1 Ngweno mugubungano lyokuAntiyoki kwakabeli nabapolofeti akale nabalayiji saBhanabhasi, Simiyoni wakabewhi Naija, Lusiyasi wokuSayilini, Manaeni umwe igulukota wegota lyaHelodi untongi naSaulu. 2 Belimukunamata kunaShe, akale bezwiminya kulya, uMpepo Nchena wakati, "Ndipambulileni Bhanabhasi naSaulu benota unshingo wandabashobela."

3 Pabapeja kuzwiminya kulya nokunamata, bakababiga maboko abo pezhulu pabo bakabatumijila.

4 Nokuti bakatumwa noMpepo Nchena, bakenda kuSeleusiya, akale kuva yoko bakenda nobwato kuSaipulasi. 5 Pabakaswika kuSalamisi, bakapupula iwhi lyaMwali mumasinagogo abaJuda. Bakabeli naJoni sombhanchi wabo.

6 Pabakati bakwenda chibongo chose, bakaswika kuPafosi bakawana umwe unhu wamasalamusi, umpolofeti wamaniepwa eli unJuda, waluwhi Bha-Jesu. 7 Wakabeli nontongi wechikamu chenyika waluwhi, Sejiyasi Paulusi, unhulume unabuchenjevu, iye wakashoba Bhanabhasi naSaulu akale akada kuwha iwhi lyaMwali. 8 Koga, Elimasi wamasalamusi (ndizwo zwalinoleba izina lilye), wakabanyenyeja eshaka kubhisa untongi wechikamu chenyika mukudimbwa. 9 Koga Saulu, unowhi akale Paulu, azhajwa noMpepo Nchena wakontokoloja, 10 akati, "Iwi mwananhulumyana waGuluzhanje, iwi umbengi wobululami bose, uzhele buchengeji nobubi, aungaleke kulashisa inzila iloti twisi yaShe? 11 Akale ngweno ziba kuti, luboko lwaShe lupo panawi akale unoba ibhofu akale usinobona izhuba kwonshaji."

Pakalepo ifulele nenhilima zwakawila pana iye, akenda eshaka banhu kuti bombhate luboko bontungamile. 12 Pakalepo untongi wechikamu chenyika wakadimbwa, paakabona zwakatikana, akale wakachenamiswa nendayijo yaTezi.

13 Paulu nabamwe babe bakakwenda nobwato kuva kuPafosi bakaswika kuPega imo muPamfiliya. Joni wakabasiya akabwilila kuJelusalema, 14 koga ibo bakapinda muPega bakaswika kuAntiyoki yokuPisidiya. Nezhuba lyeSabata bakenda musinagogi bakagala pasi. 15 Pakwakapela kubalwa kwemilawu namakwalo abapolofeti, batongi besinagogi bakatumija kwabali iwhi beti,

"Banakwaina kana muli newhi lyokusungwaja banhu, lilebeni." 16 Nokudalo Paulu wakanyamuka, akamisa luboko lulwe akati,

"Banhu bomuIzilayeli, akale namwi munotya Mwali, ndiwheni! 17 Mwali wayaba banhu, baIzilayeli, wakashala matategulu edu akabata banhu bakulwana nonshaji wokugala kwabo muIjipiti. Akale noluboko lunesimba wakabatungamila ebabhisa munyika. 18 Kwamakole angaba makumi mana belimugwegulu, wakabatungamila nomwoyo undefu. 19 Paakapalaja induji ishanu jinembili munyika yeKenani. Wakabapa inyika yeyo seshabo lyabo. 20 Yezwi zwakaba zwamakole mazana mana anamakumi mashanu.

"Mushule mwezwo, wakabapa batongi kuswika kuna Samiyele, umpolofeti. 21 Kova bekumbila She. Mwali akabapa Saulu mwananhulumyana waKishi, unhulume woluji lwaBhenjamini, kwamakole makumi mana. 22 Wakati ombisa, wakanyamula Davidi kuti ebeshe wabo. Wakasumikija eti, Ndawana munaDavidi, mwananhulumyana waJese, unhulume wokumoyo kwangu, uchata zwido zwangu zwose." 23 Muchizekululu choyu unhulume Mwali wabuza kunaIzilayeli uNchiji Jesu, sokubimbisa kukwe. 24 Asanu ezha, Joni wakaba abhaunula lubhabhatizo lwokushanduka kubanhu bose bomuIzilayeli. 25 Joni enda kunopeja unshingo uwe, wakati, "Imwi moyeyesela kuti ndimi ani? Anditoba iye. Ne, koga mushule lyangu kumuzha iye, wandisilokwelela kusupula ishangu jije."

