1 Saulu wakaba evuma kuti Sitivini ebulayiwe.

Nelyo izhuba kwakaba nokusheteswa kukulwana kwegubungano muJelusalema; akale ibo bakatataukana mujinyika jeJudiya neSamaliya, kuzhe kwabapositoli. 2 Banhulume balodimbwa ndibo bakajika Sitivini, bakondila kasa zwineshungu. 3 Koga Saulu wakaba epalaja igubungano, engwina mungumba nengumba, ekulunta banhulume nabanhukaji ebabiga muntolongo. 4 Ngweno yabo bakatataukana bakenda bebhaunula iwhi. 5 Filipu wakenda kuguta lyomuSamaliya akanobapupulila Kristo. 6 Akale, luvute nomwoyo umwempela lwakawha lukatobela zwakabelebwa naFilipu, bewha nokubona zwitondejelo zwaakabeta. 7 Mipepo ineshambwa yakakwiila ibhuda mubanhu akale banji balokokonyala nabalolemala bakachiliswa. 8 Nokudalo kwakaba nolushanto lukulwana muguta yelyo. 9 Koga mwakabeli nonhulume waluwhi Simoni walusota masalamusi, wakachenamisa banhu bomuSamaliya, ezwiti iye unhu unkulwana kasa. 10 Bose bakaba bonwhilila, kuvila kubatukutuku zwinda kubakulwana, beti, "Yoyu unhulume, masimba aMwali anowhi maKulugulu." 11 Bakonwhilila, nokuti kwonshaji undefu wakabebachenamisa namasalamusi awe. 12 Koga pabakadimbwa kubhaunula kwaFilipu kweNdebo iMbuya yobushe bwaMwali, nezina lyaJesu Kristo, bakabhabhatizwa, bose banhulume nabanhukaji. 13 Kana iye Simoni emene wakadimbwa, akale paakabhabhatizwa wakatobela Filipu. Paakabona zwitondejelo nezwishamiso zwikulwana zwakabetiwa, wakachenama. 14 Ngweno bapositoli baluba belikuJelusalema pabakawha kuti iSamaliya yalitambula iwhi lya Mwali, bakatumila kwabali Pita naJoni, 15 bakadelela kwabali kwabakaswika bakanamata nabo kuti betambule uMpepo Nchena, 16 nokuti aujakabanu wabhulukila kana kumwempela wabo, koga bakaba bhabhatizwa muzina lyaShe Jesu chete. 17 Bakabiga maboko abo pezhulu pabo, bakatambula uMpepo uNchena. 18 Ngweno Simoni paakabona kuti uMpepo Nchena unopiwa nokubigwa maboko nabapositoli wakabhisa imali, 19 eti "Ndipeni bo isimba yeli kuti aani naani wandinobiga maboko pezhulu pape, etambule uMpepo Nchena." 20 Koga Pita wakati kwaali, "Isiliva lilyo lipalale nawi, nokuti unolangalila kuti chipo chaMwali ungachitenga ne mali! 21 Iwi auna chikamu kana inkobelo pana yezwi, nokuti moyo uwo aujilolulama mbeli kwaMwali. 22 Shanduka kunobu bubi bubo, unamate kunaShe, pamwe ungawana kulekelelwa pechinangwa chomoyo uwo. 23 Nokuti ndibweni kuti wafundilila nolubengo luna luchibo nokusungwa nechibi." 24 Simoni wakashandula eti, "Ndinamatileni kunaShe, kuti zwamwaleba zwisitikane kwandili." 25 Ngweno pabakapa busumikiji akale babhaunula iwhi lyaShe, bakabwilila kuJelusalema, bepupula iNdebo iMbuya mumisha minji yamaSamaliya.

26 Ingilozi yaShe yakati kunaFilipu, "Nyamuka unde kuchamhembe, kungwagwa unova kuJelusalema unda kuGaza." Yoyu ungwagwa womugwegulu. 27 Wakanyamuka akenda. Feno unhu wokuEtopiya, unsunyulwi akale eli umbhati wehobhodo yaKandisi, Shekaji wamaEtopiya, wakabezha kuJelusalema konamata, 28 elimukubwilila, eligele mungolo yiye, elimukubala lukwalo lwompolofita Izaya. 29 UMpepo wakati kunaFilipu, "Inda unokwendesana nengolo yeyi." 30 Nokudalo Filipu wakalabukila kungolo, akawha unsunyulwi ebala lukwalo lwaIzaya, akabhuza eti, "Ukumuwhisisa na zwaumubala?"

31 Iye wakati, "Ndingawhisisa chini, kuzhe kwokuti umwe enditondeje?" Wakonkumbila Filipu kuti engwine muchikochikala chiche begale bose. 32 Wakaba ebala iNdebo yeyi,

"Wakatungamijwa semhwizi ikumunda kunobulayiwa,

semhwizana ilowhilijila mbeli kwombulayi wayo,

sezwo aajakazhula undomo uwe.

33 Mukulelupiswa kukwe aajakawana indulamo imbuya.

Ndiyani angabandulula ijanja lilye?

Nokuti bupenyu bubwe bunotolwa kuva munyika."

34 Unsunyulwi wakati kuna Filipu, "Umpolofeti umuleba akananga aani munezwi zwose, ndibuje, umuzwileba iye kana umuva umwe unhu?" 35 Kova Filipu ezhula undomo uwe elebeleka, etangisa newhalo inchena yaIzaya akombuja neNdebo iMbuya yaJesu. 36 Bechinokwenda nongwagwa bakaswika panevula, unsunyulwi akati, "Linga heyi ivula. Ini zwingandikoneja kuti ndibhabhatizwe?" 37 Akale Filipu wakati, "Kana udimbwa nomwoyo uwo wose, ungabhabhatizwa." Akale wakashandula eti, "Ndinodimbwa kuti Jesu Kristo Mwananhulumyana waMwali." 38 Wakamisa chikochikala chiche, belibabili bakenda muvula, Filipu akabhabhatiza unsunyulwi. 39 Pabakabhuda muvula, uMpepo waShe wakontola Filipu, unsunyulwi aajakoombona, akendila mbeli nolwendo lulwe ekashanta. 40 Filipu wakazwiwana abakuAzotasi, akapinda enda ebhaunula iNdebo iMbuya mumizinda yose akajina akanoswika kuSizaliya.