1 Untebuji unkulwana wakabhuza Sitivini eti, "Yezwi zwinhu ichokomende na?" 2 Sitivini wakashandula akati, "Banakwaina namatate, ndiwhilileni, Mwali wamasimba wakazwitondejela kuna tate bedu Abhulahamu echi kuMesopotamiya, esanhu agala kuHalani," 3 wakati kwaali, "Ibhuda munyika yiyo nomumakamu awo, unde kunyika yandichakutondeja." 4 Pakalepo wakabhuda munyika yamaKaladiya akenda kunogala muHalani. Akale kuva yopo, tate babe pabakafa, Mwali bakoombuza munyika yeyi yamugele ngweno, 5 asi aajakompa ishabo munaiyo, kana pokutobela igumbo lilye, kojoba Abhulahamu esakabeli nomwana, Mwali wakabimbisa yeyi inyika kuchizekululu chichoontobela. 6 Mwali wakaleba kuti chizekululu chichoogala munyika yabamwe, akale banootiwa bazike bakajiijwa kwamakole mazana mana. 7 Mwali wakati, inyika ichabata bazike unoyitongesa, akale mushule mwozwo banoobhuda yoko, bezha yokuno kondinamata. 8 Mwali wakompa chito chemhalajo. Nokudalo Abhulahamu wakazwala Isaki, akomhalaja mushule mwamazhuba mashanu ana matatu, Isaki wakazwala Jakobe, akale Jakobe akaba tate benduji igumi jinembili. 9 Matategulu bakaba nefupa pezhulu paJosefa, bakontengesa kuIjipiti. Koga Mwali wakabeli naye, 10 akonchija mumasheto awe ose, akale akompa lubhancho nobuchenjevu mbeli kwaFalo, she wokuIjipiti, iye wakonta untongi weIjipiti nengumba yiye. 11 Ngweno kwakaba nebhamba nokujiila kukulwana munyika yose yeIjipiti neKenani akale matategulu edu akashayiwa zwolya. 12 Koga Jakobe paakawha kuti kuna zwilyo kuIjipiti, wakatuma matategulu edu mulwendo lwokutanga. 13 Palwendo lwabili Josefa wakazwizibisa kubakulu babe, nemhuli yaJosefa yakazibiswa kunaFalo. 14 Josefa wakatuma bakulu babe kunoshoba tate babe Jakobe namakamu awe, bakabeli makumi mashanu namabili anabanhu bashanu, 15 akale Jakobe wakabhuluka kuIjipiti. Wakafa, iye namatategulu edu, 16 bakanyamulwa bebwilizwa kuShekemu bakanojikwa mugumbu lyakabatengwa naAbhulahamu nendipilo yesiliva kubanabanhulumyana baHamo kuShekemu. 17 Koga unshaji wechibimbiso pawakasendela, unshaji wekowhe Mwali yaakata kuna Abhulahamu, banhu bakawanda bakazhalilana muIjipiti, 18 kujina kukaswika umwe She usakaba eziba Josefa. 19 Yoyu unhu wakabhata bubi banhu bokunasu, wakasindamija matategulu edu, akabalashisa bana babo kuti besibe bapenyu. 20 Noyu unshaji Mozesi wakazwalwa, akale wakabeyebeka mbeli kwaMwali. Wakalelwa mungumba yatate babe kwemyeji mitatu, 21 akale paakabhutulwa, mwananhukajana waFalo wakontola akonkubusa somwananhulumyana uwe. 22 Mozesi wakabakalayijwa kuchenjela kwose kwabanhu bomuIjipiti, akale elinesimba mumawhi nomuzwito. 23 Aba namakole makumi mana, zwakaswika mumwoyo uwe kuti eshanyile banakwaina babe, banabanhulumyana bokwaIzilayeli. 24 Paakabona umwe wabo ejiijwa, wakondwila undyambijwi, wakabwiliza nokuloba unJipite. 25 Wakayeya kuti makamu awe achawhisisa kuti Mwali uchabasungunula namaboko awe, koga abajakazwiwhisisa. 26 Muchimuka wakabaswikila, akawana babili bokunaibo belwana, akakweja kubalandula eti, "Banhulume, mumakamu, ini mulwana!" 27 Koga yoyo wakabachinyila umbakijani uwe wakonsundila kule eti, "Ndiyani wakuta untongi nombetesi pezhulu pedu?" 28 "Unoda kundibulaya sezwawakabulaya unJipite izhilo!" 29 Nendebo yeyo, Mozesi wakatizhila kunyika yeMidiyeni, akanogala kwakale, kwaakaba tate babana banhulumyana babili. 30 Ngweno pakwakapinda makole makumi mana, ingilozi yaShe yakazwitondeja kwaali muntutumo womoto pedenje, mugwegulu lyedunhu lyeSinai. 31 Mozesi paakazwibona yezwi, wakachenama nezwaakabona, paakasendela kuti ebonesese, iwhi yaShe lyakawhika kwaali, 32 liti, "Ndili Mwali wamatategulu awo, Mwali waAbhulahamu, waIsaki akale nowaJakobe." Mozesi wakadedema aajakada kulinga. 