26 Banakwaina, bana bemhuli yaAbhulahamu, akale nabo pakati kwenu banotya Mwali, chilayijo choluchijo yechi chakatumijwa kwatili. 27 Nokuti yabo banogala muJelusalema nabatongi babo, nokuti abajakonziba kana kuwhisisisa inshamulo jabapolofeti, jinobalwa isabata nesabata, bakazhajikija yezwi nokuundasha. 28 Kojoba basakawana undandu unokwelela kutongelwa kufa, bakakumbila kunaPilato kuti ebulayiwe. 29 Akale pabakazhajikija zwose zwakabakakwala nozuzwe, bakondeleja munti bakondajika mugumbu. 30 Koga Mwali wakomusa mubafi, 31 akale kwamazhuba manji wakazwitondejela kunabo baakava nabo kuGalili bezha kuJelusalema, bali ibo ngweno basumikiji babe kubanhu. 32 Timumubuzila iNdebo iMbuya yakabimbiswa naMwali kumatategulu, 33 Yezwi wazwizhajikija kunasu bana babo nokumusa Jesu,

sezwilokwalwa akale muJimbo jabili, "Iwi umwananhulumyana wangu,

nasi ndakuzwala."

34 Akale sezwo ichokomende lyokuti wakomusa mubafi, kuti esibwilile akale kukubola, wakalebeleka neyi inzila,

"Ndichakupa iwi makombolelo

machena echokomende aDavidi."

35 Nokudalo unoti akale munolumwe Lwimbo,

"Imwi amutoolekelela uNchena wenu kuti ebole."

36 Koga Davidi, apeja kuta unshingo waMwali muchizekululu chiche, wakafa, akalajikwa namatate awe akale akabola, 37 koga iye wakamuswa naMwali, aajakabola. 38 Ngezwizibikane kwamuli, banakwaina, kuti nokuda kwoyu unhulume kulekejelwa kwoluchinyo kumupupulwa kwamuli, 39 akale wose unodimbwa mwaali unosungunulwa muna icho chose chalukona kuti imwi musungunulwe nomulawu waMozesi. 40 Chenjelani, kuti yezwi zwinolebwa nabapolofeti zwisitikane kwamuli,

41 "Lingani, imwi munoheula, akale shamani, mupalale,

nokuti ndinota chitiko mumazhuba enu,

chitiko chamusinovumila

kana umwe angomuzibisa imwi."

42 Pabakabhuda pazhe, banhu bakabateteja kuti zwinhu yezwi ngana zwalebelekwa akale musabata linotobela. 43 Pakwakapela unshangano wesinagogi, baJuda banji nabamwe bakabadimbwa zwechokomende kubuJuda, bakatobela Paulu naBhanabhasi, bakalebeleka nabo bebasungwaja kuti bekwende mushe jaMwali.

44 NeSabata lyakatobela bunji bwabeguta bakabungana bezha kowha iwhi lyaMwali. 45 Koga baJuda pabakabona bunji bwabanhu, bakazhala noluchibo, bakanyenyejela zwakabelebwa naPaulu akale bakontuka. 46 Paulu naBhanabhasi bakalebeleka besinalutyo beti, "Zwakaba zwikakwelela kuti iwhi lyaMwali lipupulwe kwamuli tangwa. Sezwo mwakalisundila kumbali, akale mukazwitonga mwoga imwi kuti amutokwelela bupenyu businopela, lingani isu tachebukila kunaBokuzhe." 47 Nokuti She wakatilaya isu, eti,

"Ndakuta iwi kuti ube mwenje waBokuzhe,

kuti iwi usenge luchijo kumapejelejo enyika."

48 Pabakazwiwha yezwi Bokuzhe, bakashanta akale bakakuja iwhi lyaMwali, banji bakatambulwa mubupenyu businopela, bakadimbwa.

49 Iwhi lyaMwali lyakendila mbeli munyika yose. 50 Koga baJuda bakasungilija banhukaji banodimbwa banolemekejwa pamwempela nabanhulume banotungamila muguta kuti beyabise Paulu naBhanabhasi, akale bakabatatamila mubugalo bwabo. 51 Ibo bakakuhumula ihuluba yokumakumbo abo pezhulu pabo, bakenda kuIkoniyumu. 52 Balayijwa bakazhala nolushanto akale noMpepo Nchena.