1 Alɔ ə̂në əlo saaba nə rô gâ ye kɔ, Marə̂, əzü əgɔ Magədala nə də Marə̂ əyï Zake nə gâ ndə Salome yɔ̂ kâdâ yombo ndə kə pa əndje na ə ma gâ tə̂ əko Jezu nə. 2 Pə-ê də əzɨ ə̂në alɔ vɔ̂tə̂ kə wutu nə kɔ, tə̂ angbʉlî əlo dəmashi nə, əndje nâ mâ tə̂ manda ə̂dû nə. 3 Əndje sə̂ kə pa lə takpa tə̂ əndje ə pa: «Əde kə wuru əkpʉ nə tə̂ manda ə̂dû nə kə əzə̂?»

4 Bale, əndje lîshi ə wû ə pa əndje wûru əkpʉ nə ə̂në ə sə̂ gerətshe kɔ gashe gâ ye. 5 Əndje lî gâ lə ə̂dû nə ə wû ə̈bə̈ mɔdɔ ə̂në tshə sə̂ gâ tʉ gâ ndə ndəkɔ ə yî ə̂mbî ləba kɔ. Awa mbrə̂ əndje wââ. 6 Bale, tshə pâ kə əndje ə pa: «Awa kätə̂ kə mbrə e gâ ye! E sə kə pra Jezu, əzü əgɔ Nazaratə, ətshə ə̂në əndje kû ətshə gâ ala masheyɔ gâ ye kɔ. Tshə shê gâ ye, tshə sə sə kotəye ne. Ətshe ə̂në əndje zâ ətshə gâ tə̂ nə kɔ kə səye. 7 Bale, e gü ə pä kə atrawaya nə̂ ye gâ ndə Piarə ə pa: "E wü-a, tshə sə kə na əlînə tə̂ e mâ lə ashɔ əgɔ Galile. E sə kə wu ətshə mâ je, mata ə̂në tshə pâ ndə nə kə e gâ ye kɔ."»

8 Əndje wûtu lə ə̂dû nə gashu ə kpê â sə̂ kə gugu də awa. Əndje pâ ndə əpʉ nə pâ bale kə ə̈bə̈ əzü bale ne mbrə ə̂në awa mâ əndje.

* 16.9-20 Aə̈ndö 9 ʉrrr gâ tə̂ 20 sə sə lə alabə̈ aangbrɔ afraka Ndjapä də ama grakə ne. [9 Jezu shê də əzɨ tə̂ əlî əlo dəmashi nə ə mâ tə̂ ye angbʉlînə kə Marə̂, əzü əgɔ Magədala, ə̂në tshə grɔ̂ aafrɔ ayirə̂ lə ye mindû amanə bishi leme-e gâ ye kɔ. 10 Marə̂ nə nâ ə pâ ndəma əpʉ nə kə azü ə̂në əndje sə̂ də mbadja ə sə̂ kə kɨ nə kɔ. 11 Bale, alɔ ə̂në azü nə djî ə pa Jezu nə sə̂ tə sorô â Marə̂ nə wû ətshə kɔ, əndje zâ lɔsu əndje zâ gâ pâ əpʉ nə̂ ye nə ne.

12 Mandânə, Jezu mâ tə̂ ye tə̂ ə̈bə̈ äwä kpî kə atrawaya bishi ə̂në əndje sə̂ tə̂ äwä ə sə̂ kə na na ye gâ lə ə̈bə̈ aya əgɔ kɔ. 13 Əndje dô tə̂ əndje ə gû ə pâ ndəma əpʉ nə kə ə̂dû atrawaya nə â əndje yîndə əpʉ nə̂ əndje nə bishi kɔ yî ne.

14 Gâ mandânə, Jezu mâ tə̂ ye kə atrawaya morofo amanə bale alɔ ə̂në əndje sə̂ kə zɨ rəgo kɔ. Tshə ngâ kə əndje mbrə ə̂në əndje sə̂ sə̂ də lɔsu ne â lɔsu əndje gbɔ ə gbɔ â shêra əpʉ nə̂ azü ə̂në əndje wû ətshə ə̂në tshə shê gâ ye kɔ. 15 Mandânə, Jezu pâ kə atrawaya nə ə pa: «E nä na ye pâ ashɔ nɔ̂ ə mʉ̈ Ə̂rɔ̂ Əpʉ kə azü nɔ̂. 16 Əzü ə̂në tshə yində əpʉ nə â za batamo, Ndjapä sə kə she ətshə lə kuzu. Bale, əzü ə̂në tshə yində əpʉ nə yi ne, Ndjapä sə kə wa ngbanga gâ pâ ye. 17 Azü ə̂në əndje sə kə yində əpʉ nə, aərə ə̈lü ə̂në əndje sə kə mbrə nə kɔ kə səye: də əɨrɨ əmə, əndje sə kə grɔ aafrɔ ayirə̂; əndje sə kə pa əpʉ də tafa ama; 18 əndje sə kə tegbɔ aəkrɔ də kəna əndje; kədə əndje ndju əmbrʉ ayɔ, ə sə sə kə mbrə ə̈bə̈ ərə tə̂ əndje bale ne; əndje sə kə ko kəna əndje gâ pâ alayïrəka â arəka nə sə kə katə̂ əndje.»

19 Mandânə ə̂në Jezu, Âgbɔ̂ Əyïngerə nə, pâ əpʉ kə əndje rə kɔ, Ndjapä zâ ətshə ə ô də ətshə na na ye mâ lafɔ â tshə sə̂ gâ tʉ gâ ndə ndəkɔ Ndjapä nə. 20 Atrawaya nə nâ na ye ə mʉ̂ Ə̂rɔ̂ Əpʉ nə tə̂ ətshe nɔ̂. Awlra nə̂ Âgbɔ̂ Əyïngerə nə sə̂ gâ ndə əndje ə mâ ndə kə pa əpʉ nə sə tə djatra əpʉ tə̂ äwä aərə ə̈lü ə̂në ə sə kə na mandâ əpʉ nə kɔ.]