1 Əmə, Palɔ gâ ndə Timɔte, tə alayïkosəra nə̂ Jezu Kristə, ä wla ngrowô səye kə azü nɔ̂ ə̂në əndje sə tə azü nə̂ Ndjapä tə̂ äwä Jezu Kristə, ə̂në əndje sə lə gala Flipə kɔ. Ä wla ndje ngrowô nə kə azü ə̂në əndje sə gâ tə̂ kumu Laglizə kɔ gâ ndə adiakrə.

2 Abä əzə̂ də Ndjapä gâ ndə Âgbɔ̂ Əyïngerə Jezu Kristə mbrə̈ ə̂rɔ̂tə̂ əndje kə e ə zä blatshe kə e!

3 Mə sə kə za mərshe kə Ndjapä nə̂ əmə alɔnɔ̂, alɔ ə̂në mə sə kə li tshelə əmə tə̂ e kɔ. 4 Alɔ ə̂në mə sə kə yu Ndjapä mbrə e nɔ̂ kɔ, mə sə kə mbrə nə alɔnɔ̂ də ə̂rû, 5 mbrə ə̂në e yî kəna kə əmə lə kosəra kə mʉ Ə̂rɔ̂ Əpʉ ə vɔ̂tə̂ nə tə̂ əlî əlo nə ʉrrr ndjɔ kpəsəye. 6 Mə wusə̂ nə tə djatra əpʉ ə pa: Ndjapä ə̂në tshə vɔ̂tə̂ ə̈bə̈ ə̂rɔ̂ kosəra lə e kɔ, tshə sə kə na də nə ʉrrr ndjɔ gâ tə̂ ama nə, tə̂ əlo kə gu Jezu Kristə nə. 7 Ə sə də djatra äwänə ndə kə pa lɔsu əmə daka pə gâ pâ e nɔ̂ rə, mbrə ə̂në əpʉ e za lɔsu əmə rô pâ nə â e-e nɔ̂, e sə lə ə̂rɔ̂tə̂ sə̂ ə̂në Ndjapä mbrə̂ kə əmə kɔ, ə̂në mə sə lə anda kânga ndje alɔ ə̂në mə sə kə pa əpʉ mbrə Ə̂rɔ̂ Əpʉ ətshi azü â sə kə mʉ nə na na ye də awlra kɔ. 8 Ayî, Ndjapä wusə̂ nə ə pa, tə djatra əpʉ, mə yində e nɔ̂ də kə yî tə̂ nə̂ Jezu Kristə.

9 Ərə ə̂në mə sə kə yu tshuku nə lə aəpʉ ə̂në mə pa kə Ndjapä kɔ kə də̂ ə pa kə yində azü ə̂në e yində əndje kɔ gërə alɔnɔ̂ lə kə wusə̂ ərə də kə wusə̂ âdâ ərə dîrî dîrî, 10 ndə kə pa e wusə̂ äwä kə yerɔ ərə ə̂në ə sə tə âgbɔ̂ ərə nə kɔ, kanika e sə mvo ə sə sə də ə̈bə̈ əpʉ lə akrɔ e tə̂ alɔ kə gu Kristə nə ne. 11 Bale, e su ə su trɔ̂ də aərə ə̂në ə sə də äwänə kɔ, ə̂në ə to mâ ndə Jezu Kristə nə kɔ, ndə kə mbe Ndjapä ə tɔlɔ ətshə.

12 Alaye əmə, mə yində nə ə pa e wusə̂ ərə səye: ərə ə̂në ə wûtu gâ tə̂ əmə kɔ, ə mbrə̂ ndje ndə kə pa Ə̂rɔ̂ Əpʉ nə na na ye gâ ətshinə. 13 Mbrə ə̂në atrugu nɔ̂ ə̂në əndje sə̂ kə bata anda ngerə nə̂ âgbɔ̂ əyïngerə də ə̂dû azü nɔ̂ kɔ wusə̂ nə ə pa mbrə kosəra nə̂ Kristə ə̂në mə mbrə kɔ də̂ mə sə lə anda kânga kɔ. 14 Â kə sə əmə lə kânga nə zâ äwä kə aga alaye ndə kə pa əndje za lɔsu əndje nɔ̂ kə Âgbɔ̂ Əyïngerə nə: əndje sɔtə̂ awlra kwatəndje ə pa Əpʉ Ndjapä pa də awa ne.

15 Alabə̈ azü nə, tə djatra əpʉ, sə kə pa əpʉ gâ pâ Kristə nə tə̂ äwä manda də kə pra ama, bale alabə̈ əndje nə sə kə mʉ əpʉ Kristə nə də ə̂rɔ̂ lɔsu. 16 Abishi azü nə sə kə mbrə ərə mbrə ə̂në əndje yində əmə ə wusə̂ nə ə pa mə sə kotəye ndə kə pa mə pa əpʉ ətshi azü gâ pâ Ə̂rɔ̂ Əpʉ nə. 17 Bale, aangbʉlî azü nə sə kə mʉ əpʉ Kristə nə tə̂ äwä əgo lɔsu əndje də ə̂tə̂ əndje â aərə ə̂në əndje sə kə pra äwä nə kɔ, ə sə sə mvo ne: əndje wu ənə̂ əndje ə pa alane sə kə za əyo kwatəndje gâ pâ kə sə əmə lə kânga nə.

