1 Koga Saulu elya moto akale ebimbisa lufu kubalayijwa baShe, wakenda kubatebuji bakulwana 2 akakumbila makwalo okunda kusinagogi yokuDamasikasi, kuti angowana batobeli beNzila, banhulume nabanhukaji, ebabuze kuJelusalema bakasungwa. 3 Ngweno elimunzila, mulwendo lulwe, abapelyo neDamasikasi, pakalepo lupenyo lwakava kudenga lukomunikila. 4 Wakawila pasi akawha iwhi liti kunaiye, "Saulu, Saulu, unondinyajilani?" 5 Saulu wakashandula akati, "Ndimwi aani, Tezi?" Akati, "Ndimi, Jesu, waumuyabisa, 6 asi inyamuka ungwine muguta, mwauchanobujwa zwokuta." 7 Banhulume baakabekwenda nabo bakama besina mawhi mundomo, beliwhile iwhi koga pesina unhu wabamubona. 8 Saulu wakamilika pasi, paakazhulika mesho awe, apana chaakabona, nokudalo bakontungamilila bakombata luboko bonsenga muDamasikasi. 9 Wakata mazhuba matatu esinobona kana kulya kana kunwa. 10 Kwakabeli nondayijwa muDamasikasi, wakabewhi Ananiyasi. She wakalebeleka naye muchibono akati, "Ananiyasi," Iye wakadabila eti, "Ndipo yopano She." 11 Tezi wakati kwaali, "Nyamuka unde kungwagwa, unowhi Lulama, unoshaka mungumba yaJudasi, unhulume wokuTasusi izina lilye unowhi Saulu, unoungwana elikumunamata, 12 akale iye wabona unhulume unowhi Ananiyasi, ezha kobiga maboko pezhulu pape kuti ebone akale." 13 Koga Ananiyasi wakashandula eti, "She, ndakawha nabanji nezwoyu unhu, bubi bwaakata kubachena benu bokuJelusalema, 14 akale yopano ulopiwa masimba nabatebuji bakulwana, kusunga bose banoshoba izina lyenu." 15 Koga iye She wakati kwaali, "Inda, yoyu chishingiso changu chindashala, kuti chisume izina lyangu kubanhu bokuzhe akale kumashe nokubana baIzilayeli, 16 nokudalo ndichontondeja kuti unoosheteselwa chini pezhulu pezina lyangu." 17 Nokudalo, Ananiyasi wakanyamuka akenda kuneyo ingumba. Paakombiga maboko wakati kwaali, "Mwanakwaina Saulu, She Jesu wakazwitondejela kwauli mungwagwa uwakezha nawo, wandituma kuti uchiliswe ubone akale uzhajwe noMpepo Nchena." 18 Pakalepo kwakambwela zwinanga mapande ehobe zwiva mumesho awe ndokuva mesho awe akabona. Wakanyamuka akabhabhatizwa, 19 wakalya akawana isimba. Kwamazhuba wakaba nabalayijwa muDamasikasi. 20 Eli mumasinagogo, wakapupula eti, Jesu ndiye mwananhulumyana waMwali. 21 Bose bakonwha bakachenama beti, "Aatoba iye yoyu unhulume wakabeyabisa yabo banoshoba yeli izina kuJelusalema na? Ndizwo zwakabezhila yokuno, ebatola ebasenga bakasungwa kubatebuji bakulwana na." 22 Koga Saulu, wakakubuka kasa mumasimba, akale akachenamisa baJuda banogala muDamasikasi nokusimatija kuti Jesu ndiye Kristo. 23 Kwapinda mazhuba manji, maJuda bakagowana kuti bombulaye, 24 koga chilangano chabo chakaswika munzebe jaSaulu. Bakalinda ishubo busiku namasikati, kuti bombulaye, 25 koga balayijwa babe bakombhuluja busiku, bakondeleja pabulambo eli muchizuma.

26 Paakaswika kuJelusalema wakakweja kushinga pamwempela nabalayijwa, asi bose bakabontya, nokuti abajakabedimbwa kuti waaba undayijwa. 27 Koga Bhanabhasi wakontola, akenda naye kubapositoli, akabazibisa kuti elimungwagwa wakabona chini She Jesu, akalebeleka naye, akale nokuti wakabhaunula chini izina lyaJesu kuDamasikasi nomwoyo usina lutyo. 28 Nokudalo wakangwinuka mukati mwabo muJelusalema, 29 ebhaunula izina lyaShe Jesu esina lutyo. Iye wakalebeleka enyenyejana nabaJuda balulebeleka chiGiliki, ibo bakashaka kuumbulaya. 30 Banakwaina babe pabakazwiziba yezwi, bakonsenga pasi kuKesaliya, kwaakapindilijwa etumwa kuTasusi. 31 Igubungano lyose muJudiya, nomuGalili akale muSamaliya lyakaba nolunyalalo, likakubuswa; akale likwenda mulutyo lwaShe nomulunyalalo lwoMpepo Nchena. 32 Pita ekwenda yopa nopa mukati mwaibo bose bachena, wakaswika kubachena bomubugalo bweLida. 33 Yomu wakawana unhulume unowhi Eniyasi, wakabeli igosha kwamakole mashanu anamatatu. 34 Pita wakati kwaali, "Eniyasi, Jesu Kristo umukuchilisa; nyamuka ulonganye bushasha bubo." Pakalepo wakanyamuka. 35 Bagali bomuLida neShaloni bakombona, bose bakashanduka bakadimbwa munaShe. 36 Ngweno, pakabeli nondayijwa wechinhukaji kuJopa waluwhi Tabita, zwileba kuti Dokasi. Wakabeli unhukaji unamishingo mibuya akale eta zwito zwokubhancha basheti. 37 Munayo mazhuba wakalwala kova eshayika, pabakonshambisa bakombiga mungumba yopezhulu. 38 Sezwo iLida yakaba ili pelyo neJopa, balayijwa, pabakawha kuti Pita wakaba eliko, bakatuma banhulume babili kunda kwaali kuti benoombweta beti, "Nchenche swika kwatili usijilwe." 39 Nokudalo Pita wakanyamuka akenda nabo. Aswika, bakonsenga mungumba ipopezhulu. Inchilikaji jose jakabelimile pelyo naPita jilila, jiuntondeja zwimbalo neshashiko, zwakaba zwatiwa naDokasi eliumpenyu. 40 Koga Pita wakababhisa bose mungumba, akafhigama akanamata, kova eshanduka elinga kuntumbu eti, "Tabita imuka." Iye wakabhwazula, paakabona Pita wakamuka akagala. 41 Pita wakatambunuja luboko lulwe akonyamula. Pakalepo wakashoba bachena nenchilikaji akombiga mbeli kwabo eli umpenyu. 42 Yezwi zwakazibikana iJopa yose, akale banji bakadimbwa munaShe. 43 Pita wakagala mazhuba manji muJopa, egala naSimoni, unchuki.