂ Əyïngerə Jezu Kristə də kə yi tə̂ nə̂ Ndjapä gâ ndə əpʉ lɔsu kʉ bale tə̂ äwä Âgbɔ̂ Yîrə̂ sə̈ də e nɔ̂!