1 Banakwaina bangu, musitondejele lushalulo, mukabhatilila mukudimbwa munaShe wedu Jesu Kristo, Tezi wedu wolukujo. 2 Kana unhu ulineseka lyendalama akale ekambala zwimbalo zwibuya angozha mubungano, akale kungoswika unhu unosheta eline zwimbalo zwilosofwala, 3 mopa lulemeko kunooyo ulombala zwanana kova muti kwaali, "Hecho chibhula chibuyanana chicho," koga kunsheti moti "Ima yopo kana kuti ugala pasi pelyo namakumbo angu." 4 Amujimushalujana, pakati penu na, moba batongi banamiyeyo mibi? 5 Banakwaina banodikana whililani. Mwali ajakashaluja na, yabo banosheta munyika kuti bebebafumi mukudimbwa akale bebe balyifumi bobushe bwaalobimbisa kunabo banooda? 6 Koga imwi amutolemekeja basheti. Abatoba bafumi banomudyamija na, akale atoba ibo banomusenga kumakota na? 7 Akale abatoba ibo banotuka izina linolemekejwa lamunoshobwa nalo.

8 Mungozhajika undawo wobushe, sezwakulo kwalwa muwhalo, "Ida umbakijani uwo sobunozwida iwi nokuko," munota zwibuya, 9 koga mungoshalula banhu, mukumuta luchinyo, akale mulawo unobhata nondandu wokuvuna undawo 10 Nokuti kana ani azwe unolondota wose mulawo koga evuna umwempela unobeli nondandu wokuvuna yose milayo. 11 Nokuti iye wakati, "usipombole," wakati akale, "Usibulaye." Kana usinopombola koga ubulaya, unobe uvuna mulawo. 12 Nokudalo lebelekani akale muzwibhate sabanhu bachanotongwa nomulawo wolusununguko. 13 Nokuti untongo autobeli neshe kunoyo usinowhila ishe, asi ishe jinozunda untongo.

14 Banakwaina zwinobhacha neni, kana unhu eti unodimbwa koga zwito zwizwe zwisinotondejela alo? kudimbwa kukwe kungombhanchaneni. 15 Kana mwanakwaina wechinhukaji kana wechinhulume esina zwombala akale eshayiwa kulya mazhuba ose, 16 kova umwe wenu eti kwabali, "Indani zwibhodo, mujiyililwe akale ugute," esabapa zwinodiwa nombili biya zwinobhanchani? 17 Kudimbwa kana kukazwimila koga, pesina mishingo, kulofa.

18 Koga umwe angati, "Iwi unakudimbwa, asi imi ndinamishingo." Nditondeje kudimbwa kuko kusina mishingo, imi nemishingo yangu ndokutondeja kudimbwa kwangu. 19 Munovumila kuti Mwali umwempela, zwibuya. Neebo madimoni anodimbwa akale anotilimuka. 20 Iwi lema unoda kutondejwa, kuti kuvumila kusina mishingo akuna lubhancho? 21 Abhulahamu, tate bedu, ajakalulamiswa nezwito na, paakapila mwananhulumyana uwe Isaki pedebulilo? 22 Uzubweni, kuti kudimbwa nezwito zwakaba zwishinga pamwempela, kudimbwa kukwe kwaka zhajikijwa nemishingo. 23 Akale iwhalo yakazhajikijwa painoti, "Abhulahamu wakadimbwa kunaMwali, yezwi zwakata kuti ewhi ulolulama," akashobwa kuwhi unkwaina waMwali. 24 Mubweni kuti unhu unolulamiswa nemishingo iye kusi kuti kudimbwa koga.

25 Akale munzila ilokwelana, atoba imo na kuti Rahabhu invemu wakalulamisa nezwito zwizwe, paakatambula batumwa akabatizhisa neimwe inzila.

26 Sokuti umbili usina umpepo ulofa, zwakadalo nokudimbwa kusina mishingo kulofa.