33 She wakati kwaali, "Imbula ishangu jijo, nokuti bugalo paumile buchena. 34 Chokomende ndabona kujiila kwabanhu bangu baimo muIjipiti ndikawha kumimila kwabo, ndabhuluka ndizha kobasungunula. Ngweno izha, ndikutume kuIjipiti." 35 Yoyu Mozesi ubakalamba beti, "Ndiyani wakakubiga kuba untongi akale nombetesi?" Ndiye Mwali wakontuma kuti ebe untongi nounsungunuli noluboko lwengilozi yakazwitondejela kwaali mudenje. 36 Wakababhisa muIjipiti, mushule mwokutondejela zwishamiso nezwitondejelo munyika yeIjipiti, nopeGungwa iShaba akale nomugwegulu kwamakole makumi ana mana. 37 Yoyu ndiye Mozesi wakati kubana baIzilayeli, "Mwali unoomupa uMpolofeti unova mubanakwaina benu unanga sami." 38 Yoyu ndiye waluba mugubungano lyomugwegulu eli nengilozi yakalebeleka naye peDunhu lyeSinai, akale namatategulu edu, wakatambula indebo jobupenyu kuti ejiswinche kwatili. 39 Matategulu edu bakalamba kunwhilila, akontukulila akabwilila kuIjipiti mumyoyo yabo, 40 beti kunaAloni, "Tibumbile baMwali bachatitungamilila, koga yoyu Mozesi wakatibhisa munyika yoku Ijipiti, atichinoziba zwatikana kwaali." 41 Munayo mazhuba, bakabumba inamani, bakapila untebulo kuchibumbwa, akale bakashantila mishingo yamaboko abo. 42 Koga Mwali wakabatukulila akabasiya benamata zwibumbwa zwokudenga, sezwazwilokwalwa mulukwalo lwabapolofeti kuti, "Mwakandipila umpilo wemhuka jimwakabulaya kana untebulo kwamakole makumi mana mugwegulu, Imwi bengumba yaIzilayeli, 43 Imwi mwakatola itente lyaMoloki, nenyenyeji jechimwali Lefani, zwibumbwa zwamwakata kuti muzwinamate akale ndomubhisa ndimusenge kuseli kweBhabhiloni." 44 Matategulu edu bakabeli netente lyechisumikijo mugwegulu, lyaluba namabakilo akalayijwa naMwali kunaMozesi sokulayila kwaakata. 45 Matategulu edu, akalitambula, akalibuza munyika yabakatola kunejimwe induji betungamililwa naJoshuwa, ndikwo kulyakabeli, kuswikila unshaji waDavidi, 46 iye wakawana kudiwa naMwali akale akakumbila kuwanila bugalo Mwali waJakobe. 47 Koga Solomoni ndiye wakabakila Mwali ingumba. 48 Kojoba alo, Iye upezhuluzhulu aatogala mujingumba jinobakwa namaboko abanhu, sezwakalebwa nompolofeti kuti, 49 "Idenga chigalo changu chobushe, inyika chibhula chamakumbo angu. Ingumba ni yauchandibakila, kana kuti ini bugalo bonyetutukwa kwangu? Ndizwo zwimulebwa naShe." 50 "Alutoba luboko lwangu lwakabumba zwinhu zwose yezwi na? 51 Imwi balokoma misholo, basakamhalajwa mumyoyo nenzebe, munolamba uMpepo uNchena sezwakata matategulu enu! 52 Ndiupi umpolofeti usakasheteswa namatategulu enu? Akale bakabulaya yabo bakalebambeli kuzha kwaiye ulolulama, uli iye ngweno umwakacheta mukabulaya, 53 imwi mwakatambula mulawo mutungamilwa nengilozi jaMwali koga amujakontobeleja."

54 Pabakazwiwha yezwi, bakalwajilwa mumyoyo, bakondumila intwino. 55 Koga iye, ekazhajwa noMpepo uNchena, wakalinga kudenga akabona kungaima kwaMwali, akale Jesu elimile kuluboko lwokululyi lwaMwali, 56 akati, "Lingani, ndibweni idenga lyazhulwa akale mwananhulumyana wonhu elimile kuluboko lwokululyi lwaMwali!" 57 Koga bakashomeja newhi lipopezhulu, bakazuna inzebe bakondabukila beli pamwempela. 58 Bakonkuluntila kuzhe kweguta bakompubula namabwe, nabasumikiji bakabiga zwimbalo zwabo pamakumbo omwe unzhuzha waluwhi Saulu. 59 Pabakabompubula namabwe Sitivini, iye wakashomeja kunaMwali eti, "Tezi Jesu, tambulani umpepo wangu." 60 Wakafhigama, akakongoloka newhi lipopezhulu, eti, "Tezi, musibape undandu nechi chibi." Paakapeja kulebeleka yezwi, wakafa.