1 Banji benu musube balayiji, banakwaina bangu moziba kuti isu balayiji tinookomeselwa pakutongwa. 2 Nokuti tose tolundula kanjinji, kana umwe esinolundula panazwanoleba unobakalulama kasa. Akale unobetubula kuzwubhata. 3 Kana tibiga matomu mumilomo yamabhiza kuti ete zwatinoda, totungamila mibili yawo. 4 Neebo lingani zwikepe, kojoba zwilizwikulwana zwikwendeswa nebhepo, unokwendesa unoshingisa inhando nhukutuku kuchingunuka. 5 Kalimi kababi katukutuku koga kanoshiya nezwito zwikulwana.

Ishango gulwana linopiswa nomoto untukutuku. 6 Nokudalo kalimi moto. Kalimi kababi kasakalulama pakati pezwibabi zwombili wedu, kanobipisa umbili wose, kanopisa mamilo enyika, akale iko kanopiswa moto wegehena. 7 Wose unshobo wemhuka nenyuni, makabi, nezwipuka zwomuvula ingaba ipizwayo imhuka ingatambiswa akale yakatambiswa nabanhu, 8 koga apana unhu angatambisa kalimi, akale kalosungwala muzwibi, kazhele butulu bunabukali. 9 Tokashingisa kuboka Tezi naTate akale tokashingisa kufhizha banhu bakabumbwa nonkwejaniso waMwali. 10 Mundomo umwempela munobhuda kukombolela nokufhizha. Banakwaina, yezwi azwitokwelela kuba alo. 11 Ani ishawi limwempela lingabhuda ivula imbodo nevula inolwela pondomo na? 12 Banakwaina unkuyu ungazwala ma olivi na, kana unzhambi uzwale ihuyu na? Ishawi linevula inolwela alingabhise ivula inonaka

13 Ndiyani unabuchenjevu kana kuwhisisa pakati penu? Nobupenyu bubwe bubuya ngetondeje mishingo iye nokuzwininipisa kuna buchenjevu. 14 Koga kana mumyoyo yenu mukafundilila nefupa nokuda kuti kubemwi chete, musizwitunhumwije kana kulamba ichokomende, 15 buchenjevu bwakadai abutova kudenga, asi ngobwapasi, abutoba bwompepo nchena, asi bwemipepo mibi. 16 Panowanika ifupa nokuda kokuti zwose zwizhe kunaiye, ndipo pana kusobambikika nezwito zwibi zwilosiyana. 17 Koga buchenjevu bunova kudenga kutanga buloshambijika akale bunalunyalalo, bunyolonyolo, kuzwideleja, kuzhala neshe, akale nemichelo mibuya, kusoba nolushalulo akale nokusolebesa. 18 Balanduli banobyala lunyalalo, banovuna michelo yobululami ina lunyalalo.