1 Pabakati bapinda muAmfipolisi nomuApoloniya, bakaswika kuTesalonika kwakaba kuli nesinagogi lyabaJuda. 2 Paulu wakangwina mukati sezwo wakaba uli ungalilo uwe, kwamaSabata matatu iye wakanyenyejana nabo zwivila muwhalo inchena, 3 ebalungululila nokubabonesa kuti zwakaba zwikakwelela kuti Kristo esheteswe akale kuti emuke kubafi akale eti, "Yoyu Jesu wandimupupula kwamuli, Ndiye Kristo." 4 Bamwe babo bakavumila kuba pamwempela naPaulu naSailasi, sezwakatiwa nabanji bechiGiliki akale nabanji banhukaji balozibikana. 5 Koga baJuda bakabanefupa, bakatola bamwe bazhuzha bezhoba, bakabunganija luvute, bakata imhelemhele muguta, akale bakazizinga ingumba yaJasoni, beshaka kubamisa mbeli kwabanhu. 6 Pabakabashayiwa bakakulunta Jasoni nabamwe babanakwaina mbeli kwabatongi bweguta bekongoloka beti, "Yaba banhulume babuza kusogajikana inyika yose, bezhabo yokuno akale, 7 kova Jasoni ebatambula, ibo bose bamulwanisa milawu yaSiza, beti kuna umwe She, Jesu." 8 Banhu nabatungamili beguta zwakabazoza kuwha yezwi. 9 Pabakatola indipo yobutabilijo kuna Jasoni nokuna bamwe bose, bakabalekeja bakenda.

10 Banakwaina pakalepo nobusiku bakatumila Paulu naSailasi kuBheliya, pabakaswika bakangwina musinagogi lyabaJuda. 11 Ngweno yaba baJuda bakabakalulama kupinda yabo bokuTesalonika, nokuti bakalitambula iwhi nokulidisisisa, belingisisa makwalo machena mazhuba ose kubona kuti yezwi zwinhu ichokomende na. 12 Banji babo bakadimbwa nabanji banhulume nabanhukaji bechiGiliki banokujwa. 13 Koga baJuda bokuTesalonika pabakawha kuti iwhi lyaMwali lyakabhaunulwa naPaulu kuBheliya neebo, ibo bakezha kwakale neebo, bakakunijila banhu kuti bebamukile. 14 Pakalepo banakwaina bakatumila Paulu munzila mulwendo lwokugungwa, asi Sailasi naTimoti bakasala mwakalemo. 15 Yabo bakapelekeja Paulu bakonswincha kuAtenisi, akale balayiwa kuti bebuje Sailasi naTimoti kuti bezhe kwaali, nokukambijisa, bakanyamuka bakenda.

16 Ngweno Paulu wakabamilila muAtenisi, umpepo uwe wakanyetejwa nokubona iguta lilizhele zwibezhwa. 17 Nokudalo iye wakanyenyejana nabaJuda akale nabamwe bakabenamata nabo musinagogi akale mubugalo bokushambajila naibo bose bakabewanikwa mwakale mazhuba ose. 18 Bamwe bo bazinandayijo bamakapo anowhi baEpikuliyani nabaSitoyiki bakashangana naye. Bamwe bakati,

"Iye unozwita unzibi umutini na?" Bamwe bakati, "Unanga umbhaunuli wabamwali banovakule," nokuti wakaba ebhaunula Jesu nezwokumuka kubafi. 19 Bakontola iye, bakonsenga kuAliyopagasi, beti, "Timuda kuziba kuti indayijo yeyi impya yaumupupula ngiyeni? 20 Nokuti iwi umubuza zwisinowhisisika munzebe jedu, nokudalo tinodabo kuziba kuti yezwi zwinolebani." 21 Ngweno bose baAteniya nabavakule bakaba begala imo, unshaji wabo wose baluunshingisa kuleba kana kuwha zwinhu zwipya.

22 Nokudalo, Paulu elimile pakati peAliyopagasi, wakati, "Banhu bomuAteniya, ndabona kuti munzila jose mubanhu banoda zwobumwali. 23 Nokuti pandabekwenda, ndilingisisa zwinhu zwamunonamata, ndawana akale idebulilo lilokwalwa kuti, ‘Kunamwali usinozibwa.’ Yoyo wamunonamata sousinozibwa, ndiye wandimupupula kunamwi. 24 Mwali wakabumba inyika naizwo zwose zwimomukati, eliShe wedenga nenyika, aatogala muzwibakwa zwakabakwa nabanhu, 25 kana kuti unotilwa zwinhu namaboko abanhu, sofana iye unoshayiwa chinhu, iye ndiye unopa bose banhu bupenyu nompepo wokufhema akale naizwo zwose. 26 Akale wakabumba induji jose kuti lube luji lumwempela lwabanhu, kuti begale pabugalo bwose bwopenyika, akababambanyila mishaji nemigano yobugalo bwabo, 27 kuti beshake Mwali pelina chibimbo chokuti banowha zwiti bonshake akale bongwane. Kojoba alo iye aaiko kule noumwe noumwe wedu, 28 nokuti,

"Muna Iye tibapenyu, tokwendenda akale tolalama."

Zwinanga sezwakalebwa nabamwe benu banokuma beti,

"Naswibo bo tinzwalo yiye.

29 Sezwo tili bana baMwali, atitokwelela kuyeya kuti Mwali unanga sezwibumbwa zwegolide kana zwesiliva, kana zwebwe, zwinobumbwa namaboko nendangalilo jabanhu. 30 Unshaji wokusoziba Mwali wakapinda, koga ngweno Iye unolaya banhu bose pabugalo bwose kuti beshanduke, 31 nokuti ulobiga izhuba lyokutonga inyika yose nelyobululami nesimba lyonhu waakaponcha akale pana yezwi wakapa chibimbiso kunhu wose nokuumusa kubafi." 32 Pabakawha nezwokumuka kwabakafa bamwe bakonseka, koga bamwe bakati, "Toda kukuwha uleba yezwi akale umwe unshaji." 33 Pakalepo Paulu wakabhuda mukati mwabo. 34 Koga bamwe banhulume bakadimbwa bakontobela, mukati mwabo pakabeli naDionisiyasi uAleopagaiti, akale nonhukaji unowhi Damalisi nabamwe baakaba eli nabo.