1 Nooyo unshaji She Helodi, wakabhata nolunya bamwe begubungano kuti ebashetese. 2 Wakabulaya Jemusi unkulu waJohani negwalabaza, 3 akale paakabona kuti zwakashantisa baJuda, wakava akasunga Pita neebo. Yaya akaba elimazhuba echinkwa chisina umfufumuso. 4 Paakonsunga, wakombiga muntolongo, akompila kumakapo mana abalwi kuti bondinde, elinendangalilo jokuti mushule mwePasika unoonsenga kubanhu. 5 Nezwo Pita wakalondotwa muntolongo; ibo begubungano bakasungwalila kuunamatila nesimba kunaMwali. 6 Busiku bwakalebo, bwezhuba lyokuwhi Helodi walumisa pambeli pabanhu, Pita wakabelilele pakati pabalwi babili, akasungwa namaketani mabili, nabalindi mbeli konkoba bakalinda ijele, 7 ingilozi yaShe yakaswika, mukaba nokuchena muntolongo, ikazobanya Pita nopamapi awe iumusa iti, "Muka nokukambija." Pakalepo maketani kumaboko akambwela. 8 Ingilozi yakati kwaali, "Mbala akale umbale zwikwabaila zwizwo," Iye wakata alo. Ikati akale, "Hingija ishashiko yiyo unditobele." 9 Yakabhuda akatobela, aajakaziba kuti zwimutiwa nengilozi ichokomende, wakayeya kuti ukumubona chibono. 10 Pabakapinda undindi wotanga akale nondindi wabili, bakaswika peshubo lyensimbi palubhudwa napo ungwina muguta. Lyakazhulika lyoga, akale ibo bakabhuda pabakati baswika pemhalalano jenzila jomuguta, pakalepo ingilozi yakonsiya. 11 Pita wakazhulika mesho akati, "Ngweno ndinechokomende kuti She watuma ingilozi yiye kuti yondimunula mumaboko aHelodi akale nomunazwose zwakabakalindwa nabanhu bechiJuda." 12 Paakaziba alo, wakenda kungumba yaMariya, amai baJohani, unowhibo Mako, kwakabakashangana banji pamwempela benamata. 13 Paakagogoja pankoba weshubo, undandakaji waluwhi Roda wakenda kunodabila. 14 Paakaziba iwhi lyaPita, nolushanto aajakazhula ishubo, koga wakalabuka kunobuja bamwe kuti Pita umile peshubo. 15 Ibo bakati kwaali, "Unopenga." Koga iye wakasimisa eti ndimo. Bamwe bakati, "Untumwa waMwali uwe!" 16 Koga Pita wakendilambeli egogoja, pabakazhula bakombona, bakachenama. 17 Wakabanyalaja noluboko akabalungululila kuti She wakombhisa chini muntolongo. Wakati akale, "Mubuje Jemusi nabamwe banakwaina yezwi." Wakava anyamuka enda kunobumwe bugalo. 18 Ngweno pakwakeja, kwakaba nenyonganyonga pakati pabalwi kuti ini zwatikana kunaPita. 19 Helodi paakompyanga wakonshayiwa, ndokuva abhuzisisa balindi akale akapa chilayilo chokuti bebulayiwe. Iye wakabhuda muJudiya enda kuKesaliya akanogala kwakale. 20 Ngweno, Helodi wakanyemela banhu bokuTayi akale neSidoni, ibo bakenda kwaali liligapo bakankombeleja unshingi uwe unkulwana unowhi Bhulasitasi, bakakumbila lunyalalo, nokuti inyika yabo yakabewana zwokulya kunyika yashe. 21 Nezhuba lyakabakalongwa Helodi wakambala zwimbalo zwizwe zwobushe, akagala pechigalo chobutongi, akalebeleka kwabali. 22 Banhu bakakongoloka beti, "Yeli iwhi lyaMwali alitoba lyonhu!" 23 Pakalepo untumwa waTezi wakondoba nokuti aajakapa lukujo kunaMwali, wakafa akalyiwa nehonye. 24 Koga iwhi lyaMwali lyakakubuka akale likawandilana. 25 Bhanabhasi naSaulu bakabuya beva kuJelusalema, bazhajikija mishingo yabo, bakezha naJoni unalimwe izina linowhi Mako.