1 Imi Jemusi undanda waMwali naShe Jesu Kristo.

Kuna benduji gumi nembili mulomwayikana munyika jose.

Ndinomumusa.

2 Banakwaina shantani kana mwashangana nokukwejwa kulosiyanasiyana, 3 munoziba kuti kukwejwa kolubimbo lwenu ndikokunomusimisa. 4 Akale itani kuti kusimatija kuzhale kunamwi kutila kuti mube babuya balopelela, akale musinoshayiwa chinhu. 5 Kana umwe wenu eshayiwa buchenjevu, ngekumbile kunaMwali, unopa bose banhu neshe jije akale esinopandandu kuna bose, nezwo unoopiwa. 6 Koga ngekumbile mukudimbwa, pesina kukahajika, nokuti iye unokahajika unanga sebhitu legungwa linochingaija livililijwa nebhepo. 7 Yoyo unhu esilingilile kutambula chinhu kuva kunaTezi, 8 nokuti yoyo unhu unane myoyo mibili aajilojikama munzila jije.

9 Lekani mwanakwaina unolingilwa pasi ezwikuje mukunyamulwa kukwe, 10 akale umfumi mukuninipiswa kukwe, nokuti seluba lyobuhwa unofa. 11 Nokuti izhuba linobhuda nokupisa kasa lihwihwinyisa buhwa, maluba alo anowa, akale bubhodo bwalyo bunopela. Nezwo umfumi uchapalala echi pakati pokuta mishingo iye.

12 Ulokombolelwa unhu unondilambeli edimbwa koga elimukukwejwa, nokuti angozunda kukwejwa unoopiwa umbayilo waMwali waakabimbisa kunabo banounda. 13 Kusibe nounoti kana akwejwa, " Ndakwejwa naMwali," nokuti Mwali aangakwejwe nobubi akale iye apana waanokweja, 14 koga unhu wose unokwejwa paano shobelejwa akale nokuchengejwa nolulakamilo lubi lulwe. 15 Kana lulakamilo lubi lungobaipo kunozwala luchinyo, akale luchinyo lungo kubuka lunozwala lufu.

16 Banakwaina bangu balodikana, musichengwe. 17 Chose chipo chibuya nechipo chilopelelela chinova kudenga, zwiva kunaTate bezwimuniko zwokudenga basinoshanduka semintuzi inoshanduka. 18 Nokuda kukwe wakatizwala newhi lyechokomende kuti tingaba yondiya uchelo wotanga pazwibumbwa zwizwe.

19 Banakwaina bangu banodikana zibani banodikana. Unhu wose ngekambije kuwha, ngejilwe kulebeleka, ejilwe kunyema. 20 Nokuti kunyema kwonhu akutobuza bululami bunodiwa naMwali. 21 Nokudalo lashani zwose zwito zwenu zwineshambwa akale nobubi buzhele, mutambule nokuzwininipisa, iwhi lyakabyalwa munamwi linotubula kuchija myoyo yenu.

22 Koga ibani banotobeleja iwhi, akale musibe banowhilila chete, muzwichenga. 23 Kana umwe eli unowhilila iwhi koga pesina zwaanota, unanga sonhu ukumuzwiyeba chiso chiche pechiboniboni, 24 nokuti unozwilinga kova enda pakalepo unokanganwa kuti unolingika chini. 25 Koga iye yoyo unolinga kasa mumulawo ulokwelela, mulawo wolusununguko, akale kusimilila, esinowha kova ekanganwa koga eta chinhu yecho, unokombolelwa muna zwaanota.

26 Kana unhu eyeya kuti unodimbwa, koga esinokabula lulimi lulwe koga echengela mwoyo uwe, kudimbwa kukwe akutobhancha. 27 Kudimbwa kuloshambijika nokuchena mbeli kwaMwali Tate ndikoku, kushanyila inhelela nenchilikaji mubukukutu bwabo, nokuzwilondota ukashambijika munyika.