1 Patakati tachila munezwi, ndipo patakaziba kuti tipo pechibongo chinowhi Moluta. 2 Bagali bwomo bakatitila ishe jisinolungululika, nokuti bakatibangijila moto, bakatitambula zwanana isu tose, nokuti kwakabatangisa kuna akale kutonhola. 3 Paulu wakabunganisa chikata chehuni jilokoma kova ejibiga mumoto, ndipo inyoka payakabhuda yawha kupisa ikanamatila paluboko lulwe. 4 Bagali bwomo pabakabona inyoka ikalengelela paluboko lulwe, bakati kunomwe noumwe, "Apana bukahajiko, yoyu unhulume umbulayi. Kojoba apunyuka mugungwa, bululami bwalamba kuti ebe umpenyu." 5 Iye, wakashashamulila inyoka mumoto, pesina zwatikana kwaali. 6 Ibo bakamilila, belingilila kuti unozwimba kana kuti unowila pasi akafa, koga pabakati bamilila kwonshaji undefu besibweni chimutikana kwaali, bakashanduka mundangalilo bakati yoyu iye ndimwali.

7 Pelyo noobo bugalo pakaba peli nominda wonkulwana wechibongo unowhi Pabhuliyusi, wakatitambula kova etibalaija nenzila inoshantisa kwamazhuba matatu. 8 Kwakatikana kuti dade baPabhuliyusi bakabakalajikwa nobulwaji bwokupisa kwombili akale nechishaba, Paulu wakava abashanyila akanamata ebabiga maboko awe akabachilisa. 9 Pazwakati zwatikana yezwi, bose banhu bomuchibongo bakababeli namalwaji naibo bakezha bakachiliswa. 10 Ibo bakatipa zwipo zwinji, akale patakakwenda bakatilongelela mubwato zwose zwatalushaka. 11 Kwapinda myeji mitatu ndokuva takwenda mubwato bwokuAlekizandiliya bwakapeja unshaji wose wemhepo buli pechibongo; mbeli kwabo paluba nechimwali chemisholo yaMambile. 12 Takaswika muSailakusi, takagala pakale kwamazhuba matatu. 13 Kuvila yopo takazinguluka tikajine tikaswika kuLejiumu; mushule mwezhuba limwempela, ibhepo lyokuchamhembe lyakapunga, ndilyo lyakatiswincha kuPuteoli mumazhuba mabili. 14 Yoko takawana banakwaina, ibo bakatikoka kuti tigale nabo kwamazhuba mashanu ana mabili. Tikanoswika kuRoma. 15 Banakwaina boko, pabakawha nozwedu, bakezha kotitandamija beva kumusika weApiyasi akale nomungumba yaTatu yokuswikila. Paakababona, Paulu wakaboka Mwali akale akagajika moyo.

16 Patakaswika muLoma, Paulu wakavumijwa kugala ega, nondwi wakaba ondinda.

17 Mushule mwamazhuba matatu, wakashoba pamwempela batungamili babaJuda bomwakalemo, pabakati babungana iye wakati kwabali, "Banakwaina, kojoba ndisakabachinya chinhu kubanhu kana mungalilo yamatategulu edu, asi ndakapilwa ndili unsungwa kuJelusalema mumaboko abaLoma. 18 Pabakati bandibhuzisisa, ibo bakada kundisunungula nokuti apajabeli chisoko chokunditongela lufu. 19 Koga pabakalamba baJuda, ndakakumbila kooma mbeli kwaKesali, kusi kuti pana zwandinotamijila boluji lwangu. 20 Nechi chisoko, ndizwo ndakumbila kuti ndimubone akale ndilebeleke namwi, nokuti zwakalingililwa naIzilayeli ndizwo zwakatisa kuti ndisungwe neketani yeyi."

21 Ibo bakati kwaali, "Isu atijakatambula lukwalo lunova kuJudiya lunoleba nezwizwo, akale apana umwe wabanakwaina wakezha yokuno akatilungululila zwibi nawi. 22 Koga toda kuwha kwauli indangalilo jijo, nokuti igapo yeli toziba kuti kosekose bakumulishunda."

23 Pabakati balangana izhuba, ibo bakezha nobunji kwaakabeligele. Iye wakababhaunulila inyaya kuvila zwingwanangwana kuswika madeko, epupula nezwobushe bwaMwali ekweja kubatondeja nezwaJesu zwibhuda mumilawu yaMozesi nezwinova kubapolofeti. 24 Bamwe bakagunchikana nezwaakaleba koga bamwe abajakadimbwa. 25 Bakanyenyejana pakati pabo, bakanyamuka benda, mushule Paulu alebeleka iwhi lyokuti, "UMpepo uNchena wakaleba ilebeswa kumatategulu enu nondomo woMpolofeti Izaya.

26 Nokuti wakati, ‘Inda kunoolu luji unoti,

moowha koga amutoowhisisa,

akale kasa moolinga koga amutoobonesesa,

27 nokuti moyo woluji yolu wakaba unkukutu,

nenzebe jabo ajidi kuwha,

mesho abo balowafwinya.

Nokuti bangabonesesa namesho abo,

nokuwha nenzebe jabo,

nokuwhisisa nemyoyo yabo,

kuti bechingunuke kuti imi ndibachije.’"

28 Ngezwizibikane kwamuli ngweno kuti, "Yolu luchijo lwaMwali lwasengwa kunaBokuzhe, ibo banoonwhilila." 29 Alebeleka mawhi yaya Paulu, baJuda bakabhuda benyenyejana zwesimba pakati pabo.

30 Iye wakagala iko kwamakole mabili azhele, ezwilipila ingumba yiye, akale etambula bose bakabezha kwaali, 31 ebhaunula bushe bwaMwali nokulayija nozwaTezi Jesu Kristo zwili pachena akale pesina unondambija.