18 Ə sə sə tə ə̈bə̈ ərə ne! Lə aərə nɔ̂, wala tə ə̈bə̈ əpʉ ə̂në ə̈bə̈ ərə sə mandâ nə wala tə djatra əpʉ, əndje mʉ̂ əpʉ Kristə nə gâ ye, â ə za ə̂rû gâ tə̂ lɔsu əmə. Mə sə kʉ də ə̂rû tə̂ äwä nə alɔnɔ̂. 19 Mbrə ə̂në mə wusə̂ nə ə pa ə sə kə do tə̂ ye tə äwä kə djɔ əmə lə nə mbrə kə yu Ndjapä ə̂në e yu ətshə kɔ də kə tɨ əmə ə̂në Yîrə̂ Jezu Kristə ə tɨ əmə gâ lafɔ kɔ. 20 Lïndə ərə ə̂në mə sə kə ka mbrə nə kɔ, ə̂në mə za lɔsu əmə gâ pâ nə kɔ, gana sə sə kə ngɔ əmə mbrə ə̈bə̈ ərə bale ne. Bale, kpəsəye wala alɔnɔ̂, mə sə sə də awa ne, â wala tə̂ äwä sorô əmə, wala tə̂ äwä kuzu əmə, azü nɔ̂ wu əgerə Kristə nə lə akwa əmə. 21 Mbrə ə̂në, ənə̂ əmə, kə sə tə sorô, kə də̂ Kristə nə, â kuzu sə tə ə̈bə̈ ərə ə̂në ə rô sorô nə. 22 Bale, kədə mə daka pə tə sorô, ndə kə pa mə mbrə ə̈bə̈ ə̂rɔ̂ kosəra, mə wusə̂ ərə ə̂në mə ke kɔ wu ne. 23 Aərə nə sə kə pro əmə djoko mbage djoko mbage: mə sə də əgo ndə kə ro nə â ä də Kristə nə ə sə kpə ə̂sə̂ nə bale, ərə ə̂në ə rô kəmə ə̂dû ərə nə nɔ̂ kɔ kə sə̂. 24 Bale, mbrə e, ə lï ndə kə pa mə daka pə tə sorô. 25 Mə wûsə̂ nə mâ tə̂ lɔsu əmə ə pa mə sə kə daka pə ngotə̂ e nɔ̂ kwatəndje, mə wusə̂ nə, ndə kə pa mə tɨ e gâ lafɔ, e na gâ ətshinə ə sə də ə̂rû lə əpʉ lɔsu e nə. 26 Rəkɔ, alɔ ə̂në mə sə kə gu gâ ngotə̂ e, e sə kə da əkro e tə̂ Jezu Kristə nə mbrə əmə.

27 Əpʉ bale, e mbrə̈ tə̂ e ə lï də Ə̂rɔ̂ Əpʉ nə̂ Kristə nə, kanika, alɔ ə̂në mə sə kə na ndə kə wu e, wala ə də̂ mə sə sə je ne, mə dji ndə e ə wusə̂ nə ə pa e ka gbʉ gbʉ gbʉ lə kə sə e də lɔsu bale, â e sə kə mbrə awlra də lɔsu bale mbrə əpʉ lɔsu ə̂në ə ka gâ pâ Ə̂rɔ̂ Əpʉ nə kɔ. 28 Â e kätə̂ äwä kä kə alayïəpʉ nə̂ əzə̂ ndə kə pa əndje mbrə awa gâ lə e ne. Ənə̂ əndje, ə sə tə ə̈bə̈ ərə ə̂në ə yisə̂ nə ə pa əndje zâ äwä kuzu gâ ye, bale, ənə̂ e, ə sə tə ə̈bə̈ ərə ə̂në ə yisə̂ nə ə pa e shê lə kuzu gâ ye, â ə sə tə ərə ə̂në ə tô mâ ndə Ndjapä kɔ. 29 Mbrə ə̂në, gâ pâ əpʉ Kristə nə, Ndjapä nə mbrə̂ ə̂rɔ̂tə̂ ye mbrə̂ kə e kʉ ndə kə pa e za lɔsu e kə ətshə ne, bale ndje ndə kə pa e wu əyo mbrə ətshə, 30 ə te gâ lə kʉtə̂ awlra sə̂ ə̂në e wû əmə gâ ye də kə mbrə nə kɔ, â kpəsəye, e daka pə kə dji ndə nə tə̂ əmə kɔ.