João 18

Atrugu têgbɔ Jezu

1 Mandâ aəpʉ sə̂ ə̂në Jezu pâ kɔ, ətshə də atrawaya nə̂ ye nə âfɔ ə rô ə nâ mâ ətshî Sedrɔ, tə̂ ətshe ə̂në ə̈bə̈ aya kəndɨ sə̂ je tə̂ nə kɔ, ə̂në tshə lî gâ lə nə də atrawaya nə̂ ye nə kɔ. 2 Judasə, ətshə nə ə̂në tshə ka Jezu je kɔ, wûsə̂ ətshe nə gâ ye, mbrə ə̂në Jezu də atrawaya nə̂ ye nə sə̂ kə ngbo tə̂ əndje alɔnɔ̂ mâ je. 3 Rəkɔ, Judasə nə kô aangbɔ atrugu ə nâ də əndje gâ ndə aawobata Anda Ndjapä ə̂në aâgbɔ̂ azü nə̂ aawotokrɔ gâ ndə Afariza nə kô əndje gâ ndə ye kɔ. Əndje kô atadja də alamba gâ ndə aərə koshe â nâ də nə kɔ. 4 Jezu nə wûsə̂ aərə nɔ̂ ə̂në ə wutu gâ tə̂ ye je kɔ gâ ye, ə nâ gâ tə̂ əndje ə pâ kə əndje ə pa: «Əde də̂ e pra ətshə kɔ?» 5 Əndje kîrə əpʉ kə ətshə ə pa: «Jezu, əzü əgɔ Nazaratə.» Tshə pâ kə əndje ə pa: «Əmə kə səye.»

Judasə nə, ə̂në tshə kâ Jezu nə kɔ, kâ gâ lə takpa tə̂ əndje. 6 Alɔ ə̂në Jezu nə pâ kə əndje ə pa: «Əmə kə səye» kɔ, əndje nâ gâ mandâ əndje gâ mandâ əndje ə yɔ̂ gbo ətshe gâ tə̂ ashɔ. 7 Tshə yû əndje kwatə̂ye ə pa: «Əde də̂ e pra ətshə kɔ?» Bale, əndje pâ kə ətshə ə pa: «Jezu, əzü əgɔ Nazaratə.» 8 Jezu kîrə əpʉ ə pa: «Mə pâ kə e ə pa əmə kə səye. Rəkɔ, kədə əmə də̂ e pra əmə kɔ, e kätə̂ azü səke əndje gu na ye.»

9 Ə sə rə ndə kə pa ndəma əpʉ ə̂në tshə pâ kɔ mbrə, ə̂në tshə pâ: «Ə̈bə̈ əzü bale lə takpa tə̂ azü ə̂në bə kô əndje kə əmə kɔ yû yû tə̂ əmə ne.» 10 Shemɔ Piarə, ə̂në tshə sə̂ də ə̈ngrʉ̈ kamba kɔ, gbə̂tɔ ə̈ngrʉ̈ kamba nə lə akwa nə ə dê əyïkosəra nə̂ âgbɔ̂ awotokrɔ də nə â dê ətu ye djoko ndə ndəkɔ kprû wli-e. Əɨrɨ əyïkosəra səkɔ kə də̂ Maləkus. 11 Jezu pâ kə Piarə nə ə pa: «Kïrə də ə̈ngrʉ̈ kamba nə̂ zə nə gâ lə akwa nə. Kopo əyo ə̂në Abä zâ kə əmə ndə kə ndju nə kɔ, mə sə sə kə ndju nə ne a?»

12 Bale, aangbɔ atrugu nə də kapita nə̂ atrugu nə gâ ndə aawobata Anda Ndjapä nə̂ Ajuwufu nə têgbɔ Jezu nə ə î ətshə.

Atrugu nâ də Jezu gâ ətshi Aanə

13 Əndje gû də ətshə ətshinə mâ ndə Aanə, tə mbea Kayifə, ə̂në tshə sə̂ tə âgbɔ̂ awotokrɔ lə ə̂ngû nə səkɔ. 14 Bale, Kayifə nə kə sə̂ â mʉ̂ əpʉ kə amakɔndji nə̂ Ajuwufu â pâ: «Ə sə tə ə̂rɔ̂nə ndə kə pa kʉtə̂ əzü bale tshu mbrə azü əgɔ nə.»

