1 Ani ihondo jose nokukakabajana pakati penu zwimuva kupi? Azwijimuva muzwilakamilo zwenu zwibi zwimukulwisana mukati mwenu? 2 Moda zwinhu, asi amutozwiwana, nokudalo mulozwipila kubulaya. Munolakamila zwinhu, koga amutozwiwana, ndipo pamuno kakabajana nokulwana. Amuna zwamunoda nokuti amujikumuzwikumbila kunaMwali. 3 Munokumbila koga amutotambula, nokuti munokumbilila zwisakalulama, kuti mushingise muzwilakamilo zwenu. 4 Imwi bapomboli, amutoziba kuti kuda zwenyika ndiko kuba babengi baMwali na? Nokudalo ani nani unoda kuba nkwaina wenyika unozwita umbengi waMwali 5 Amutoyeya na kuti akuna, ichokomende muwhalo inoti, "Iye ulobiga umpepo mwatili uzhele kulakamila kukulwana kunanefupa." 6 Koga ishe jaanotipa Mwali jinesimba lisimu. Sezwilokwalwa kuwhi, "Mwali unonyenyeja banoshiya, asi unopa ishe kuna banozuninipisa." 7 Nokudalo zwibigeni pasi paiye Mwali. Misikijanani naguluzhanje, nokudalo unomutizha. 8 Sendelani kunaMwali, naiye unoswendela kunamwi. Shambani maboko enu, imwi bachinyi, muchenese myoyo yenu, imwi bemyoyo mibili. 9 Whisani ishe, mufwikula akale lilani, shandulani kuseka kwenu kube kulila, lushanto lwenu ngalube kuhushubala. 10 Zwininipiseni mbeli kwaTezi, iye unomunyamulila pezhulu.

11 Banakwaina musilebelekane bubi chenuchenu. Yoyo unolebeleka bubi nomwanakwaina kana kutonga mwanakwaina uwe, unolebeleka bubi pezhulu pomulawu akale unotonga mulawo asi kana utonga mulawo autoba untobeleji womulawo koga untongi wawo. 12 Mwali ndiye ega umpi womulawu akale untongi. Ndiye ega angachija kana kupalaja. Iwindiwi aani unotonga umbakijani uwo?

13 Ngweno ndiwhilileni, imwi munoti, "Nasi kana mangwana tinoba nolwendo lokunda kunelimwe iguta, kwatichano gala igole titengesa tiwane imali." 14 Amungazibe kuti bupenyu bwenu mangwana bunobeli chini, Ini bupenyu bwenu? Nokuti munanga sefulele linoboneka kwonshaji unshoma kova libwandila. 15 Zwamunokwelela kuleba ndiyezwi, "Kana Tezi beda, tinolalama kova tita yezwi nezwi." 16 Koga ngweno moshiya nokuzwiloba chifuba, kushiya kwakadai kubi.

17 Nokuti, tingoleka kuta zwibuya tiziba kuti tokwelela kuta alo, tikumuchinya.