Piarə blê əpʉ ə pa əne sə sə tə trawaya nə̂ Jezu ne

15 Shemɔ Piarə nə gâ ndə ə̈bə̈ ata trawaya nə sə̂ kə na mandâ Jezu nə. Âgbɔ̂ awotokrɔ nə wûsə̂ trawaya səkɔ gâ ye, â əndje də Jezu nə lî gâ lə bəngʉ nə̂ âgbɔ̂ awotokrɔ nə. 16 Bale, Piarə nə kâ pə ənə̂ ye mashu, trö də tshelə manda nə. Trawaya nə ətshə ənə̂ səkɔ, ətshə ə̂në âgbɔ̂ awotokrɔ nə wûsə̂ ye gâ ye kɔ, wûtu gashu ə pâ əpʉ kə yashe nə ə̂në tshə sə̂ kə bata manda nə kɔ â pâ Piarə nə li gâ lə anda nə. 17 Bale, əyïkosəra nə tə yashe nə ə̂në tshə sə̂ kə bata manda nə kɔ pâ əpʉ kə Piarə nə ə pa: «Əbə ndje, bə sə tə ə̈bə̈ trawaya nə̂ koshe səye ne a?» Piarə nə pâ kə ətshə ə pa: «Ə’ə ne! Mə sə sə tə trawaya nə̂ ye ne.»

18 Alayïkosəra gâ ndə aawobata Anda Ndjapä nə sə̂ kôto ə djê əwo ə sə̂ gâ ndʉ nə, mbrə ə̂në əzɨ mî ə mî. Piarə nə kâ gâ lə takpa tə̂ əndje, əwo nə sə̂ kə gu tə̂ ye.

Âgbɔ̂ awotokrɔ yû Jezu də əpʉ

19 Âgbɔ̂ awotokrɔ nə yû Jezu də əpʉ gâ pâ atrawaya nə̂ ye ndje gâ pâ əpʉ ərə ə̂në tshə yisə̂ nə kɔ. 20 Jezu kîrə əpʉ kə ətshə ə pa: «Əmə, mə pâ əpʉ kə azü nɔ̂ də ala azü. Mə yîsə̂ ərə alɔnɔ̂ lə anda aangbɔ ndje lə Anda Ndjapä, tə̂ ətshe ə̂në Ajuwufu nɔ̂ sə kə ngbo tə̂ əndje tə̂ nə kɔ, â mə pâ ə̈bə̈ əpʉ pâ bale lə angbanə ne. 21 Bə yu əmə mbrə yekɔ? Əpʉ ə̂në mə pâ gâ ye kɔ, yü azü ə̂në əndje djî əmə də əpʉ nə ə̂në mə pâ kə əndje kɔ; əndje, əndje wusə̂ əpʉ ə̂në, əmə, mə pâ kɔ tə ə̂rɔ̂nə.»

22 Kpə pâ aəpʉ səkɔ, ə̈bə̈ trugu Anda Ndjapä nə ə̂në tshə kâ kôto kɔ dâ ngâlâ Jezu nə ə pâ: «Äwä ndə kə pa bə kirə də əpʉ kə âgbɔ̂ awotokrɔ nə sə rə a?» 23 Jezu kîrə əpʉ kə ətshə ə pa: «Kədə mə pâ əpʉ nə pâ də äwänə ne, yïsə̂ əmbrʉ əpʉ nə ə̂në mə pâ kɔ. Â kədə mə pâ əpʉ nə də äwänə, bə dâ əmə mbrə yekɔ?»

24 Bale, Jezu sə̂ pə lə ə̂wû â Aanə nə wlâ ətshə kə Kayifə, âgbɔ̂ awotokrɔ nə kɔ.

Piarə kwâtə̂ye ə pa əne sə sə tə trawaya nə̂ Jezu ne

25 Shemɔ Piarə nə kâ pə kôto ə sə̂ gâ ndʉ əwo nə. Əndje yû ətshə ə pa: «Əbə ndje, bə sə sə tə ə̈bə̈ trawaya nə̂ ye ne a?» Tshə blê ə pâ əpʉ ə pa: «Bale ne, mə sə ədje əmə sə tə trawaya nə̂ ye ne!» 26 Ə̈bə̈ əyïkosəra nə̂ âgbɔ̂ awotokrɔ nə, ə̂në tshə sə̂ tə əyɔ əzü nə ə̂në Piarə nə dê ətu ye kprû kɔ pâ: «Ə də̂ əbə də̂, əmə, mə wû əbə də ətshə mâ lə kəndɨ aayɔ kɔ ne a?» 27 Piarə nə blê kwatə̂ye. Â trale, ə̈bə̈ kɔngatə kɨ̂.

Pilatə yû Jezu də əpʉ

28 Mandânə, əndje zâ Jezu mâ ndə Kayifə nə je ə nâ də ətshə mâ lə anda nə̂ komandâ əgɔ nə; pə-ê də əzɨ kə sə̂. Əndje də ə̂tə̂ əndje, əndje lî lî gâ lə anda nə̂ komandâ nə ne, ndə kə pa əndje dja tə̂ əndje dja də əmbrʉ ərə ne kanika ə zɨ rəgo Pakə nə. 29 Rəkɔ, komandâ Pilatə nə wûtu ə nâ gâ tə̂ əndje, ə yû əndje ə pa: «E lea koshe səye tə̂ əpʉ yea?» 30 Əndje kîrə əpʉ kə ətshə ə pa: «Kədə tshə sə̂ sə̂ tə əmbrʉ əzü nə, ä sə̂ sə̂ kə na kəmə də ətshə ə zâ ətshə kə əbə ne.» 31 Rəkɔ, Pilatə nə pâ kə əndje ə pa: «E zä ətshə də ə̂tə̂ e ə wä ngbanga ye ə lï də âgbɔ̂ əpʉ nə̂ e.» Əndje pâ kə ətshə ə pa: «Əndje zâ äwä zâ kə ä ndə kə pa ä wo əzü ne!»

32 Ə sə rə ndə kə pa əpʉ ə̂në Jezu pâ gâ pâ əpʉ marä kuzu ə̂në tshə tshu də nə je kɔ, ndəma nə mbrə. 33 Rəkɔ, Pilatə nə lî gâ lə anda nə ə ê Jezu gâ ətshi ye ə yû ətshə ə pa: «Əbə, bə sə tə əyïngerə nə̂ Ajuwufu a?» 34 Jezu kîrə əpʉ ə pa: «Əbə də ə̂tə̂ zə kə pa əpʉ səkɔ, wala alabə̈ azü kə pâ əpʉ nə kə əbə gâ pâ əmə kɔ a?» 35 Pilatə nə kîrə əpʉ ə pa: «Rəkɔ, əmə, mə sə tə Juwufu a? Azü əgɔ nə̂ zə gâ ndə aâgbɔ̂ azü nə̂ aawotokrɔ kə sə̂ â zâ əbə gâ lə kəna əmə kɔ; yekɔ də̂ bə mbrə̂?» 36 Jezu kîrə əpʉ ə pa: «Əgɔngerə nə̂ əmə sə sə pâ ashɔ səye ne. Kədə Əgɔngerə nə̂ əmə kə sə̂ kəmə pâ ashɔ səye, azü tshe ngotə̂ əmə sə̂ kə mbrə kəmə awlra ndə kə pa mə tê tê gâ lə kəna Ajuwufu nə ne. Bale, ə̂në a ləye, Əgɔngerə nə̂ əmə sə sə kotəye ne.» 37 Pilatə nə yû ətshə ə pa: «Rəkɔ, əbə, bə sə tə əyïngerə a?» Jezu kîrə əpʉ kə ətshə ə pa: «Əbə bə kə pa mə sə tə əyïngerə nə kɔ. Ə̂në əmə, əndje zû əmə â mə nâ gâ pâ ashɔ kɔ, mə nâ ndə kə pa mə pa əpʉ gâ pâ djatra əpʉ kə azü. Əzü nɔ̂ ə̂në tshə sə tə əzü djatra əpʉ, tshə sə kə dji əpʉ nə̂ əmə.» 38 Pilatə nə yû ətshə ə pa: «Djatra əpʉ nə də̂ yekɔ?»

Mandânə ə̂në Pilatə nə pâ əpʉ səkɔ, tshə wûtu kwatə̂ye ə nâ gâ tə̂ Ajuwufu nə ə pâ kə əndje ə pa: «Əmə, mə sɔ sɔtə̂ ə̈bə̈ əpʉ lə kumu koshe səye ə̂në ə lï də ngbanga ne. 39 Bale, mandʉ ərə nə̂ e zâ äwä ndə kə pa mə katə̂ ə̈bə̈ əzü lə kânga kə e mbrə sandaga Pakə nə. Rəkɔ, e yïndə nə ə pa mə wora də̂ əyïngerə nə̂ Ajuwufu nə kə e a?» 40 Bale, əndje vɔ̂tə̂ kə ta râwâ ə pa: «Ə’ə ne! Ə də̂ ətshə də̂ ne, bale Barabasə!» Kandää, Barabasə nə sə̂ tə ə̈bə̈ əmbrʉ əzü.